Read Hrangkhol DÂN INHNINA 28 Bible Online

DÂN INHNINA 28 - Hrangkhol bible

DÂN INHNINA 28

¹RENGPA nin Pathian thu hi nin zôma, a thupêk a vuana nangni ki ihril murdi hi nin zôm thapin chu rammuala nam dang murdihai nêka nangni a isiam roiinpui a ni.

²RENGPA nin Pathian thu kha zôm phot unglân, hi satvurna murdi hi dong nin ta, dong sa pat nin ti.

³In sûng tiang le ram tiang khom Pathianin sat nangni vur a ti.

⁴Nâi tuanintung nei nin ta, nin bu le bâl nangni inlâptir a ta, nin sâ vâihai Pathianin sat nangni vur pe a ti.

⁵Nin bêm hai, nin bu khêng hai, Pathianin sat nangni vur a ti.

⁶Nin thiltho tinrênga nangni irhniangtir a ti.

⁷Nin râlhai leh nin irdoiin RENGPA khan nangni inhrâttir a ta; lam khat tiang hongin nangni hong doi an ta, kil tin panin rot an ta, indarh an ti.

⁸RENGPA nin Pathian khan nin kut tôn murdi sat nangni vur a ta, nin fasiar insiptir a ta, RENGPA nin Pathianin ram nangni a ipêk kha nangni inlâptir pe a ti.

⁹RENGPA nin Pathian thu hi nin zôma, a thupêkhai nin zôm ta takin chu a inkung angin ama dongtum, a mi irthiang ta hrangin nangni nei a ti.

¹⁰Rammuala mi murdi’n RENGPA mi’nthanghai nin nih ti inhriat an ta, nangni chi an ti.

¹¹Nin pahai kuanga pêk a inkung rama RENGPA khan nâihai, sâhai, bu le bâl hai nangni in neitir nghek a ti.

¹²RENGPA khan a’rchon kok ata a zoro taka rua zuang inthotir a ta, nam tin nin thil sat nangni vur a ta, nam tin nin thilhai nei inpûktir nin ta, an thil chu nin ipûk nang no ni.

¹³A vuana thu nangni ki ihril hi, a thupêkhai hi ngûk taka nin zôma, pathian danghai irzûlin a vuana thu nangni ki ihril hi chang tiang mani, vei tiang mani nin pêtsan noa, an sin nin tho ual no’n chu RENGPA nin Pathian khan nam tin luah nangni siam a ta, an ikaihruai vai ni no chin nia, a’rhnuai uala ni loiin a chung uala hong ni mai nin ti.

¹⁴

¹⁵RENGPA nin Pathian thu nin zôm noa, a thupêkhai le a thu’nkunghai, a vuana nangni ki ihril hi nin zôm nuam noa, nin tho nuam ual no’n chu hi thil saloi hi nin chunga tung a ti.

¹⁶In sûng tiang le ram tiang siatna tong nin ti.

¹⁷RENGPA khan nin bêm le nin bu khêng nangni irletpai pe a ti.

¹⁸RENGPA khan khua nangni sâl a ta, nâi le têa mani, bu le bâla mani, sâ vâia mani hmang chang no chin ni.

¹⁹Nin thil thôna kipa hlosam nin ti.

²⁰Nin thil tho a sual sik le RENGPA kha nin rotsan sikin khua nangni sâl a ta, nin kuttôn rêng rêng hmang chang no nia, a sân chardongna om a ti, sôlin siatpui ni ti.

²¹Nin ram lua hranga khan vânduaina inzen nangni’n tong nin ta, dam hring suak tûte om no chin ni.

²²RENGPA’N hri nangni irveitir a ta, inkhurpuihai irvei nin ta, invûng sa nin ti. Khua kang a ta, nin chîmuhai inchârtir a ta, thi chianna nin ti.

²³Rua rêng rêng tho no nia, nin loihai kha thîr angin châr a ti.

²⁴Nin loia pildi le vâiphin inthotir a ta, zuang insiat zit a ti.

²⁵RENGPA khan nin râlhai kha inhnêtu ualin nangni inchangtir a ta, lam inkhata fe’n doi nin ta, kil tin panin rot nin ta, indarh nin ti. Rammuala mi murdi’n nin chunga thil tung kha a’rkhêl ti an ti.

²⁶Nin thi tika nin hme kha va le ramsahaiin hong fa an ta, tûte lei khôkmâktu om no nihai.

²⁷Aigupta-hai irvei ang sakhuai hai, ni takpum hong kikin a’rthî suakhai, pân hringhai, uithak hai RENGPA khan nangni irveitir a ti.

²⁸RENGPA khan nangni invêttir a ta, nin mit cho a ta, a sân nangni inkamangtir a ti.

²⁹Mitcho angin sûn khovâra khom zân inthim angin thil inmai inmai nin ta; nin lampui chaninvâi a ta, a sân nangni irchêp pe a ta; nangni long kochok an ta, changpuitu zel man no chin ni.

³⁰Dôngma hual nin ta, mi’n nangni neipai pe an ti, in sin nin ta, lua no chin ni; grep irhuan siam nin ta, a ra fa no chin ni.

³¹Nin sehrâtchal kha that an ta, a hme khom fa no chin ni; nin hmu zoro laia ngêt nin sakuartung kha nangni lapai pe an ta, tûte’n nangni san no nihai.

³²Nin nâinuhai nin nâipahai kha nin hmu laiin nam dang suaka pe an ta; a nitin anni irngaiin, thîr nin ta, nin mit chavai zoi a ti.

³³Sôl taka nin itho suak kha nin inhriat ngai loi nam dangin nangni hong lapai pe an ta; kha nin dengintheina le opbêna no chu ite hlo no chin ni.

³⁴Nin thil hmuhai chu invêtpui nin ti.

³⁵RENGPA khan nin kea pân dam thei loi nangni irveitir a ta kezapha ata lu sîp dênin sakhuai irvei nin ti.

³⁶RENGPA khan, nin rênghai le nam dang ram, nin pi le puhai la om ngai loina rama khan suaka nangni hruai a ta; kha rama khan thing le lunga siam pathianhai biak nin ti.

³⁷RENGPA nangni indartirna rama khan a hmu ka kai khan nin chunga thil tung kha a’rkhêl ti an ta, nangni hnuaisia an ta, nuiza siamna’n nangni hmang an ti.

³⁸Chîmu song nghek nin ta, tômte vai man nin ti; khâiin nangni fapai pe an ti.

³⁹Grep irhuan siam nin ta, irvotir nin ta, khannisian uain mani, a ra irhmal hrang mani, hmu no chin ni, irnge zoi a ti.

⁴⁰Nin ram pumpuia oliv thing om mur khomsian, a hriak irthu hrang khom nei no chin ni, zungpai zoi a ti.

⁴¹Nâinu nâipa a sân nei intam nin ta, an irtha fa no chin ni, suaka om zit an ti.

⁴²Nin thei kung le chîmu danghai chu khâiin fapai zit an ti.

⁴³Nin laia nam dang omhai kha inlal tîr tîr an ta, nangni dongtum rêk chu hong tôm sit sit a ti.

⁴⁴Tangka nangni inpûktir an ta, nangni’n chu inpûktir hrang tangka nei no chin ni. A tôpa chu nin puhai la ni an ti.

⁴⁵RENGPA nin Pathian thu nin zôm noa, a thupêk le a thu’nkung nangni an ihril kha zôm mak chêia, nin tho nuam no sikin hi thil saloi murdi hin nangni de a ta, tuang thiai nin ti.

⁴⁶Nin chunga le nin nâihai chunga Pathian a milung chuk mah ti nin inhriat theina irsinsiana hrang a ni;

⁴⁷satvurna tinrêngin nangni vur a ta, raifân le lôm taka RENGPA nin Pathian sin kha nin itho hrang a ni.

⁴⁸Phîngchâm le tuiinhrâlin, korongboi le itinrêng irsamin RENGPA itîr, nin râlhai sin tho nin ta, nin sôlneng hnungin nin ringa thîr ringkol nangni inkoltir an ti.

⁴⁹An chong khom nin inhriat ngai loi, mi nunrông tak tak, kôlkung ata RENGPA khan hong indoitir a ta, irmu angin nangni zuang inbo thut an ti.

⁵⁰Nâipang khom, tar khom, tûte zel lunginkham no ni.

⁵¹Nin sâhai, nin chîmuhai fa zoi an ta, phîngchâmin thi nin ti; nin bu hai, nin uain hai nin oliv hriakhai, nin sâhai hôi no nihai; phîngchâmin thi nin ti.

⁵²RENGPA nin Pathianin nangni a ipêk hrang rama nin lêngna khua murdi doi an ta, nin kul irsângtak tak, det nin ititak takhai kha inchimtir zit an ti.

⁵³Nin râlhaiin nin kulhai an irhualin chu nin phîngchâm ta hraiin, RENGPA nin Pathianin nangni a ipêk nin nâihai hme fa nin ti.

⁵⁴Mi sa le mi irchong tak ngai, ite inret nei ngai loi khan a urêngpa mani, a dôngma nei lai mani, a nâi la dam sunhai mani khom fa hranga khan irlôk nuam an ti.

⁵⁵Râlhaiin nin khua an hual sôttak tak sikin fa hrang an inei loi kamangin a nâihai hme khom fa an ta, mi dang pe nuam no nihai.

⁵⁶Irchongnu, irnêng khom sir ngai loi, inthîk tak tak ngaihai khomin an pasalhai, an nâinu nâipahai lôm an ta,

⁵⁷râlhaiin an hual insôt sikin ite fa hrang om ta no nia, a phîngchâm kamangin an nei leh ansûl kha inrûkin fa an ti.

⁵⁸Hi lekhabua irziak Dan thu chuang murdi hi kuluk taka zôm loia, tho nuam mak chêia, RENGPA irhming roiinpui tak le ichiom tak hi nin chôiindôm nuam no’n chu,

⁵⁹nin irchihai leh indam thei loi hri nangni irveitir a ta, hong phûl mur mur nin ti.

⁶⁰Aigupta rama an ihmu kha nangni irveitir a ta, hring dam suak ta no chin ni.

⁶¹Hi dân lekhabua chuang loi, natna chi dang dang RENGPA khan nangni irveitir sa a ti.

⁶²RENGPA nin Pathian thu nin zôm no’n chu irvâna ârsi dôrin tam khom unglân, hring dam suak om vi viat nin ti.

⁶³RENGPA khan thil sa nangni tho pe le nangni inpung pe a’rzuk ngai; khaang dênin nangni insiata, nangni that a irzuk hrang a ni. Nin ilua hrang ram ata hi nangni a ilâk suak hrang a ni.

⁶⁴RENGPA khan rammual pumpuia, nam tin laia nangni indartir a ta; kha khan thinga siam le lunga siam pathianhai chubai nin mûka, nin pi le puhai khomin an ibiak ngai loihai kha nin ibiak hrang a ni.

⁶⁵Khoa khom lungthi taka om chi chianna hmun nei no chin ni. RENGPA khan nangni inkamangtir hen a ta, nin beidongin nin sabei dong zit a ti.

⁶⁶Thi chi pu pumin om nin ta, a sûn a zânin chardong takin om nin ta, nin ihring dam suak hrang mo, suak loi hrang khom inhre no chin ni.

⁶⁷Nin thil chi le nin mita ichiom nin ihmuhai sikin zînga, ‘Khohloi ni ri seh ti nin ta, zâna chu khuavâr ta sian,’ ti nin ti.

⁶⁸RENGPA khan Aigupta rama irkuangin nangni tôl thâk a ta, nin ichum nôk hrang ni mah ti a ta; khannisian chum nin ta, nin râlhai la hrangin suakpa mani, suaknu hrang mani, zuar nin ta, khannisian, tûte’n nangni la nuam no nihai.