Read Hrangkhol DÂN INHNINA 7 Bible Online

DÂN INHNINA 7 - Hrangkhol bible

DÂN INHNINA 7

¹RENGPA nin Pathianin nin lua hrang rama khan nangni hruai inlût a ta, khataka om nam sari, nangni nêka tam ual le hrât ual, Hit mi, Girgas mi, Amor mi, Kanaan mi, Periz mi Hiv mi le Jebus mihai kha nin matona inhnotsuak a ti.

²RENGPA nin Pathianin nin kuta nangni a pêk tika thathai nin ta, nin ithathai zit hrang a ni; annihai le thu nin irthungpui hrang ni ma, inrenhai sa no roi.

³Irneipol no roi, nin nâihai dôngma pasala irneitirhai no roi.

⁴Nin nâipahai hruai irhmangpaihai an ta, pathian dang inbiaktirna an ti; khanchu RENGPA kha nin chunga a ninginmur thut a ta, nangni inboipaina ti.

⁵Khasikin, an maichâmhai kha insiatpai pehai zit unglân, an lungphunhai insiat unglân, an Aseri irlim thing phunhai kha irkit unglân, an thing millimhai kha hâl zit roi.

⁶Nangni chu, RENGPA, nin Pathian ta hrangin ser indang khak nin ta; RENGPA nin Pathian khan rammuala nam tinrêng lai ata a dongtum bîk ni hrangin nangni a inthang a ni.

⁷Nam dang nêka nin tam ual sika lungthunga nangni a inthang ni ma; nam tianga chu a tôm ual tak nin ni.

⁸RENGPA khan lung nangni a thung tak tak sikin le nin pahai kuanga, a thu’nkung inpuihlingtir a nuam sikin RENGPA’N Aigupta rêng Faroa suak ata nangni a irtansuak a ni.

⁹Khasikin, inhre roi, RENGPA nin Pathian hi kêng Pathian a ini, Pathian iamom, a thu’nkung a vong ngita, ama lungthunga, a thupêk zômtuhai chunga irlo sâng dêna khonza ngai kha.

¹⁰Ama khôkmâktuhai rêk chu anni ngei chunga thuana, inse ngaitu a ni; ama khôkmâktuhai chu hôi no ni, an dam sûng lele’n hrem a ti.

¹¹Khasikin, thupêkhai, thu’nkunghai le om hrang dân hai, nangni ki ihril kha a vuan hin zôm unglân tho roi.

¹²Hi om hrang dânhai hi nin uksaka, hiang hin nin oma, nin zômin chu RENGPA nin Pathian khan nin pahai kuanga a inkung ang khan a thuthung kha nin ta hrangin hlen a ta, nin chunga khonzâna nei a ti.

¹³Lung nangni thung a ta, satvurin nangni inpungtir a ta, nin pahai kuanga pêk a inkung rama khan nin nâihai kha satvur a ta, nin rama nin nâihai kha satvur a ta, nin rama nin thei phunhai inratir mer mur a ta, nin buhai, nin uain hai, nin sahriak hai nin kêl le belrahai inpung tîr tîr a ti.

¹⁴Mi dang murdi nêkin nin râlvân sa a ta, nin laia pasal mani, nupang mani ching om no nihai.

¹⁵RENGPA khan nin lai ata natna tinrêng lapai a ta, Aigupta rama hrihai kha irvei no chin nia, nangni khôkmâktuhaiin irvei lem an ti.

¹⁶RENGPA nin Pathianin nangni a ipêk rama namhai kha inboipai unglân, nin hmu’n lunginkhamhai no unglân, an pathianhai khom nin ibiak hrang ni ma; kha kha nin in-ôkna hrang châng a ni.

¹⁷Hi namhai hi eini nêkin an tama, itin mo ei inhnotsuak thei hrang? ti lungrîl irput no roi.

¹⁸Anni kha nin ingîkhai hrang ni ma. Faroa le Aigupta mihai, RENGPA nin Pathianin a isoisak lam kha inhre mai roi.

¹⁹Irkhêl tak taka Faroa a ihremhai kha nin hmua, thil irkhêl le irsinsiana roiinpui tak tak tho’n, ama kut irnak hrât ngêt hmangin inhnê uala nangni a ihruaisuak ni kha: khaang dên khan nin ichi mihriamhai chunga tho nôk ri se.

²⁰Kha no khom kha, RENGPA nin Pathianin nin laia ngalchân tîr a ta, nin ithat ban le irbîk nin ihmu loihai kha thathai chit nin ti.

²¹Annihai kha ngîkhai viat viat no roi, RENGPA nin Pathian, Pathian roiinpui tak le ichiom tak hin nangni ompui mai a ti.

²²RENGPA nin Pathianin kha namhai kha zâm zâmin inhnotsuakhai a ti; anni kha thathai zoi no ni, khano’nchu ram sahrâng pung hrât hrai an ti.

²³RENGPA nin Pathianin annihai kha nangni pe ngêt a ti; inchamaihai rak a ta, siat zoi an ti.

²⁴An rênghai kha nin kuta nangni pe a ta, irvân hnuaia an irhming inhre viat ta loi hrangin soisak a ta; tûte nangni lei danh thei reng om no nihai; nin inboipaihai zit hrang a ni.

²⁵Thing millim, an itukhai kha, hâl nin ta, a tuamna sumru le rângachakhai kha irzuk no unglân, la sa no roi; nin ta hrangin in-ôkna le châng ichiom tak ni thei a ti. RENGPA nin Pathian hrangin thil intirom a ni.

²⁶Khaang thil intirom kha nin ina nin la lût hrang ni ma, nangni khom khaang ringot khan chu intirom nin ti. Intir tak tak nin ta, a sân nin ikhôkmâk sa hrang a ni, RENGPA khosâl tong an ni.