Read Hrangkhol DÂN INHNINA 3 Bible Online

DÂN INHNINA 3 - Hrangkhol bible

DÂN INHNINA 3

¹Hmâr tiang panin Basan ram kin tunga, Edrei kho kôla an rêng Oga khan a mi murdi leh an ni lei doia.

²RENGPA khan, ‘Ngîk no ro, a mihai le a ram hi, ama le ile nang ki pêk ta. Amor rêng Sihona, Hesbon kho rêng ni isoisak ang dên khan soisak ro’ a ni tia.

³Khanchu, RENGPA kin Pathianin Basan rêng Oga kha a mihai leh a ni pêka, inkhat lua hôi loiin kin that zithaia.

⁴Argob bial, Basan rêng Oga ram sûnga om khopui murdi kha kin lâka, kho sômruk zel a ni, a khua lâkpai pe loi zel om mah.

⁵Hi khuahai hin kul bang irsâng tak tak, inkhâr le a kalna satak tak a om zita, an kôlvêl khuahai khom kin lâk zit a ni.

⁶Hesbon rêng Sihona kin soisak ang dên khan an khuahai kha kin insiat zita, nupang pasal, nâipanghai ten khom kin that zit a ni.

⁷An sâhai le an thil neihai rêk chu râllâk suma kin lâk zit thiai a ni.

⁸Hi Amor rêng inhni ram, Jordan dung sak tianga mi hi Arnon dung ata Hermon tâng dênin kin irchupuia.

⁹Hermon hi Sidon-hai khan Sirion an tia, Amor-hai rêk chu Senir an ti

¹⁰Basan rêng Oga ram murdi kha kin irchupui zit a ni, tâng sîp zôla khuahai, Gilead biala omhai kha Basan bial pumpui Saleka le Edrei dênin kin dong tâk a ni.

¹¹Refa-hai laia la dam sun chu Basan rêng Oga hi a ni; irngai ta, a’rkuang kha lung irkuang a nia, mûk pangai mûk kuaka sei, mûk minlia irzat a ni: atûn ten Amon-hai khua Raba-ah a la om.

¹²Hi ram kin lâk hnung hin Reubena le Gada irchihai kuang Arnon dung irhôr chung tânga Aroer khua sim tiang ram kha Gilead tâng ram chimrip leh kin pêka.

¹³Gilead ram la om le Basan ram kha Manasea irchi chimrip kuang kin pêk saa. Basan ram pumpui hi Refa-hai ram ti a ni ngai.

¹⁴Manasea irchi Jaira khan Argob bial, Basan ram hi, Gesur-hai le Maakahai ramri dênin a lâka; khuahai kha a’rhming kopin irhming thar a phuaa, Harot-Jair atûn ten an la ti a ni.

¹⁵Gilead ram kha Makira, Manasea nâi ki pêka.

¹⁶Reubena le Gada irchihai kha Gilead le Arnon dung kâr ram hi ki pêka. Sim tiang an ramri kha Arnon dung inlai tak a nia, hmâr tiang khan Jabok dung a ni, Amon-hai leh an ri chu.

¹⁷Kho thang tiang ri khi Jordan dung hi a nia, Galili dîl ata Tuipui Thi, Pisga tâng kôl ten a dêna.

¹⁸Kha lai khan thu nangni ki pêka, ‘RENGPA nin Pathianin hi ram hi ramchâr hrangin nangni a ipêk a ni, nin laia hriamhrei chôi thei ten kha nin urêng Israel pâl makunga Jordan dung nin hong ikâi masa hrang a ni.

¹⁹Sa a sân nin neia, nin sâhai, nin dôngma le nâi le tehai hi chu, hi nangni ki ipêk khuahai hin lei om an ta,

²⁰nangni ang dêna nin urênghai hin Jordan thang tiang ram RENGPA pêk hranga lungngam taka an om sa thei mâka chu, nin urênghai hi, nin ichangpui hrang a ni. Kha zoi tika chu nangni ki ipêk hrang nin rama hin kîr thei nin ti.

²¹Josua kuang khom ki hrila, nin mit ngeiin rêng inhni chunga RENGPA khan a isoisak hrang a ni.

²²Anni kha ngîkhai no unglân, RENGPA nin Pathian khan nangni doipui thiai a ti.

²³Kha zoro lai khan RENGPA kuang, ‘O RENGPA Pathian, ni siahlo hi ni roiinpuizia le ni sinthotheizia ni inentir phing a la ni.

²⁴Irnênga le irvâna, hi thil roiinpui ni itho ang tho thei hi pathian dang zel om mahai.

²⁵O RENGPA, Jordan dung fe kâiin ram satak, tâng ram satak tak, Lebanon tânghai kha, lungkham takin nin hmutir sa ta,’ tiin ki ngêna.

²⁶Nangni sikin RENGPA kha ki chunga ning an murtira, ki thu chu irngai nuam maka, RENGPA khan, ‘a ruk ta, hril khom hril ta no roh.

²⁷Pisga tâng sîpa kâiin lân, kho thang tiang hai, hmâr tiang hai, sim tiang hai, nisua tianghai thîr vêl ro; ni mit khan enin lân, a sir chu ni isir loi hrang a ni, Jordan dung kâi no chi ni.

²⁸Josua kha a itum inthûktir hrangin inthor ual ualin lân, ni ihmu rama hin, hi mihai hi hruai a ta, a in luatir hrang a ni, a tia.

²⁹Khanchu, Bethpeor kho dep rama khan kin om tâka.