Read Hrangkhol JOHANA 1 Bible Online

JOHANA 1 - Hrangkhol bible

JOHANA 1

¹A phut taka Thu a om, Thu kha Pathian kuang a oma, Thu kha Pathian a ni.

²Ama kha a phut rengata Pathian kuang a om.

³Ama hmanga itinrêng siam a nia; thil siam rêng rêng ama isiam loi ite om mah.

⁴Amaa hringna a oma, kha hringna kha mihriamhai vârna a ni.

⁵Vâr kha inthima a zuang vâra, inthimin kha kha inhre mah.

⁶Pathianin mi inkhat a zuang tîra, ar hming chu Johana a ni.

⁷Ama kha vâr thu inhriattir hranga zuang a ni, mi murdi’n a thu inhriattir kha an iamna hrangin.

⁸Ama kha chu vâr ni ma, vâr thu kha inhriattir hranga zuang a ni ual.

⁹Kha vâr kha vâr dik tak, rammuala zuanga mi tin zuang invârtu chu a ni.

¹⁰Rammuala a oma, ama hmanga rammual kha siam a nia, rammualin ama kha len hre ma.

¹¹Ama ram ngeia a zuanga, aniachu ama mihaiin lei lôm mahai.

¹²Mi senkhatin chu an lei lôma, ama iamtu murdihai chu an kuang Pathian nâihai ni theina hrang a pêka.

¹³Kha mihai kha thisena irzir ni mahai, pasal nuamlama irzir khom ni mahai, Pathian ata irzir an ni.

¹⁴Khan, Thu chu mihriam a zuang changa, ei laia a zuang om tâka. A roiinpuizia ei hmu, Pa nâi khât neisun roiinpuina chu, lungkham le thu takin a sip.

¹⁵Johana’n a thurchi a hrila, “Ki hnunga zuang hrang chu ‘keima nêkin a roiinpui ual’ ki iti kha, hi mi hi a ni, ki om mâna om tâk a nia,” tiin a khêka.

¹⁶A lungkhamna irkip ei dong seng, lungkham chunga hril thei ban lungkham nôkna.

¹⁷Dân kha Mosia hmanga pêk a nia, lungkhamna le thutak chu Jisua Krista zâra zuang tung a ni.

¹⁸Tukhomin Pathian hmu ngai mahai; Pa Nâipa nei sun, a rôpsuama om khan, a thurchi an hriattir ta a ni.

¹⁹Jerusalem khuaa Judahaiin, “Tu mo ni ini?” tia irdon hrangin Ochaihai le Levia irchihai an tîrhai lai khan, Johana’n hi thu hi a hong inhriattir a ni.

²⁰Khan Johana’n ip loiin, “Kei chu Krista chu ni ma ung,” tiin fel takin an puang ta.

²¹Khante, “Tu mo ni ini? Elija mo ni ini?” tiin an irdona. Ama’n a sâm nôka, “Ni ma ung,” a tia; “Deipu kha mo ni ini?” an tia. “Ni ma ung,” tiin a sâm nôka.

²²Anni’n, “A ni tîrtuhai kin sâm theina hrangin tu mo ni ini, nin hril ta, ni thurchi imo insîr hrang ni inei?” an tia.

²³Johana’n, deipu Isaia chong hmangin a sâm: “Keima hi ramchâra ‘Rengpa lampui siam roi tia khêktu kha ki ni,’ ” a tia.

²⁴Kha palai, Farisaihai hong itîrhai khan Johana an irdon nôka.

²⁵Anni’n, “Krista mani, Elija mani, deipu mani lua ni ni no’n teh, ithoa mo mi ni ibaptis ngai?” tiin an irdon nôka.

²⁶Johana’n, a sâma, “Keiin chu tuiin ki baptisa, khannisian nin laia mi inkhat, nin inhriat loi a ingîr a ni.

²⁷Ama kha ki hnunga a honga, a kekok hrui sût inruk lua ni ma ung,” a tia.

²⁸Khahai kha Bethani khua, Jordan vadung râl, Johana a baptisna ngai hmun an iti a ni.

²⁹A tûka chu Johana’n Jisua khan ama a hong ipan kha a hmua; “En u ta, Pathian Belrate, rammual sual pêl hrangtu so,” a tia.

³⁰So mi so a ni, “Ki hnunga hong hrangtu chu, keima nêka roiinpui ual, ki om mâna om tâk, ki ititu chu.

³¹Ama kha inhre ma unga; khannisianlân, Israelhaiin ama an inhriat theina hrangin kei hi tuia baptis-in ki ihong a ni,” a tia.

³²Hi hi Johana’n thu an hriattir dân chu a ni, “Irtha kha vasu angin irvân ata a zuang suaka, a chunga chuang ki hmua.

³³Khan khomin, keima’n chu lan hre ma ung, nikhomsian, tuia mi baptis hranga ni tîrtu, Pathian khan Irtha kha irvân rengata zuang chumin vasu anga zuangin, tukhôk chunga chum mani hmu ni ti, kha kha Irtha Irthianga mi ni ibaptis hrangpu kha a ni, ti a ni lei inhril tâka,” a tia.

³⁴Johana’n, “Kha kha ki hmu tâka, hi mi hi Pathian Nâipa a nih ti nangni kin hriattir a ni,” tiin.

³⁵A tûk nôka chu Johana kha a irchutirhai inhni leh an ngîra.

³⁶Jisua chai vêl kha an thîra, “En u ta, Pathian Belrate so,” a tia.

³⁷A irchutir inhnihaiin a insîr kha an inhriatin chu Jisua kha an zui tâka.

³⁸Jisua kha a hong irheia, ama an hong izui kha a hmua, an kuang, “Imo nin izong?” a tia. Anni’n, “Rabbi, (Kha kha irchutirtu tihna a ni) khôn mo ni iom?” an tia.

³⁹“Hong unglân hmu nin ti” a tia. Khanchu a kuang an fe tâka, a omna kha an va hmua, kha nia khan a kuang an om tâka. Khohloi dâr minli vêl a ni.

⁴⁰Johana thu’nsîr inhriata Jisua zuitu inhnihai laia inkhat kha Andria, Simon Petera urêng a nia.

⁴¹Ama khan a masa taka a urêng Simona a va hmua, “Mesia, (Kha kha Krista tihna a ni) kin hmu ta,” a va tia.

⁴²Khan, Jisua kuang a hong hruaia. Jisua’n ama a lei ena, “Johana nâipa, Simona ni ni, Kifa nang ti ta an ti”. (Kifa chu Petera ti le hmunkhat, a omzia chu lungpui tihna a ni.)

⁴³A tûka chu Jisua’n Galili rama fe a tuma, Filipa a hmua, a kuang, “Ni zui roh,” a tia.

⁴⁴(Filipa kha Andria le Petera omna khua, Bethsaida khuaa mi a ni.)

⁴⁵Filipa’n Nathanaela chu a hmua, a kuang “A thurchi Dân lekhabua Mosia’n a’rziak, deipuhai khomin an irziak kha ama kin hmu ta, Nazaret Jisua, Josefa nâipa kha,” a tia.

⁴⁶Nathanaela’n, “Nazaret khuaa thil sa a isuak thei ma ni?” a tia. Filipa’n, “Hongin lân en roh,” a tia.

⁴⁷Jisua’n Nathanaela hong a hmu’n chu a thurchi a lei insîra, “En u ta, Israel mi dik tak, mi huang tumna rêng rêng nei loi so,” a tia.

⁴⁸Nathanaela’n, “Itin mo ni ni inhriat,” a tia. Jisua’n, “Filipa’n nang a koi mâna theipui kung bula ni om lai khan nang ki ihmu tâk kêng,” a tia.

⁴⁹Nathanaela’n, “Rabbi, Pathian Nâipa ni ni. Israelhai rêng inlaltak ni ni kêng,” tiin a sâma.

⁵⁰Jisua’n, “Theipui kung bula nang ki hmu kêng ni kuang ki ti sikin ni ni iam mo? Hi nêka thil roiinpui ual hi la hmu ni ti,” a tia.

⁵¹Khan, a kuang, “Thudik tak nang kin hril, irvân irhonga vântirtônhai Mihriam Nâipa chunga a chum le a kâi la hmu nin ti,” a tia.