Read Hrangkhol JOHANA 10 Bible Online

JOHANA 10 - Hrangkhol bible

JOHANA 10

¹Jisua’n, “Thudik tak nangni ki hril, tukhom belra mikota lût loia, hmun dang tianga luia lût chu inru ngai le hrâtlâksong a ni.

²Mikota lût chu belrapu a ni.

³Inkhâr enkoltu’n ama kha mikot an hong pe ngaia, belrahai khomin ar hâi an inhriat, a belrahai kha an irhming sengin a koia a hruai suak ngai.

⁴A ta murdi an suaktir zoiin chu an maton a hruaia, belrahai khan ama an zui ngai, a hnukirhai an inhriat sikin.

⁵Mi dang chu zui no nihaia, intânsan an ti, mi danghai hnukirhai chu an inhriat no sikin,” a tia.

⁶Kha chongirkhek thu kha Jisua’n an kuang an sîra, khannisianlân, a thu’nsîr omzia kha inhre mahai.

⁷Khanchu, Jisua’n an kuang thu an sîr nôka, “Thudik tak nangni ki hril, keima hi belrahai ta hrangin mikot ki ni.

⁸Ki matona hong murdi chu inru ngai le nakhrâtsonghai an ni; khannisian belrahai khomin an thu irngaitua mahai.

⁹Keima hi mikot chu ki ni. Tukhom keimaa lût chu inzôkin om a ta, lûtin suak a ta, fâk hrang hmu sa ti.

¹⁰Inru chu inru hrang le mi that hrang le insiat hrang vaiin kêng a ihong ngai, kei chu hringna nin neina hranga, tamtak nin neina hranga zuang ki ni.

¹¹Kei hi belra enkoltu sa ki ni; belra enkoltu sa’n a belrahai hrangin a hringna a pêk ngai.

¹²Irhlo mi, belrapu tak ni loia, belra neipu ni no chu inê hong a hmu’n chu belrahai an tânsan ngai, inê khan belrahai kha a sea, an thekindarh chit ngai.

¹³Irhlo mi a nia, belrahai a uksak no sikin a intânsan pat ngai a ni.

¹⁴Kei chu belra enkoltu sa ki ni, ki ta chu kin hriat, ki ta khomin an nin hriat.

¹⁵Pa’n a nin hriata kei khomin Pa ki inhriat ang hin; belrahai ta hrangin ki hringna ki pêk.

¹⁶Hi belra kula mi ni loi hi belra dang ki nei; anni khom ki la hong ihruaihai hrang a ni, ki hnukirhai khom inhria an ti, khanchu pâl khatin om an ta, a enkoltu inkhat leh.

¹⁷“Hi sika hin Pa’n lung a ni ithung a ni, la nôk hranga ki hringna ki pêk hrang sikin.

¹⁸Tukhomin ki hringna hi ni lâk pe thei no ni. Keima irchamin ki ipêk hrang a ni. A pêk thei ki ni; la nôk thei khom ki ni. Hi thupêk tho hrang hin Ka Pa’n a ni ibe a ni,” a tia.

¹⁹Kha thu sika khan Judahai laia irsêlna a hong om nôka.

²⁰An laia mi tamtakin, “Ramilhli ichel an vêt kêng! ithoa mo a chong nin irngai?” an tia.

²¹Senkhatin, “Ramilhli ichelin chu hiang hin chong thei no ni! Itin mo ramilhli’n mitcho mit a invârtir pe thei hrang?” an tia.

²²Khan, phalbi zoro a nia, Jerusalema irpumpêkna kût an hmang lai a ni.

²³Jisua chu Tempila Solomona bokropa a hong irlôi a va’rlôia.

²⁴Judahai a kôla an hong pungkhôma, a kuang, “I dôr ten mo milung ôkincha’n ni ni isia hrang? Krista ni ni’n chu, fel takin nin hril roh,” an tia.

²⁵Jisua’n a sâma, “Nangni ki hril tâk khate, iam mak chêia, Ka Pa irhminga sin ki ithohai hin ki thurchi nangni a inhriattir a ni.

²⁶Khannisianlân, iam mak chêi, ki belra laia mi nin ni no sikin.

²⁷Ki belrahaiin ki hnukirhai an inhriata, kei khomin anni kha kin hriat ngaia, an ni zui ngai;

²⁸an kuang kumtuang hringna ki pêka, kumkhua’n thi no nihai, tukhomin ki kut ata ni lapai pe no nihai.

²⁹Anni ni pêktu Ka Pa chu itinrêng nêka roiinpui ual a ni; Ka Pa kuta om chu tûte’n sutpai thei mahai.

³⁰Keima le Pa chu pumkhat kin ni,” a tia.

³¹Judahaiin chu ama dêngna hrang lung an hrût nôka.

³²Jisua’n an kuang, “Pa’n sin hranga a ni ipêk, sin sa tamtak nin mit hmua ki sina, ki sinthohai laia a i tak sika mo lunga ni dêng nin itum?” a tia.

³³Judahaiin an sâma, “Sin sa ni sin sika lungin nang dêng hrang ni ma unga, Pathian ni hrilinsiat le nang mihriam mai mai Pathiana nir bê sikin a ni,” an tia.

³⁴Jisua’n a sâma, “Nin Dân lekhabua, ‘Pathianhai nin nih,’ ti irziak mo ni ma?.

³⁵Ei inhriat angin ei Pathian Thubu’n a iti ka chu kumkhua’n a idik ngai a ni, Pathianin a chong a intungnahai khom kha pathianhai a iti a ni.

³⁶Keima len vâng chu Pa’n a nin thanga, rammuala a ni izuang tîr a ni. Itin mo Pathian Nâipa ki ni, ki ti sika hin Pathian ni hril insiat, nin ni iti?

³⁷Ka Pa’n sin hranga a ni inuam ki sin no’n chu ni iam no roi;

³⁸Khannisianlân, ki isin a ni’n chu, keima nin ni iam no khomin, ki sinthohai lua hi iam roi ba; Pa chu keimaa a om ti le kei khom Paa ki om tih nin inhriat infel theina hrangin,” a tia.

³⁹Kha hnung chu Jisua kha chel an tum nôka, khannisian an kut ata a suak tâka.

⁴⁰Jordan râla, Johana’n matona mi a baptisna ngai hmun tiang khan a fea, kha hmuna khan a om mai tâka.

⁴¹Mi tamtak a kuang an honga, “Johana’n sinirkhêl ite tho mah, khannisianlân, Johana’n hi pa chungchâng thu a insîr murdi chu a hong idik kêng,” an tia.

⁴²Khanchu mi tamtakin ama an iam tâka.