Read Hrangkhol DÂN INHNINA 8 Bible Online

DÂN INHNINA 8 - Hrangkhol bible

DÂN INHNINA 8

¹Nin pahai kuanga RENGPA nin Pathianin ram pêk a inkung kha dam taka nin luaa, nin neia, nin pung theina hrangin a vuana thupêk nangni ki ihril hi nin izôm zit hrang a ni.

²Kum sômminli sûng ringot RENGPA nin Pathian khan ramchâra nangni a inchaitir kha inhre mai roi; deng nangni an theitira, nangni a fiaa, a thupêkhai kha nin izôm hrang mo zôm loi hrang nin lungrîl inhriat a inuam a ni.

³Deng nangni an theitira, nangni an châmtira, a kâra nin inhriat ngai loi, nin pi le puhai khomin an inhriat ngai loi, bu’n nangni a vâia; mihriam hi bu ringotin a ihring hrang ni maka, RENGPA bâi ata thu tinrêng suakhai kha a itûng hrang a nih ti nin irchu nuam sika a ni.

⁴Hi kum sômminli sûng hin songkol inkhat lua innghâkin siat mak chêia, nin ke ru invûng ual hliak ma.

⁵Mi’n a nâi a sepa, a ihrem ang hin, RENGPA nin Pathian khan nangni a sep ngai ti nin inhriat mai hrang a ni.

⁶RENGPA nin Pathian thupêk kha nin zôma, a inuam angin hring nin ta, ama kha nin ichi hrang a ni.

⁷RENGPA nin Pathian khan ram sataka nangni hruai a ta, ivate tui luang zon zon tamna, tuihnâr le irnêng sûngrîl tui zuang luang suak tamna, tâng le irhôr hoitak takhai,

⁸gohu le barli sana ram, grephai, theipui hai khuaihlutui tamna rama khan nangni hruai a ta;

⁹kha khan, irsam nei loiin nuam do dôr bu ne nin ta; kha rama lunghai kha thîr a ni, tânghaia khan dâr choi suak hrang a sân a tam.

¹⁰Ruk dôr fâk hrang nin neia, ram satak nangni a pêk sikin RENGPA nin Pathian kha inpâk nin ti.

¹¹A thupêkhai, om hrang dân a itihai, a thu’nkunghai a vuana nangni ki ihril hi zôm nuam loiin RENGPA nin Pathian hi irnghil pal nin ti, irdîn roi.

¹²Khop dôr le ruk dôr fâk hrang nin neia, inhoi tak tak nin sina, nin lua tika,

¹³nin sehrât hai, belra le kêl hai an hong punga, sum le rângachak nin nei intama, nin inei murdi a hong irhniang tika,

¹⁴nin lârirpâk lungrîlin Aigupta suak ata nangni hruai suaktu RENGPA nin Pathian kha irnghilna nin ti.

¹⁵ama khan ramchâr irzat tak le ichiom tak taka nangni a hruai intheng sika, mirûl hai, mirûl inchukna mihai le âinuvêt tamna rama hai, tui om loina ramchâra hai nin fe khan lungpui ngar tak ata tui nangni a ipêk kha.

¹⁶Ramchâra khan nin pahai khomin an inhriat ngai loi Mana khan nangni an fâa, nangni fiana hrangin le nin ta hrangin a isa hrang mo saloi hrang nin inhriat theina hrangin intak nangni an tuangtir a ni.

¹⁷Khanchu, nin hrât sik le thil nin thothei sika irchong mo kin ni irti no roi.

¹⁸RENGPA nin Pathianin irchong thei hrangin nangni a inhrâttir a nih ti inhre mai roi; nin irchibulhai kuang a inkung kha ama khan a la inthâ no sika a ni.

¹⁹RENGPA nin Pathian kha irnghil viat viat no roi, pathian danghai uksakin chubai mûksan ual no roi; khaang khan a ni, irhmang ngêt ngêt nin ti.

²⁰RENGPA nin Pathian irhâi hi nin uksak no’n chu, nin iluapai pehai hrang nam RENGPA’N a inboipai angin nangni khom nangni inboi ngêt a ti.