Read Hrangkhol DÂN INHNINA 29 Bible Online

DÂN INHNINA 29 - Hrangkhol bible

DÂN INHNINA 29

¹RENGPA khan Mosia kuang Israelhai le Moab rama hianga thuthung hrang hin a hrila; Horeb tânga a thuthung belsana a ni.

²Mosia khan Israel mi murdi kha a koikhômhaia, an kuang, “Nin mit ngeiin Aigupta rêng Faroa le a milianhai le an ram sûnga RENGPA thiltho kha nin hmua.

³Hri ichiomtak takhai, thil irkhêltak takhai le thil roiinpuitak tak a ithohai kha nin hmua.

⁴A vuan ten nin thil hmuhai kha a’rngaina lam chang inhre mak chêia, a omzia tak lan hre mak chêi.

⁵Kum sômminli sûng RENGPA khan ramchâra nangni a chaninvâitira; khannisian nin songkolhai le nin kekokhai kha milui ual ma.

⁶Bu pangai nêk hrang nei mak chêia, uain le zu in hrang khom nei mak chêia; khannisian, RENGPA khan fâk hrang nangni a tum pea, RENGPA hi nin Pathian a nih ti nin irchu theina hrangin.

⁷Hi hmun nin hong tung khan Hesbon rêng Sihona le Basan rêng Oga khan a ni lei doia, kin inhnêa;

⁸an ram khom kin neipai pehaia; Reubena irchi hai, Gada irchihai le Manasea irchi chimriphai kha an dongtuma kin pêkhaia.

⁹Khasikin hi thuthung thuhai hi zôm unglân, nin thiltho kipa nin irhniang theina hrangin tho roi.

¹⁰A vuan hin RENGPA nin Pathian makunga nin ingîr a ni hi, nin hruaituhai, nin upa hai, nin pasal hai,

¹¹nin nupanghai, nin nâihai, nin laia om sa nam dang hai, thing pêla tui nangni chôi petuhai leh nin rêngin a makunga nin ingîr a ni hi.

¹²A vuan hin RENGPA nin Pathian khan thu nangni an kungpui hrang a ni.

¹³Khanchu, Abrahama, Isaka, Jakoba hai kuang thu a inkung angin a mihai hong ni indet nin ta, nin Pathian ni sa a ti.

¹⁴Nangni leh vai, hi thuthung hi a isiam ni ma.

¹⁵A vuana hitaka ngîr sahai vai ni loiin ei irchi la suak loihai ten hrangin thuthung thu hi a inkung a ni.

¹⁶Aigupta rama kin om laia kin innun dân kha nin inhriat, kin hong suakna lama nam dang lei omhai lei omdân nin inhriat;

¹⁷thing tum hai, lung tum hai, tangkarua le rângachaka siam millim intiromtak takhai an biaka,

¹⁸pasal khom, nupang khom, sûngkua mani, nam pumpui mani khom, RENGPA ei Pathian irheisanin hi nam dang pathianhai hi biak likna chin ni, nin thil irzum inchor, tûr khatak paia irson liantak ang hi ni nin ti.

¹⁹A vuana thu ir-up tak tak ei irngai tâk hi nin laia mi, irngaitu’n chu, ‘Tukullian taka mâni nuam ang anga om khom poi no ni’ ti lungrîl no ri sehai; khasika khan mi sual mani mi sa mani irhmangna nin ti.

²⁰Khaang mi kha chu RENGPA’N ngaidam no nia, a chunga RENGPA ninginmur kha suakna a ti. Hi lekhabua thil saloi murdi hin hong tong a ta, RENGPA khan inboipai zit a ti.

²¹RENGPA dân bu thuthung irziaknaa khosâl tong hrang chuang murdi, siatna kha a chunga intungtir a ti.

²²Sôttak hnunga chu, nin irchihai le nam danghai, ram hlatak taka omhai khan nin rama siatna le tuangna RENGPA intungtir chu hmu an ti;

²³nin loihai chu ram chôp, kât le chi tamna ram ni a ta, ite phun thei ni no ni, hloisûl ten khom mông thei no ni. Nin ram chu Sodom le Gomora hai, Adma le Zeboim, RENGPA ningmur irkhêl tak sika a insiat tâk khuahai ang kha ni a ti.

²⁴Rammuala mi murdi’n, ‘RENGPA hin ithoa mo hi ram hi, hiang taka soisak mo a ini? Imo khaang dôra a ninginmur nasan?’ ti sup sup an ti.

²⁵Hiang hin sâm an ti: ‘An irchihai pathian khan Aigupta ram ata a zu hruai suak lai khan thuthung a siampuihaia, RENGPA mihai khan kha kha an tho’nchâia;

²⁶matona an la ibiak ngai loi nam dang pathian, RENGPA’N biak a ikhaphai kha an biak tâka;

²⁷khasikin, RENGPA’N kha a mihai chunga a ninginmur kha, hi lekhabua irziak murdi siatnahai hi an rama a intungtir tâk a ni.

²⁸RENGPA kha a sân a ninginmur sikin an hnotsuakhaia, nam dang ram dang daiha an iom tâk a ni,’ ti an ti.

²⁹RENGPA ei Pathian hin thu’rthup senkhat kha inpuanga, ei irchihai le kha kha ei izôm hrang a ni.