Read Hrangkhol DÂN INHNINA 5 Bible Online

DÂN INHNINA 5 - Hrangkhol bible

DÂN INHNINA 5

¹Mosia khan Israel mi murdi kha a koi bukhaia, an kuang ‘Israelhaio, hi thu’nkung le omdân hrang nin beng inhriata, ki insîrhai hi irngaitua unglân, irchu nin ta, nin izôm hrang a ni.

²Ei Pathian RENGPA khan Horeb tânga thu a nin kungpuia.

³RENGPA thuthung hi ei pahai ta hrang ni ma, eini, a vuana hitaka omhai ta hrang hin a ni lem.

⁴Tânga mei ata khan RENGPA khan hmâi irsongin nin kuang thu a insîr a ni kha te.

⁵Kha zoro lai khan RENGPA le nangni kâra ki ngîra, RENGPA thu insîr nôktua ki chang a ni, mei nin chi sikin tânga nin ife ngam loi a ni.

⁶RENGPA khan hiang hin a ti: ‘Suaka nin omna Aigupta ram ata nangni hruai suaktu RENGPA, nin Pathian kha ki ni.

⁷Keima no chu Pathian dang rêng rêng nei no roi.

⁸Ni ta hrangin millim siam no ro, chung tiang irvâna om mani, irnênga om mani, irnêng hnuai tuia thil irlim mani ni isiam hrang ni ma.

⁹Khahai kha kûnin chubai ni imûk hrang ni ma, an sin ni itho sa hrang ni ma. Kei RENGPA, ni Pathian hi, Pathian nunse tak ki ni; ni khôkmâktuhai chu an irchi irlo thum, irlo minli dên khomin ki hrem ngaia,

¹⁰lung ni thunga ki thupêk zômtuhai rêk chu an irchi, a sâng sâng dên chunga khom khâzana ki nei ngai a ni.

¹¹Pathian RENGPA irhming sâlin milak tho no ro; milaka a’rhming sâltu chu RENGPA khan hrem loiin insua no ni.

¹²RENGPA ni Pathianin thu nang a ipêk angin sabat nî hmangin lân, ser ro.

¹³Sûn ruk sûng sin tho ni ta, ni sin murdi sin thei ni ti.

¹⁴A sûn sari nî rêk hi chu RENGPA ta hrang sabat nî a nia, sin ite ni itho hrang ni ma; ni nâipahai, ni nâinuhai, ni suakpahai, ni suaknuhai, ni sehrâtchal hai, ni sakuartung hai, ni sâ vâi murdihai le ni kho sûnga nam dang om sahai khomin sin an itho hrang ni ma, nangma ang dênin ni suak nupang pasal, an irngam sa hrang a ni.

¹⁵Aigupta rama, mi siahlo nin ini kha inhre mai roi. Khataka ta kha RENGPA nin Pathian hin a sinthotheina roiinpui tak hmangin nangni a ihruaisuak kha. Khasikin, RENGPA nin Pathian khan sabat nî hi ser hrangin nangni a iti a ni.

¹⁶RENGPA ni Pathianin thu nang a ipêk ang khan ni nu le ni pa chôiindôm ro; khanchu dam insôt ni ta, RENGPA ni Pathian nang ipêk rama khan irhniang ni ti.

¹⁷Mi that no ro.

¹⁸Uire no ro.

¹⁹Inru no ro.

²⁰Ni bômhai dôngma milakin hnôl no ro.

²¹Ni bômhai dôngma ni irzuk hrang ni ma, a in le loihai, a suakpa, a suaknuhai, a sehrâtchalhai, a sakuartunghai, a ta rêng rêng ni irzuk hrang ni ma.

²²RENGPA khan hi thupêkhai hi a ni, Horeb tâng kôla nin hong irchunkhôm laia nangni a ihril kha. Mei ata le sûm irsa inthim khak ata hi thu hi inring takin a insîr a ni kha te; thu dang insîr nei ma. Lungphêk inhnia a’rziaka, a ni ipêk a ni.

²³Tâng kha a chok luai luaia, inthim irsa khak ata irhâi nin inhriat khan, nam tin hruaituhai le nin ulianhai ki kuang an honga;

²⁴‘RENGPA kin Pathian khan a roiinpuizia le a lianzia a nir hmutir ta, mei ata a’rhâi kha kin inhriata, a vuan hin Pathianin mihriam a chongpuia, mihriam kha thi kher mah ti kin inhriat tâk a ni.

²⁵Aniachu, ithoa mo thi zoi theiin ei iom nôk hrang? Mei irkhêl tak khan ni hong kâng irhmang a ta, RENGPA ei Pathian irhâi kha ei inhriat nôkin chu thi ngêt ta ei ti.

²⁶Mei ata Pathian irhâi inhriata mihriam dam suak zel an om mo?

²⁷RENGPA ei Pathianin a insîr murdi kha ni hrilin lân, lei irngai kin ta, zôm kin ti,’ an tia.

²⁸RENGPA khan ki kuang nin thu’nsîr kha a lei inhriat. RENGPA khan ki kuang, ‘Hi mihai hin ni kuang an thu’nsîr hi ki lei inhriata, an hril indik.

²⁹Khaang lungrîl kha irput maihai sianlân chu, i dôra sa hrang mo a ini! Ni chi an ta, ki thupêkhai zôm an ta, an nâihai ten khom kumkhua’n irhniang an ti:

³⁰An kuang zu chumin lân, an irbua inkîrtirhai roh.

³¹Nang rêk chu ki kôla hin lei ngîrin lân, ki thupêk murdihai, ki thuthunghai le om hrang dân ki iti nang lei hril ki ti; kha kha annihai hi ni irchutir hrang a ni; khanchu, ramchâra an ilua hrang ram ki ipêk hranga khan nin izôm ngai hrang a ni,’ a tia.

³²RENGPA nin Pathian thupêk hi a sân nin izôm irdîn hrang a ni; inkhat lua nin irhmâi hrang ni ma, nin ibôk hrang ni ma.

³³RENGPA nin Pathianin nin fena hrang a itia khan nin ife thiai hrang a ni; khanchu, dam nin ta, irhniang nin ta, nin ram nei hranga khan sôt tak nin idam hrang a ni.