Read Hrangkhol DÂN INHNINA 6 Bible Online

DÂN INHNINA 6 - Hrangkhol bible

DÂN INHNINA 6

¹Hi thupêk hai, thu’nkunghai le om hrang dânhai hi RENGPA nin Pathian khan nangni irchutir hrangin a ni iti a ni. Nin luaa nin inei lat hrang rama khan tho ngai roi.

²Nin nâihai le nin tuhai khomin RENGPA nin Pathian thu’nkung le thupêk nangni ki ihril hi an zômin an itho hrang a ni; khanchu dam insôt an ti.

³Khasikin, O Israelhaio, inhre unglân, tho ngêt hrangin irsinsiam roi; nin ta hrangin sa a ta, khuaihlutui le dûttui luangna rama hin nin pahai kuang RENGPA nin Pathian inkung angin a saterengin nin ipung hrang a ni.

⁴O Israelhaio, irngaitua u ta, RENGPA, RENGPA vai hi kin Pathian chu a ni.

⁵RENGPA nin Pathian chu nin milung murdi’n, nin thei dôrin lungthung roi.

⁶A vuana hi thu nangni ki ipêk hi nin milunga châm mai sianlân,

⁷ngûk takin nin nâihai irchutir roi. In sûnga nin toi laiin, lampuia nin fe laiin, nin zâl hrangin, nin thoi hrangin hril ngai roi.

⁸Nin inhriat mai theina hrangin nin bâna khit unglân, michal khitna’n hmang roi.

⁹Nin mikot chunghaia irziak unglân, nin tual mikothaia khom târ ngai roi.

¹⁰Nin pu Abrahama, Isaka, Jakoba hai kuanga pêk a inkung ram chu RENGPA nin Pathianin nangni pe a ti; khopui lian tak tak le satak tak, nin inding ni viat loi kha dong nin ti.

¹¹Kha khan in sûnga khan thil satak tak nin isia ni loi om a ta; sôl taka nin ichoi ni loi tuikhurhai om a ta; grep irhuan le oliv hmun, nin isiam ni viat loihai dong nin ti. RENGPA’N kha rama khan nangni a hruai intung tika chu ite irsam no chin ni.

¹²A sân irdîn roi, suak nin nina, Aigupta ram ata nangni hruaisuaktu RENGPA hi irnghil viat no chin ni.

¹³RENGPA nin Pathian kha chi unglân, ama vai chubai mûk unglân, ama irhming vai sâmin khomâkirsâm ngai roi.

¹⁴Nin kôlvêla pathian omhai inkhat lua biak no roi.

¹⁵Nin laia om RENGPA nin Pathian hi Pathian nunse tak a ni. Nin chunga RENGPA nin Pathian hi a ning an mur likin chu rammual ata hi nangni a inboipai hrang a ni.

¹⁶Masa tui hmuna nin iti ang khan RENGPA nin Pathian hi fia no roi.

¹⁷RENGPA nin Pathian thupêk kha kuluk takin zôm unglân, a thu inhriattir le a chonginkung nangni a ihril kha zôm ngai roi.

¹⁸RENGPA ihril ang takin nin râlhai kha nin makunga nangni inhnotsuak pe zit a ti.

¹⁹RENGPA mithmua diktak le satakin nin itho hrang a ni.

²⁰Nakan tena nin nâihaiin, ‘Hi thu’nhriattir hai, thu’nkung hai, om hrang dân hai, RENGPA kin Pathian nangni hril hi itin lama mo?’ tia nangni an irdon tika chu,

²¹hiang hin sâm ngai roi, ‘Aigupta rama Faroa suak kin nia, RENGPA khan Aigupta ram ata kha a ni hruai suaka.

²²RENGPA khan thilirkhêl hai, irsinsiana roiinpui tak tak le irkhêltak tak Aigupta ram haia, Faroa le a zuituhai chunga a itho a ni.

²³Khataka khan a ni hruai suak tâka, hi ram, ei pahai kuanga pêk a inkung rama hin a ni hruai inlûta ni pêk a itum a ni.

²⁴RENGPA khan hi chonginkunghai hi tho zit hrangin thu a ni pêka, ei satna hrangin RENGPA kin Pathian kha chi mai hrangin a ni tia; khanchu, ei rêngin a vuan sûn ten hin a ni la ihôi mai a ni.

²⁵Hi a thupêk ni hril murdi hi kuluk taka ei zômin chu RENGPA khan ei chunga lôm a ti; ti ngai roi.