Read Hrangkhol JOHANA 11 Bible Online

JOHANA 11 - Hrangkhol bible

JOHANA 11

¹Mi inkhat ar hming Lazara, Bethani khuaa om kha dam maka. Bethani khua kha Mari le a zuarpuinu Marthi omna khua a ni.

²(Hi Mari hi Rengpa sahriak mirimhoi poltu, a ke sahriak innôta, a sam leh a ke hui penu kha a ni, a dam no Lazara hi a nuchapa a ni.)

³Khanchu, a farnuhaiin, “Rengpa, ni lungthung kha dam ma,” tiin mi an van hriltira.

⁴Jisua’n a len hriatin chu, “Hi natna hi thina hrang ni maka, Pathian roiinpuina hranga a ni. Hi sika hin Pathian Nâipa hi roiinpuiin a iom hrang a ni,” a tia.

⁵Jisua’n Marthi le a zuarpuinu le Lazara kha lung a thunga,

⁶Khannisianlân, dam mah ti an hriat hnungin a omna khuaa khan sûn hni a la oma.

⁷Kha zoi hnung chu a irchutirhai kuang, “Judai rama fe nôk ta ei ti,” a tia.

⁸A irchutirhaiin “Irchutirtu, Judahaiin lunga nang dêng an tum chak kha; khan khomin fe nôk ni itum mo?” an tia.

⁹Jisua’n a sâma, “Sûna dârkar sômhleihni a iom loi ma ni? Khasikin mi tukhom sûn khovâra a lêngin chu a ke sir châi ngai ma, hi rammual vâr hi a hmu sikin.

¹⁰Zâna a lêngin chu a ke sir a châi ngai, amaa khan vâr a om no sikin,” a tia.

¹¹Kha thu kha an sîr zoiin an kuang, “Ei rualpa Lazara kha a ina, khannisian ama kaithoi hrangin ki ife hrang a ni,” a tia.

¹²A irchutirhai khan a kuang, “Rengpa, a in a ni’n te, hong dam nôk ta ti,” an tia.

¹³Jisua’n a thi thu a insîrna a ni, khannisianlân anni’n chu a’rngam sûnga a in thu a insîr an sôna.

¹⁴Khasikin, Jisua’n fel takin an sîra, “Lazara a thi tâk,

¹⁵khannisian nangni sikin khataka ki iom no chu ki lôm, nin iam theina hrangin; i khom nisian, a kuang va fe ei ti,” a tia.

¹⁶Thoma, (Phîra) an iti chu a irchutir chanpuihai kuang, “Tho Irchutirtu kuanga ei rêngin fe ei ta, a thinaa va thi sa hrangin fe ei ti,” a tia.

¹⁷Jisua a hong tungin chu Lazara kha sûn minli thâna a lei om ta tih an hriata.

¹⁸Bethani kha Jerusalem kôla om a ni, kilometar thum dôra hla a ni.

¹⁹Judahai laia tamtak, an nuchapa thi chungchâng thua Marthi le Mari lungngam saka toipui hrangin an honga.

²⁰Marthi chu Jisua tung hrang a nih ti an hriatin chu a va dona, Mari’n chu in a lei nghâka.

²¹Marthi’n Jisua kuang, “Rengpa, hitaka ni iom ni sian chu, ki nuchapa thi no ni!

²²Atûn khom Pathian kuang ni izong murdi Pathianin nang pe a ti, ti kin hriat,” a tia.

²³Jisua’n, “Ni nuchapa thoi nôk a ti,” a tia.

²⁴Marthi’n, “Zoro hnungkhôna chu thoinôkna nia chu thoinôk a ti, ti chu kin hriat,” a tia.

²⁵Jisua’n, “Kei hi thoinôkna le hringna ki ni, tukhom a ni iam ka chu thi khom sianlân, hring mai a ti;

²⁶tukhom hring maia ni iam chu, kumkhua’n thi no ni; kha kha ni iam mo?” a tia.

²⁷Ama khan a kuang, “Ki iam, Rengpa, Krista, Pathian Nâipa rammuala zuang hrangpu kha ni nih ti ki iam,” a tia.

²⁸Kha kha an sîr zoiin a fea, a zuarpuinu Mari chu inrûkin a va koia, “Irchutirtu hi hin a om, nang a koi,” a tia.

²⁹Khan, kha thu kha an hriat zoi le chu a thoi lika, a kuang a fe tâka.

³⁰Jisua kha kho sûnga la lût loiin, Marthi’n a va donna hmuna khan a la om maia.

³¹Judahai, in sûnga lungngam saka toihai khan, Mari thoi lika, a suak kha an hmu’n, thâna chap hranga a ife mani an tia, an zuia.

³²Mari’n Jisua omna a va tunga, a va hmu’n chu a ke bula an boka, “Rengpa hi hin omin lân chu, ki nuchapa thi no ni,” a tia.

³³Jisua’n Mari chap le a hong zuitu Judahai chap kha a hmu’n, a sân a’rpei a tema, a’rhniaka,

³⁴“Khôn mo nin inzâl,” a tia. Anni khan, “Rengpa, hongin lân, en roh,” an tia.

³⁵Jisua a chap ta.

³⁶Judahai khan “En u ta, Lazara hi lung a thung bâka!” an tia.

³⁷An laia senkhatin chu, “Mitchopa kha mit vârna a ipêk mo ni ma? Lazara khom hi thi loiin a isia thei loi ma ni?” an lei tia.

³⁸Jisua kha irhniak pumin thân kha a tung tâka. Thân kha pûk a nia, lung leh khâr a ni.

³⁹Jisua’n, “Lung hi khâipai roi,” a tia. A thitu farnu Marthi’n a kuang, “Rengpa, atûn hin chu a mirim se ta ti, a thina sûn minli a ni ta,” a tia.

⁴⁰Jisua’n a kuang, “Ni iamin chu Pathian roiinpuizia hmu ni ti, nang ti ma ung mo?” a tia.

⁴¹Khanchu lung kha an khâipai tâka, Jisua kha a tanga, “Ka Pa, ki thu nir ngaitua sikin lômthu kin sîr.

⁴²Ki thu nir ngaitua ngai ti khom kin hriat; khannisianlân, hitaka mi pungkhômhai sika hin hi thu hi ki insîr a ni, nangin keima ni ni tîr ti an iam theina hrangin,” a tia.

⁴³Kha kha an sîr zoiin chu hnukirhai inring takin a khêka, “Lazar, hong suak roh,” a tia.

⁴⁴Mithi kha a kut a ke thân puana tuam pumin a hong suaka, a hmâi khom irhuina puana tuam a nia. Jisua’n an kuang, “Sût unglân, infetir roi,” a tia.

⁴⁵Mari ina hong Judahai laia tamtakin Jisua sintho kha an hmua, an iam tâka.

⁴⁶Senkhat chu Farisaihai kuang an fea, Jisua sinthohai kha an va hrila.

⁴⁷Khanchu, Ochai inlalhai le Farisaihai khan Sanhedrin-ah an koia, “Hi pa hin sinirkhêl tamtak a thoa, itin mo ei itho ta hrang?

⁴⁸Hiang hin ei insua rak maiin chu mi murdi’n iamna an ta, Rom mihai hong an ta, ei hmun irthiang le ei nam ni hong insiat pai pêna an ti,” an tia.

⁴⁹An laia inkhat, ar hming Kaiafa, kha kuma Ochai inlaltak khan, an kuang, “Inhre mak chêi;

⁵⁰Mipui irthûla mi inkhat a thia, nam pumpui irhmang chit loi chu nin ta hrangin a sa ual ti nin inhriat loi a ni,” a tia.

⁵¹Kha kha ama lungrîl puak suaka a insîr ni mah; kha kuma khan Ochai inlaltak a nia, an nam irthûla Jisua thi hrang a lei insîr a ni.

⁵²An nam irthûl vai khom ni loiin Pathian nâi rammuala indarhai pâl khata a hruaikhôm nôkna hrang khom a insîr a ni.

⁵³Khatak ata chu ama that lam an ngaitua tâka.

⁵⁴Khasikin Jisua kha inlangin Judahai laia lêng ta maka, kha rengata chu ramchâr kôla khua inkhat ar hming Efraima an itia khan a fea, kha khan a irchutirhai leh an om tâka.

⁵⁵Judahai Ferkân Kût a hong nâi tâka, thingtâng ata mi tamtak chu Ferkân Kût mân irthâr hrangin Jerusalema an fea.

⁵⁶Jisua kha an zonga, Tempila an irbûm laiin an chonga, “Itin mo nin ngaitua? Kûtnaa hong no ni mo?” an irti irhlôma.

⁵⁷Ochai inlalhai le Farisaihaiin ama an chel theina hrangin tukhomin a omna an inhriatin chu irchamneituhai an inhriattir hrang a nih ti thu an pêka.