Read Hrangkhol DÂN INHNINA 32 Bible Online

DÂN INHNINA 32 - Hrangkhol bible

DÂN INHNINA 32

¹Irnêng le irvânhaio, ki thu hi nin mikuar sung unglân, ki thu hi irngaitua roi.

²Ki’rchutirna hi rua angin tho a ta, ki thu hi irdo angin tâ a ti. Hloisûl irnoi chunga rua ang le sûlhnâ chunga rua tui angin:

³RENGPA irhming kha inpuang ki ta, Kin Pathian kha chôiindôm roi.

⁴Itinrêng sataka thotu, lungpui a ni, Dik takin roi a rêl ngai, Pathian iamom le dik, thil sa le dik tho ngaitu a ni.

⁵Pualoina a inei ma ni? Nei make, A nâihai kha kêng dem om chu, Irlo beng ngarhai le ihnanghai kha.

⁶Mi’nvêt le mi hnanghaio, hiang hin mo RENGPA nin Pathian kha nin ithuan hrang? Nangni neitu nin pa a ni, nangni a siama, nangni a inpuihlingtir a ni.

⁷Tianlai kha ngaitua suak u ta, Zoro liam pat tâkhai kha, i thil mo tung nin pahai irdon unglân, tianlai rêng thurchi nin ulianhai insîrtir u ta.

⁸An chungtaka namhai ram a sema, Mihai omna hrang an kung pe lai khan, Pathian nâihai phâkin an ramri a khang pehaia.

⁹RENGPA khan a dongtum hrangin Jakoba irchihai a inthang a ni.

¹⁰Ramchâra an chaninvâi a hmua, ram chôp phâivo saloi thônaa khan, a’rhlikhûa, a sân nangni an dota, a mit lailên angin nangni a enkola.

¹¹Irmupuiin a têhai vuang a irchuhai angin, A mitha pharhai chunga inrîm hrang ite boiin a siahai ngaia; khaangin, RENGPA’N Israelhai kha an tûkna hrang ata a hrunghai ngai.

¹²RENGPA vai kha an hruaitu a ni, nam dang pathian kop sa mahai.

¹³Tâng rama an chuang suaktira, rama thil mônghai kha an fâka, lung hmuna khom an oliv a ra mer mura.

¹⁴Dûttui an nei intama, an sehrâthai le kêlhai khan an belrahai lak an thâi, Basan ram belra le kêlchal ang, bu tui tak le grep tui uain ni ina.

¹⁵Israelhai kha an hong irchonga, a sân an hong irhniang tâka, an mar tel tul tâka, Siamtu, an Pathian kha an rotsana, saninhringtu, an lungpui kha an ngainêpa.

¹⁶Millim an ibiak kha a khôkmâk tak taka, thil porinche an ithohai khan a ning an murtira.

¹⁷Pathian ni loi ramilhli an biaka, an pahai inhriat ngai loi le chi ngailoi an biak tâka, pathian thar lâm te tehai.

¹⁸Anni neitu lungpui kha uksak mahai, annihai siamtu Pathian kha an rotsana.

¹⁹RENGPA khan a hmu’n chu a ning an mura, a nâi le tehai kha an thikpai ta.

²⁰‘Irbîksan ki ta, Itin mo an iom hrang thîr ki ta, irlo ihnang tâk an ni. Nâi sual tûngnaboi an ni.

²¹pathian ni loi an biak tika ki ningmur an kêlsuaa, an millimhai khan ki ning an inmurtira, Irchia tep kâi loihai hmangin ki ninginmurtir an ta, nam invêttak takhai khom hnarsa an ti.

²²Ki ninginmur chu mei angin chok a ta, irnêng thil murdi kâng irhmang a ti. rammual hnuaia zu tung a ta, mualhai irzunghai khom zu fapai ving a ti.

²³Siatna chi tinrêng an chunga intungtir ki ta, an chunga thal intha ki ti.

²⁴Phîngchâm inkhurin thi an ta, hri irkhêltak tak irvei an ta. Ram sahrânghaiin sê an ta, irnêng pila mirûl tûr neihaiin inchuk an ti.

²⁵Tuala khandai tong an ta, in sûnga khom thil irkhêltak tak, dôngmate ruatharte, vânglai that an ta, nâipang khom tar khom hôi no nihai.

²⁶Tûte inhriat ta loi hrangin ki’rhmangtir chit hrang mani ki ti lik tâk a ni.

²⁷‘A mihai kha kin soisak ngheka,’ tiin. Nin râlhai kha irsor an tih ti ki chitinrîm a ni, A soisaktu chu keima ki ni lik tâk a ni.

²⁸Nam invêt tak kha an lei ni, thil rêng rêng inhre thei mahai.

²⁹Vâr ualhai sian chu inhre thei an ti, an om hrang dân thîr thei an ti.

³⁰An lungpui khan rotsan no sian, An Pathian RENGPA khan inthikpai no sian, inkhatin a sâng têlin an irzûl hrang ma ni? Inhni vaiin a nuai têlin an ingam hrang mo?

³¹An râlhai khomin an Pathian kha Israelhai Pathian nêkin chu a nêp ual ti an inhriat.

³²Sodom le Gomora anga sual, an râlhai kha grep khâ, tûr nei ang hi an ni.

³³An uain khom kha mirûl tûr ang a ni, mirûl inchuk anga ichiom a ni.

³⁴An râlhai thil tho RENGPA khan an hriat maia, phubâ lâk zoro’nchum a zong,

³⁵an ke sir kha a’rdang tika phubâ la ki ta, thuan ki ti, an siat zoro kha a hong nâi ta. An chunga hong tung hrang kha tuang lat an ti.

³⁶RENGPA khan a mihai san a ta, a siahlohai dongtum siatzia hai, mi ngar khom ngar loi khom a thi ban tômzia a hmuin inren nôk a ti.

³⁷A mihai kha ‘Nin pathian thilthothei, nin iiam ngaihai kha khôn mo an iom?

³⁸An irbôlna thâi fâktu, an iin hrang thilinhlan uain intuhai kha? hong thoiin hong changpui sianlân chu, nangni sûnghualtu hong ni ri se.

³⁹Keima vai hi Pathian kha ki ni, om ta tak mahai pathian danghai, ki thathaia, kin damtirhaia, ki ta ni sutpai thei tûte om mahai.

⁴⁰Pathian hring ki ni hi, bân pharin ki nuam le thu kin kung ngai.

⁴¹Khandai intât inngaih ki ta, dik takin roirêl ki ti. Ki râlhai chunga phuba la ki ta, ni khôkmâktuhai chu hrem ki ti.

⁴²An thisen chu ki thala luang a ta, ki khandaiin thisen insua a ta, râl sam seitak takhai kha sâtpai a ta,

⁴³Namhaio, RENGPA mihai hi inpâk roi, anni thattuhai kha hrem thiai a ta, a râlhai chunga phubâ la a ta, a mihai sual a ngaidam ngai.

⁴⁴Mosia le Nuna nâipa Josua khan kha hla kha mipui inhriata insîr an ti.

⁴⁵Mosia’n hi thu hi Israel mihai kuang an sîr zoiin chu,

⁴⁶‘Hi ki thupêk murdi hi ngaitua sabak unglân, nin nâihaiin hi dân thuhai hi zôm hrangin irchutirhai roi.

⁴⁷Hi thu hi thu mai mai ni ma, hringna thu a ni, Jordan dung fe kâia nin va ilua hrang rama khan tho unglân, dam insôt ni ti,’ a tia.

⁴⁸Kha nikhuaa khan RENGPA’N Mosia kuang,

⁴⁹“Moab ram, Jeriko dep, Abarim tânga Nebo tâng sîpa khan kâiin lân, an ram hranga Israelhai ki ipêk Kanaan ram kha thîrin lân;

⁵⁰Kha khan, thi ni ta, ni pi le puhai kuang fe ni ta; ni upa Arona, Peor tânga a mihai kuang hruai a ni ang khan.

⁵¹Inzinna ramchâr, Masa-Kades tui hmuna khan Israelhai laia ki thu ni tho’nchâia, Israelhai makunga ni ni ichôiindôm loi a ni.

⁵²Khasika khan ram kha hlatak ata vaiin hmu thei ni ti; Israel mihai omna hranga ki ipêk ram kha sir no chi ni,” a tia.