Read Hrangkhol DÂN INHNINA 24 Bible Online

DÂN INHNINA 24 - Hrangkhol bible

DÂN INHNINA 24

¹Mi’n dôngma a neia, inhnunga chu ama chunga khan a nuam loi lam thil i mani a hmu sikin nuam ta maka; khanchu irmâkna lekha irziak a ta, pe a ta, a in ata insuaktir a ti.

²Khan kha nupang khan pasal dang nei nôk sian,

³kha mi khom khan nuam nôk ta no sian, irmâkna lekha irziak pe’n a in ata kha insuaktir nôk sianlân; a ninole, a pasal inhnina kha a isûn khom a ni thei,

⁴a i ang khom nisian, a pasal masa khan a inei nôk hrang ni ma; porinchetira a ibe hrang a ni; khaang kha RENGPA ikhôkmâk lam tak a ni, RENGPA nin Pathianin nangni a ipêk rama khaang thil saloi kha nin itho hrang ni ma.

⁵Dôngma nei phing chu irdoinaa a ife hrang ni ma, vântâng sina khom an inphût hrang ni ma; kum khat sûng chu a dôngma leh raifân takin an iomsuam hrang a ni.

⁶Tukhomin baidi nôina lung, a’rsâng ual khom ni ri se, thil pûk bondoka se pe no roi, an sûngkua fâk zongna nin ilâkpai pe tihna a ni.

⁷Israel mi’n Israel mi dang inrûkin suaka sor sianlân mani, sala mani a zuarin chu kha mi kha thatpai hrang a ni, khaang khan nin laia thil saloi kha nin inboipai hrang a ni.

⁸Pân saloi nin irveiin chu Levia irchi ochaiin tho hrang a iti kha ngûk takin tho roi, an kuanga ki ihril ang khan tho roi.

⁹Aigupta ram ata nin hong suakna lama Miriami chunga RENGPA nin Pathian thiltho kha inhre mai roi.

¹⁰Ni kôlvêla mi thil nin pûktirin a bondok hrang kha, a in ata va la no ro,

¹¹pên tiang ngîr ni ta, ni thil pûktu khan a bondok hrang kha a hong ila suak hrang a ni.

¹²Mi’nriang tak a ni’n chu a puan bânda kha zâlna hrangin hmang pe no roh.

¹³Misa tâkin chu ni inkhîr nôk hrang a ni; ama puan ngei khan irtuam inlum a ta, ni chunga lôm sa a ti; RENGPA ni Pathian khan thil sa tho nang lei pom pe a ti.

¹⁴Mi’nriang le mi’nvâi chu, nangni irchipui a ni mani, nin kho sûnga om sa nam dang a ni’n mani sinthoa nin sorin chu dengintheitir no roi;

¹⁵a sâna irhel a ni sikin a hlo kha a nikhua ngeia, misa tâk mân ngêt, nin ipêk hrang a ni. Nangni ata chiarin RENGPA kuang intungna lik a ta, tho’nsual ni palna nin ti.

¹⁶An nâi le tehai sualna sikin pahai kha thatpai hrang ni maka; pahai sualna sikin an nâi le tehai khom thatpai hrang ni mahai; ama sualna sika vaiin kha mi kha thatpai hrang a ni.

¹⁷Nin laia om sa nam dang mani, fara mani, dongtum kha hlep no roi. Meithâi puan chu bondokin la pe no roi.

¹⁸Aigupta rama nangni khom suak nin ini kha inhre mai roi; RENGPA nin Pathianin nangni a irtansuak a ni kha te; khasikin hi thu hi nangni ki ipêk a ni.

¹⁹Bu nin âtin bu mût lâk irhmâi nin neiin chu irvai nôk ta no roi; nam danghai, fara hai le meithâi hai dong sa hrang a ni; khanchu, RENGPA nin Pathian khan nin kut suak murdia sat nangni vur a ti.

²⁰Nin oliv ra, nuam dôra nin nok sil zoia khan nok thing tum nôk ta no roi; nam danghai, farahai le meithâi hai hrangin hôi pehai roi.

²¹Nin grep ra nin lâk khomin nin irhmal irhmâi kha zong nôk ta no roi, nam danghai, farahai le meithâi hai ta hrangin hôi roi.

²²Aigupta rama suak nin ini kha inhre mai roi; khasikin, hi thu hi nangni ki ipêk a ni.