Read Hrangkhol DÂN INHNINA 26 Bible Online

DÂN INHNINA 26 - Hrangkhol bible

DÂN INHNINA 26

¹RENGPA nin Pathianin ram nangni a ipêk hranga nin va tunga, nin inhnêa, om hmun nin khuar tika,

²RENGPA nin Pathianin ram nangni a pêka, nin thil thar masa tak senkhat mani sia nin ta, RENGPA nin Pathian irhming omna hranga a hmun inthangnaa khan chôi ngai roi.

³Kha khan ochai lei om kuanga khan, ‘Kin pahai kuang RENGPA ram inkung kha a vuan hin ki va lua tah ti RENGPA ni Pathian makunga kin puang e,’ a iti hrang a ni.

⁴Ochai khan bêm kha la a ta, RENGPA nin Pathian maichâm makunga khan sia a ti.

⁵RENGPA nin Pathian kuang hiang hin nin iti sa hrang a ni. ‘Ka pa chu mi chaninvâi, a ram mi a nia. Aigupta rama a zu fea, kha khan a om tâka; a sân an la tôma; khannisian, kha khan nam roiinpui tak, hrât tak le irrual tak an ni tâka.

⁶Aigupta mihai khan deng an nin theitira, dûk an nin mantir tak taka, suaka nakhrâtin an ni sora.

⁷RENGPA, kin pahai Pathian kha kin insam tâka, RENGPA khan a lei irngaituaa, deng an nin theitirzia hai, kin sinsôlzia hai dûk an nin mantirzia hai kha a hmua.

⁸RENGPA khan Aigupta ram ata kha, a bân irnak hrât hmangin, thilirkhêl le irsinsiana irkhêl tak tak a thoa, a ni hruai suak tâka,

⁹Khuaihlutui le dût tui luangna ram hi a ni ipêk tâk a ni.

¹⁰O RENGPA, ‘Ni ram ni pêka a thar masa tak chu, nang ki hong chôi pe,’ ti ni ta; RENGPA ni Pathian makunga khan sia ni ta, a makunga khan ni ikûn hrang a ni.

¹¹RENGPA nin Pathianin thil sa, nangma le ni in sûngkuahai a pêk sikin lômthu insîrin lân, nin laia om sa Levia irchihai khomin lôm takin nang changpui ri sehai.

¹²A kum thumnaa nin chîmu thar sôma inkhat chu, nin laia om Levia irchihai, nam danghai, farahai le meithâi hai pe ngai roi; khanchu, kho tina fa hrang nei seng hrang a ni.

¹³Khaanga ni tho zoi tika, ‘Thil ser, sôma inkhat kha, ki ina atûn hin inkhat lua dôn ta ma ung; thu a ni ipêk angin Levia irchi hai, nam dang hai, fara hai, meithâi hai kuang ki pêk tâk a ni; sôma inkhat pêk chungchânga ni thupêk murdi zôm loi zel nei ma unga, irnghil nei sa ma ung.

¹⁴Lusûn laiin inkhat lua nei ma unga, mithi bu hrangin inkhat lua inhlan sa ma ung; O RENGPA, ni thu zôma, sôma inkhat pêk chungchânga ni thupêk murdi kha ki tho zit a ni.

¹⁵Ni’rvân hmun irthiang ata zuang thîrin lân, ni mi Israelhai hi sat zuang vur ro. Kin irchibulhai kuang pêk ni inkung ram, khuaihlutui le dûttui luangna ram hi satvur ro,’ nin iti hrang a ni.

¹⁶A vuan hin RENGPA nin Pathian khan hi thu’nkunghai le omdân hranghai hi zôm hrangin nangni a iti a ni.

¹⁷A vuan hin RENGPA kha Pathiana nin pom tâka, a thu’nkunghai, a thupêk le omdân hrang a itihai kha zôma tho nin inkunga.

¹⁸A vuan hin RENGPA khan a inkung angin a mihai ta hrang nangni a pom tak tak tâk a ni.

¹⁹A siam, nam dang murdi nêkin nangni a roiinpuitira, an pâk irhlo nin ta, nin irhming inthang sa a ta, mi’n nangni chôiindôm an ti, a inkung ang ngeiin RENGPA nin Pathian ta hrang nam irthiang ni nin ti.