Read Hrangkhol DÂN INHNINA 9 Bible Online

DÂN INHNINA 9 - Hrangkhol bible

DÂN INHNINA 9

¹O Israel mihaio, irngaitua u ta, a vuan hin Jordan dung a sân nin kâi vâng ta; nangni nêka tam le nam hrât luapai pe hrang le khopui lian tak tak, an irkul bang irvân phâk hrang rakhai kha nin ilâkpai pe hrang a ni.

²A mi omhai lak mi lian tak tak, irsâng tak tak, Anak-hai irchi an nia, ‘Tu mo Anak-hai kha danh zoi hrang?’ an itihai kha an ni.

³A vuan hin inhre roi, nin mahruaitu kha RENGPA nin Pathian hi a ni, nin matona a sâna mei kâng angin a ife thiai hrang a ni, insiat a ta, nin matona nangni inlômtir mai a ti, RENGPA lei iti tâk angin inhnotsuak zit a ta, irhmangtirhai zit nin ti.

⁴Hi mihai hi RENGPA nin Pathianin an hnotsuak tika, ‘Kin sa sikin RENGPA khan hi ram hi a ni pêka, hi namhai hi an sual sikin a inhnot suak a ni,’ tihna chin ni.

⁵Nin sa sik le nin omdân inthîk sika an ram hi nin iluapai pehai ni ma; hi namhai hi a sân an sual sikin RENGPA nin Pathian hin a inhnotsuak a ni; Abrahama, Isaka, Jakoba hai kuanga a thu’nkung kha inpuihlingtir a itum a ni.

⁶Khasikin, RENGPA nin Pathianin ram satak hi, nin sa sika nangni a ipêk ni mah ti hi inhre mai roi, mi tukullian tak nin ni.

⁷Ramchâra khan RENGPA nin Pathian kha ning nin inmurtir kha inhre mai unglân, irnghil no roi. Aigupta ram nin suaksan nî ata atûn ten hin RENGPA ata tehel zong intam ngai nin ni.

⁸Horeb tânga khom khan RENGPA ning kha nin inmurtira, nangni irhmangtir chit hrang dôrin a ning a inmur a ni.

⁹Nangni le RENGPA thuthung, lungphêka irziak kha, la hrangin tânga ki hong fea, sûn sômminli le zân sômminli ite fa ma ung, in ma ung.

¹⁰Inkhômpui lai khan nin kuang thu an sîra, khahai murdi kha lungphêka, Pathianin ama kut ngêtin a’rziaka, RENGPA khan a ni pêk a ni.

¹¹Sûn sômminli le zân sômminli a hek zoi hnung khan thuthung irziakna lungphêk inhni kha RENGPA khan a ni ipêk a ni.

¹²RENGPA khan ki kuang, “Thoiin lân, chum lat ta, Aigupta ram ata ni mi hruai suakhai khu a sân an siat zoi ta, om hrang dân ki ihril an pêtsana, millim mai mai an siam tâk khu te; a tia.

¹³RENGPA’N, “Hi mihai tukullianzia hi kin hriat kha te.

¹⁴Lei dâihrek ro, tûte inhre viat loiin hong inkamangtir ki ti. Nangma irchihai ata anni nêka thil thothei ual le tam ual nam nangni inding ki ti,” a ti saa.

¹⁵Tâng ata kha ki tîra, thuthung irziakna lungphêk inhni kha a chôia.

¹⁶RENGPA, nin Pathianin om hrang lam nangni a ihril kha nin lei pêtsan chian tâka, sehrâtte irlim siam chopin nin Pathian ata thilsual nin tho tah ti ki hmua.

¹⁷Lungphêk inhni kha ki chôia, nin ihmu ngeia ki dêng khoi tâk a ni kha te.

¹⁸Nin sualna sikin le RENGPA makunga khan sûn sômminli zân sômminli ite fâkin in loiin nangni kin bok khum nôka.

¹⁹Nangni inmuai irhmang chit hrang dôrin RENGPA ning kha an mura; a ninginmurna irkhêl tak kha hong suakna a tih ti ki chitinrîm a ni; khannisian, kha zoroa khom khan ki thu kha RENGPA’N a ni lei irngaituaa.

²⁰That hrang dôrin Arona chunga khom RENGPA ning kha an mura, ama ta hrang khom ki ngên pe a ni.

²¹Nin thil tho’nsual sehrâtte irlim kha ki lâka, Meia ki roa; vâiphin anga indi chitin ki nôia, tâng ata tui zuang luang tâka khan ki iphul a ni.

²²Tabera-ah, Masa-ah, Kibrot-hatava haia khan RENGPA nin Pathian kha a ning nin inmurtir a ni.

²³Kades-barnea khan, ‘Fe unglân, ram nangni ki ipêk hrang kha hong lua roi,’ tiin RENGPA khan nangni a tia; khannisian, RENGPA nin Pathian thupêk kha nin doi khaka, a thu kha iam ngam mak chêia, nin irngai nuam loi a ni.

²⁴Nangni kin hriattir ata RENGPA chunga tehel nin zong mai a ni.

²⁵Nangni thatpai chit a tum sikin sûn sômminli le zân sômminli chu RENGPA makunga kin bokhrupa;

²⁶RENGPA kuanga khan ki chongchaia, O RENGPA PATHIAN ni mi ni’rchon dong hranghai hi thatpai chit no ro, Aigupta ram ata roiinpui takin ni’rtansuaka, inhnê takin ni ihruai suak a ni kha te.

²⁷Ni siahlo Abrahama, Isaka, Jakoba hai inhre maiin lân, hi mihai tukullianzia hi irngai zâmin lân, an sualna le pualoina hi khôkmâk no roh.

²⁸khano’nchu, Aigupta mihaiin, ‘RENGPA khan pêk a inkung ram kha nangni a ihruai intung zoi loi a ni; nangni a khôkmâk sikin ramchâra that hrangin nangni a ihruai suak a ni hi,’ tina’n ti.

²⁹Ni mi, ni irchon dong tumhai an nia, ni bân irnak hrât taka inhnê taka ni ihruai suakhai kha an ni’ ki tia.