Read Hrangkhol DÂN INHNINA 31 Bible Online

DÂN INHNINA 31 - Hrangkhol bible

DÂN INHNINA 31

¹Mosia khan Israel mihai kuang thu an sîr thiaia;

²“Kum irzakhat sômhnia ulian ki ni tâka, nuam nuama suak lik thei khom ni ta ma ung; RENGPA khan ‘Jordan kâi thei no chi ni,’ a ni tia.

³RENGPA nin Pathian khan nin maton hruai mai a ta, khataka nam omhai kha nangni thatpai pe a ti; nin iluapai pehai hrang a ni; RENGPA insîr tâk angin Josua hin nangni hruai a ti.

⁴RENGPA khan Amor-hai rêng Sihona hai le Oga ramhai a soisaka, an mihai a that zit ang khan anni khom soisak a ti.

⁵RENGPA khan anni kha nangni pe a ta, thu nangni ki ipêk ang takin nin isoisak hrang a ni.

⁶Milung inngar unglân, pût si sit roi; ama, RENGPA nin Pathian ngei khan nangni fepui thiai a ta, nangni inthâpaiin nangni rotsan ual no ni,” a tia.

⁷Josua kha Mosia’n a koia, Israel mi murdi inhriata, ‘Ni milung inngarin lân, a sân chang ngit ro, an pahai kuanga pêk RENGPA inkung rama khan Israel mihai hi hruai inlût ni ta, ni inluatirhai hrang a ni.

⁸Ama ngei, RENGPA khan, nangni intha no nia, chi no unglân, kamang no roi,’ a tia.

⁹Mosia khan hi Pathian Dân hi lekhabua a irziak, Levia irchi, Thuthung Bôm irzôntu ochaihai kha pe a ti, Israel ulianhai khom a pêka,

¹⁰Mosia khan an kuang, ‘Kum sari mong ten, lâkai intâng ngaidam zoro inkung kuma kairêng kût laiin,

¹¹RENGPA nin Pathian hmun inkunga Israelhai kha a makunga an hong inlang hrang a ni.

¹²Mipui bukkhôm unglân, RENGPA nin Pathian chitna châng an inhriata, ki dân bua thu chuang murdi hi an zôm theina hrangin, pahai, nuhai, nâipang hai le nam dang nin khuaa omhai khan irngai ri sehai.

¹³Khaang khan RENGPA nin Pathian dân lan hre ngai loi, nin irchihai khomin, inhriat an ta, Jordan dung irkâna nin ilua hrang rama nin om sûng chu RENGPA nin Pathian a chitna lam an inhriat hrang a ni,’ a tia.

¹⁴RENGPA khan Mosia kuang, ‘Dam insôt ta no chi ni; Josua koiin lân, nin biakna buka puan ina hong hruai ro, a tho hrang lei hril ki ti,’ a tia. Mosia le Josua kha irtongna puan ina khan an fea, an va irhlan tâk a ni.

¹⁵RENGPA kha Irtongna puan ina khan sûm indingin hong inlang a ta, puan in mikota khan sûm kha an ding nguta.

¹⁶RENGPA khan Mosia kuang, ‘Irngai ta, ni pi le puhai kuang zâl lat hrang ni ni ta; hi mihai hin ni thi tika chu ni uiresan an ta, thu ki irthungpuihai kha tho’nchâi an ta, ni rotsan an ta; an va lêngna hranga lei om nam danghai pathian kha ni biaksan an ti.

¹⁷An chunga ki ninginmur a ta, rotsanhai ki ta, siat zit an ti. thil saloi tak tong an ta; kei an Pathianin ki ompui ta no sikin hi thil hi an ituang a nih ti inhria an ti.

¹⁸Thil saloi tak an thoa, Pathian dang an biak tâk sikin anni ata ki hmêl ki ithup pat hrang a ni.

¹⁹‘Khasikin, hi hla hi irziak suakin lân, Israel mihai kha irchutir ro; an chunga ki milung hoiloizia an inhriatna hrang ni a ti.

²⁰An irchibulhai kuanga pêk ki inkung, khuaihlutui le dûttui luangna rama khan nangni hruai intung ngêt ki ti. Nuam dôr fâk hrang nei mai an ta, mar lu lul an ta, pathian danghai tiang irheiin chubai mûk ual ta an ta; ni hnuaisia’n ki thuthunghai kha tho’nchâi an ti.

²¹Thil irkhêltak takin a dehai hnunga khom hi hla hi an nâihai khomin lan sîr thei mai an ta, an sualzia inhriattir a ti. Atûn ata hi, pêk ki inkung rama ki hruai intung mâka khom hin an lungrîl irput dân kha kin hriat mai kha te,’ a tia.

²²Kha nikhua ngeia khan Mosia khan hla kha a’rziak suaka, Israelhai kha a’rchutir ngut ngut tâka.

²³RENGPA khan Nuna nâipa Josua kuang, ‘Milung inngarin lân, a sân irnak song ro, Israel mihai hi pêk ki inkungna rama khan hruaihai ro, nang ompui mai ki ti,’ a tia.

²⁴Mosia khan Pathian Dân kha lekhabua irkip takin a’rziaka.

²⁵A’rziak zoi tika chu RENGPA Thuthung Bôm irzôntu Levia irchihai kha a pêkhaia.

²⁶‘Hi Dân bu hi la unglân, RENGPA nin Pathian Thuthung Bôm kôla se roi, nin omdân irkhinaa a ikop hrang a ni.

²⁷Nin ihnangzia le nin tukullianzia kin hriat, kei ki la dam lai ngêta khom RENGPA chunga nin nuara, ki thi tena len vâng chu i ang takin mo nin iom hrang.

²⁸Nin ulianhai le nin hruaituhai kha hong pungkhômhai sian hihai hi lei hril ki ti; irnêng le irvâna ki thu inhretu hrangin nangni ki ikoi a ni.

²⁹Ki thi hnunga chu a sân siat zoi nin ta, ki thu nangni irchutir kha zôm nuam no chin ni. Inhnung tena len vâng chu RENGPA ikhap kha tho si sit nin ta, a ninginmurtir nin ta, irhmangna nin ti,’ a tia.

³⁰Mosia khan hi hla hi a hril suaka, Israel mi murdi’n an irngai mur tâka.