Read Hrangkhol DÂN INHNINA 33 Bible Online

DÂN INHNINA 33 - Hrangkhol bible

DÂN INHNINA 33

¹Pathian mi Mosia khan a thi mân, hiang satvurnahai hi Israel mihai ta hrangin a ngên pehaia.

²RENGPA kha Sinai tâng ata a zuanga, Misa angin Edom rama a suak Paran tâng ata a mihai a zuang êl invâra, Vântîrtôn sîngkhatin an zuia, A chang tiang mei a chok luai luaia,

³RENGPA khan a mihai an rena, A tahai kha a enkola, a ke hnung an zuia, a thupêkhai an dong.

⁴Mosia’n Dân thu a ni pêka, Jakoba irchihai irchon hlu tak kha.

⁵RENGPA kha a mi Israelhai rêng a nia, nam hruaituhai le Israel pungkhômhai chunga khan an lala.

⁶Reubena chungchâng hiang hin an sîr: “Reubena kha dam mai sianlân, a mihai kha a sân tôm khomhai sian,” a tia.

⁷Juda chungthu insîrin; “O RENGPA, Juda kamang khêk irngaitua’n lân, a urênghai vâr nôk ri sehai, a râlhai doipui ro,” ti hi.

⁸Levihai chungthu an sîra; “Ni siahlo iamom Levia irchihai khan Urim le Thumim dônhai sian, ni thu hril ngai ro, Masa-ah khan ni fiaa, Meriba tuihaia nin ibei kha.

⁹A nuhai, an pahai, chunga an iamom nêkin, ni chunga an iiamom ual a ni. Ni thupêk an zôma, ni thuthunga a iamom a ni.

¹⁰Ni nâi, Jakoba irchi hai kha ni dân irchutir an ta, ni maichâma mirimhoi hâl an ta, Hâlirvôm thilinhlan hâl ngai an ti.

¹¹O RENGPA a ineihai kha satvurin lân, a thilthohai lei lôm roh. A râlhai kha an irnak sâtpaiin lân, a khôkmâktuhai kha ngîr suak no ri sehai,” a tia.

¹²Benjamina irchihai chungchâng hiang hin an sîr: “RENGPA ditsak bîk le inren bîk a ni, a mithâ hnuaia lênga, sûn sôtin enkol a ta, a’rnâipui ngit ngai,” a tia.

¹³Josefa irchihai chungchâng hiang hin an sîr: “An ram kha RENGPA khan irvân irdo irfîmin infa sianlân, Irnêng sûngrîl ata tui leh satvur ri se.

¹⁴An thei rahai khan misa hmu insa sianlân, a zoro taka hmin mer mur ri se,

¹⁵tâng an isong irhoitak tak le mualhai kha thei tui tak takin sip ri se.

¹⁶An rama khan thil sa sip sianlân, sûl buka thu’nsîrtu khan satvur ri se, a satvurna kha Josefa lua hong vur sianlân. a urênghai kaihruaitu a ni kêng.

¹⁷Josefa chu sehrâtchal anga hrât a ni, Sele irki anga irki sa a nei, a’rkihai kha Manasea irchi sâng pâla Efraima irchi sîngkhat pâl an ni. Nam dang sik a ta, kôlkil dênin vôr indarh a ti,” a tia.

¹⁸Zebulun le Isakara chungchâng thu hiang hin an sîr: “Tuikhangliana bepâr, Zebulun kha irhniang ri se, Isakara khom in tiang a dongtum kha pungin sa ri se.

¹⁹An tângrama om hrangin ram dang an koia, kha khan irbôlna dikin irbôl an ti. Tuikhanglian irchongna an irchôka, a vakam chiaiphoia thil sa an bûma,” a tia.

²⁰Gada chungchâng thu hiang hin an sîr: “Gada ram irzattu kha inpâk roi, bân sê tana luvun hlîk hranga kâmkeibaknei irbîk ang hi a ni.

²¹Ram satak an inthanga, Israel hruaituhai an pungkhôma khan hruaitu dongtum an inchangtira, RENGPA thupêk le dân an zôma,” a tia.

²²Dana irchi chungchâng hiang hin an insîr: “Dana kha kâmkeibaknei tuai a ni, Basan ram ata a lei zong suaka,” a tia.

²³Naftalia chungchâng hiang hin an sîr: “Naftalia khan RENGPA satvurna a donga, irhniangin ditsakna a dong, A ram khan dîl ata sim tiang a dên rakin an ramin a suna,” a tia.

²⁴Aseri chungchâng hiang hin an sîr: “Nâi danghai nêkin Asera kha a râlvân a sa, a urênghai ditsakna dong sianlân, a ke kha hriaka inchie ri se.

²⁵Thîr le dârin an khua kha kal an ta, Dam takin lêng mai ri se,” a tia.

²⁶Israelhaio, nin Pathian ang hi pathian dang om mahai, Nangni changpui hrangin roiinpui taka sûm chunga chuangin irvân khi a’rfang tuai tuai.

²⁷Kumtuang Pathian kha nangni enkoltu a ni, a bân hrât khan nangni a sûnghuala, nin makunga râl an hnotsuaka, “Inboipai zit roi,” a ti.

²⁸Jakoba irchi Israelhai kha lungthi takin an om tâka, Bu le uain tamna rama an om tîr tîra, Irvân irdo’rfîm infa inlianhai khan an iam.

²⁹O Israel, ni vânnei bâka, Nangma ang hi tukhom om mahai, RENGPA saninhringna nam nin nia, RENGPA kha ni pho le khandai a ni. Nang sûnghual hrang le inhnêtu ni ni theina hrangin ni râlhaiin lungkham an ngên tâka; nangin sirpha ni ti.