Read Hrangkhol DÂN INHNINA 34 Bible Online

DÂN INHNINA 34 - Hrangkhol bible

DÂN INHNINA 34

¹Khan, Mosia kha Moab phâia irthokin Jeriko irdîna Nebo tâng, Pisga tâng sîpa khan a hong kâia. RENGPA khan Gilead ram murdi Dan dênin an entir;

²Naftalia le Efraima ram murdi, Manasea le Juda ram murdi, a thang tiang tuikhanglian dênin;

³Sim ram le Tûm khopui, Jeriko phâi irhôr, Zoar dênin.

⁴Khan, RENGPA’N a kuang, “Hi ram hi a ni, Abrahama, Isaka, Jakoba hai kuang, Nin irchihai la pe ki ti, tia irkhâmin, ki lei inkung kha, a hmu kha nang ki’rhmutir phot a ni; khannisianlân, so taka son chu nang infetir no ning,” a tia.

⁵Khanchu, RENGPA siahlo Mosia kha RENGPA thu angin Moab rama khan a thi tâka.

⁶Khan, Beth-peor irdîna Moab ram irhôra a phûma; khannisianlân, a thân kha atûn ten tukhomin inhre mahai.

⁷Mosia kha a thi khan kum irzakhat le sômhni mi a nia; a mit zîng maka, a’rnak khom chuai mah.

⁸Israel irchihai khan Mosia kha Moab phâia khan sûn sômthum an châ tâka; kha khan, Mosia sûnna chap nikhuahai kha a hong mong tâka.

⁹Khan, Nuna nâipa Josua kha vârna irtha’n a sipa, Mosia khan a chunga a kut a’rnghat sikin; khan, Israel irchihai khan a thu an zôma, RENGPA’N Mosia thu a pêk ang khan an thoa.

¹⁰Khataka irthoka khan Israelhai laia khan Mosia anga RENGPA’N hmâiirsan ngeia a ibiak deipu zel hong om ta mahaia.

¹¹Irsinsiana murdihai le, thilirkhêl murdihai, Faroa le a siahlohai murdi kuang le Aigupta ram murdia inentira,

¹²kut hrât tak le ichiomtak taka Israel mi murdihai mithmua Mosia’n a itho anga tho om ta mahaia.