Read Hrangkhol DÂN INHNINA 27 Bible Online

DÂN INHNINA 27 - Hrangkhol bible

DÂN INHNINA 27

¹Mosia khan Israel ulianhai le mihai kuang, ‘A vuana thupêk nangni ki ihril murdi hi zôm zit ngai roi.

²Jordan dung nin irkâna, RENGPA nin Pathianin ram nangni a ipêk nin va lût tika chu lungphêk lian tak tak phun roi; chinaiin inmâi innâm unglân;

³kha khan, hi dân murdi hi irziak ngai roi. RENGPA nin Pathianin nangni pêk a inkung, khuaihlutui le dûttui luangna ram kha lua nin ta,

⁴Jordan râla nin om tika a vuana nangni ki ihril ang hin Ebal tânga lung inthum phun unglân, chinaiin inmâi innâm roi.

⁵Thîra incher loi lungin maichâm siam roi.

⁶RENGPA nin Pathian ta hranga maichâm nin siam rêng rêngin lung sinsiam loi hmang hrang a ni; kha ngeia khan hâlirvôm thilinhlan kha nin ihâl hrang a ni,

⁷irngeina thil inhlanhaiin irbôl nin ta, kha khan fa nin ta, RENGPA nin Pathian makunga khan raifân takin nin iom hrang a ni.

⁸Lung phuna khan hi Dân thuhai hi nin irziak hrang a ni.

⁹Mosia khan Levia irchi ochaihai le Israel mi murdi kuang, ‘O Israelhaio, nin beng do unglân, ki thu hi irngai u ta. A vuan hin nin Pathian RENGPA mihai nin ni tâk a ni.

¹⁰A thu zôm unglân, a thu’nkung a vuana nangni ki ihril murdi hi zôm roi,’ a tia.

¹¹Mosia khan Israelhai kha thu a pêka;

¹²Jordan dung nin irkâna, mipui ta hrang satvurna hril tika hi nam Simona hai, Levi chihai, Juda hai, Isakara hai le Benjamina hai hi Gerizim tânga ngîr an ta;

¹³khosâl inpuang suak tika hi nam Reubena hai, Gada hai, Asera hai, Zebulun hai, Dan hai le Naftalia hai hi Ebal tânga an ngîr hrang a ni.

¹⁴Hi thu hi Levia irchihai khan inring takin an insîr hrang a ni.

¹⁵‘Kut theithiam suak RENGPA ikhôkmâk lung, thing, thîr inrûka biak mani chu khosâl tongin om ri se,’ ti an ti. Mipui murdi’n, ‘Amen’ tiin hong sâm an ti.

¹⁶‘A nu mani, a pa mani, inzâ loi chu khosâl tong ri se,’ ti an ta, Mipui murdi’n chu ‘Amen’ tiin lei sâm an ti.

¹⁷‘Kôl bômhai ramri lung sontu chu khosâl tong ri se,’ ti an ta, Mipui murdi’n chu ‘Amen’ tiin lei sâm an ti.

¹⁸‘Lampui ni loia mitcho infetirtu chu khosâl tong ri se,’ ti an ta, Mipui murdi’n ‘Amen’ lei ti an ti.

¹⁹‘Nam danghai, farahai le meithâihai ata theibîk uar chu khosâl tong ri se,’ ti an ta, Mipui murdi khan, ‘Amen’ tiin lei sâm an ti.

²⁰‘Mâni pa dôngma laia mi lei zâlpuia, pahai mualinphoitirtu chu khosâl tong ri se,’ ti an ta, Mipui murdi khan, ‘Amen’ tiin lei sâm an ti.

²¹‘Sa siatpui chu khosâl tong ri se,’ ti an ta, Mipui murdi khan, ‘Amen’ tiin lei sâm an ti.

²²‘Nu dang pa dang khom ni ri se, mâni farnu siatpuitu chu khosâl tong ri se,’ ti an ta, Mipui murdi’n ‘Amen’ tiin lei sâm an ti.

²³‘Mâni tarpi siatpuitu chu khosâl tong ri se,’ ti an ta, Mipui murdi’n ‘Amen’ tiin lei sâm an ti.

²⁴‘Inrûka mi thattu khan khosâl tong ri se,’ ti an ta, Mipui murdi’n ‘Amen’ tiin lei sâm an ti.

²⁵‘Poi tholoi that hranga thamna lâktu kha khosâl tong ri se,’ ti an ta, Mipui murdi’n, ‘Amen’ tiin lei sâm an ti.

²⁶‘Hi dânhai hi pom nuam loia, zôm nuam loitu chu khosâl tong ri se,’ ti an ta, Mipui murdi’n, ‘Amen’ tiin lei sâm an ti.