Read Hrangkhol DÂN INHNINA 30 Bible Online

DÂN INHNINA 30 - Hrangkhol bible

DÂN INHNINA 30

¹Satvurna dong mo nin inuam khosâl tongna, nin inthang hrangin nangni ki siam pe a ni. RENGPA khan nin chunga hi thil saloihai hi an tungtira, nangni a inhnotsuakna nam dang rama nin om tika nuam inthang thei nin nih ti kha inhre mai roi.

²Nin irchihai leh RENGPA tiang nin hong irhei nôk nuama, a vuana nangni ki ihril, a thupêkhai hi a satêna zôm nin nuamin chu,

³RENGPA nin Pathian khan nin chunga satna nei nôk a ta, nam dang dang laia nangni a indartirna ram ata nangni hong hruai kîr nôk a ta, nangni irhniangtir nôk a ti.

⁴Rammual ram hlataka fe pat khom unglân, RENGPA nin Pathian khan nangni hruai khôm nôk a ta, nangni hruai kîr nôk a ti;

⁵Khanchu, nin pi le puhai omna ngai ram kha dong nôk nin ta, nin irchibulhai nêk khan hong tam nin ta, hong irchong nôk ual sa nin ti.

⁶RENGPA nin Pathian khan nin irchihai leh thu zôm theina milung nangni pe a ta; khanchu, ama kha a sân lungthung nin ta, kha rama khan nin iom mai thei hrang a ni.

⁷Hi khuasâl murdi hi nin râl, nangni khôkmâktu le dengintheitirtuhai hi nangni indongtir a ta;

⁸a thu zôm ta nin ta, a vuana thu nangni ki ipêk murdi hi zôm ta nin ti.

⁹RENGPA khan nin thil thôna kipa hlo nangni inchuktir a ta, nâi le te nei intam nin ta, nin sâ vâihai pung tûr tûr a ta, nin loihai kha inlâp tak tak a ti. Nin pi le puhai irhniangtir, a irzuk angin nangni khom nangni irhniangtir irzuk a ti.

¹⁰A thu rêk chu nin izôm khak hrang a ni, a dân bua chuang thu’nkung le thupêk murdi kha nin izôm zit hrang a ni. Thudik takin ama tiang nin irhei hrang a ni.

¹¹A vuana thu nangni ki ipêk hi nin ta hrangin zôm intak ta hrai ni no nia, inhriat phâk loi hrang ni ual hliak ma.

¹²‘A thu ei inhriata, ei zôm hrangin tu mo irvâna hong kâia ni zuang lâk pe hrang?’ tho hrangin irvâna om pat ni ma.

¹³‘Ei inhriata ei zôm hrangin tu mo tuikhanglian râla fea ni hong lâk pe hrang?’ ti hranga tuikhanglian râl daiha om ni ual hliak ma.

¹⁴Hi hin, ni kôla hin a om mai hi te, nin hriat tâka, an sîr khom nin sîr nin sîr mai kha te; zôm chian ro.

¹⁵A vuan hin imo nin thang nuam, thil sa mo, saloi, hring mo, thi, inthang ro.

¹⁶RENGPA nin Pathian thupêk a vuana nangni ki ihril hi nin zôma, ama kha lung nin thunga, a thu nin irngaia, a dânhai nin zômin chu irhniang nin ta, nam roiinpui tak hong ni nin ti.

¹⁷A thu nin zôm nuam noa, nin irngai nuam noa, pathian danghai nin biak likin chu,

¹⁸nangni ki hril infel, irhmang ngêt nin ta; Jordan râl, nin ilua hrang rama khan dam insôt no chin ni.

¹⁹A vuan hin inthang roi, hringna mo nin nuam thina, Pathian satvurna dong mo khosâl tongna, a kho tak mo nin inthang thu’nhretua irnêng le irvân ki ikoi a ni. Nangni le nin irchihai an dam mai theina hrangin hringna inthang roi.

²⁰RENGPA nin Pathian kha lungthung unglân, a thu zôm unglân, ama kha chel khak roi; khanchu, nin irchibul Abrahama, Isaka, Jakoba hai kuanga pêk a inkung rama khan nin irchihai le dam insôt nin ti,’ a tia.