Read Hrangkhol JOHANA 12 Bible Online

JOHANA 12 - Hrangkhol bible

JOHANA 12

¹Ferkân Kût hrang sûn ruk a la omin, Jisua’n mithi lai ata a ikaithoi Lazara omna Bethani khua kha a hong tunga.

²Khatak khan a ta hrangin zânbu an sinsiama, Marthi’n khalâi othai kha a donhaia, Lazara khom khalâi othai laia chang sa a ni.

³Khan, Mari’n, litar chimrip vêl, Spiknard hriak mirimhoi tak le man hlutak a hong chôia, Jisua ke an nôta, a samin a ke a hui pea; khanchu, kha hriak mirim khan in pumpui kha a sip zit tâka.

⁴A irchutirhai laia inkhat Juda Iskariota ama incheltir hrangtu khan,

⁵“Ithoa mo hi sahriak mirimhoi hi a duli irzathuma zuarin inrianghai pêk a ini loi?” a tia.

⁶Inrianghai a ngaisak sika kha chong kha a iti ni mah, inru a nia, sum kok a dôna, a sûnga om kha a lâk ngai sika a ni.

⁷Jisua’n, “Ite ti no roi, phûmin ki om nia hrangin hrê ri se.

⁸Inrianghai chu nin kuang om mai hrang an ni, kei chu nin kuang om mai no ning,” a tia.

⁹Juda mi tamtakin Bethani khuaa Jisua a om ti an inhriat tâka, Jisua vai hmu nuama hong ni mahaia, mithi lai ata a ikaithoi Lazara khom hmu an inuam sa a ni.

¹⁰Ochai inlalhai khan Lazara khom kha that an tum tâka,

¹¹ama sika Juda tamtakhaiin an rotsanhaia, Jisua an iam tâk sikin.

¹²A tûk zînga chu Ferkân Kûta hong mi tamtakin chu Jisua kha Jerusalema hong lût hrang a nih ti an inhriatin,

¹³tûm ônhai an chôia, a nghâk hrangin an suaka. “Hosana! Rengpa irhminga hong chu inpâkin om ri se! Israel rêng chu inpâkin om ri se!” tiin an khêk mur mura.

¹⁴Jisua’n sakuartung a hmua, a chunga a chuanga,

¹⁵“Chi no ro, Zion nâinu, En ta, ni Rêng chu a hong e, sakuartung te chunga chuangin,” ti irziak ang khan.

¹⁶Kha kha a irchutirhaiin a phuta khan chu inhre thei mahaia, khannisianlân, Jisua chôiindôma a om zoi tena chu, a chungchâng, khaanga irziak a ni, a chunga kha thil kha lei itho a ni an inhriat thei ta.

¹⁷Lazara, thân ata a koi suaka, mithi lai ata a kaithoi laia a kuanga mipui omhai khan kha thu kha an inhriatirhai thiai tâka.

¹⁸Sinirkhêl a tho tih an inhriat sikin, mipuihaiin ama an va inghâk a ni.

¹⁹Farisaihai khan, “Ite nin ilo thei loi a ni hi te, en u ta, rammualin ama an izui tâk hi,” an irtia.

²⁰Kût hmang laia Pathian biak hranga hong fehai laia Grik tuhai manni an oma.

²¹Khahai kha Galili rama Bethsaida kho mi Filipa kuang an fea, “Ka pu, Jisua hmu kin nuam,” tiin an ngêna.

²²Filipa khan Andria a hong hrila, Andria le Filipa khan Jisua an va hrila.

²³Jisua’n a sâma, “Mihriam Nâipa chôiindôma a om zoro a hong tung ta.

²⁴Thudik nangni ki hril; bu’rmal irnênga a tâka a thi no’n chu, ar mal dênin a om chiana, a thiin chu ra tamtak an sua ngai.

²⁵Tukhom mâni hringna inpâm murdi’n chu inchân a ta; tukhom hi rammuala hin a hringna an pâm no’n chu kumtuang hringna nei mai a ti.

²⁶Tukhom ki sintho nuam murdi’n chu ni zui ngêt ri se, ki sin thotu chu ki omnaa a om sa theina hrangin. Tukhomin ki sin tho chu ka Pa’n chôiindôm a ti,” a tia.

²⁷“Atûn hin ki lungrîl a na tak taka, imo ki iti hrang tâk? ‘Ka Pa, hi zoro ata hi ni saninhring roh’ ki iti hrang ma ni? Ti no ning, hi dûk tuang hrang piala zuang kêng ki ini,” a tia.

²⁸“Ka Pa, nir hming chôiindôm roh,” a tia. Khanchu, irvân ata hnukirhai a zuang suaka, “Ki chôiindôm ta, la chôiindôm nôk mai ki ti,” a tia.

²⁹Khataka mipui ngîr sahai khan hnukirhai kha an inhriatin, “Khonri kêng,” an tia; senkhatin “Vântîrtônin a ichongpui,” an tia.

³⁰Jisua’n a sâma, “Kha hnukirhai kha ki ta hranga zuang suak ni mah, nin ta hranga a ni ual.

³¹Atûn hin rammual chungchâng ngaitua lai a ni, atûn hin rammual roirêltu hi pai suak ni a ti.

³²Keima irnêng ata inkhâia ki omin chu, mi murdi keima tiang kaihruaihai zit ki ti,” a tia.

³³Kha thu kha i ang taka a ithi hrang mani tih inhriatirna hrangin a insîr a ni.

³⁴Mipuiin chu an sâma, “Krista chu kumkhua’n om mai a ti, ti Dân lekhabu ata kin inhriat, nangin ‘Mihriam Nâipa inkhâiin om a ti,’ itina ni iti ma ni? Mihriam Nâipa kha tu mo a ini?” an tia.

³⁵Jisua’n an kuang, “Vâr hi sôtnote nin laia la om a ti. Vâr nin nei sûng hin chai roi, inthimin nangni a de nona hrangin, tukhom inthima lêng chu a fena inhre ngai ma.

³⁶Vâr nin nei sûng hin vâr hi iam roi, vâr nâihai nin ni theina hrangin,” a tia. Kha thu kha Jisua’n an sîr zoiin, a fe pat tâka, an hmu nona hrangin ar bîka.

³⁷Khaanga sinirkhêl tamtak kha an mit hmua tho khom sianlân iam mahai.

³⁸Deipu Isaia’n: “Rengpa, kin thu’nsîr tu’n mo iam? Rengpa sinthotheina kha tu kuang mo an lang?” a iti kha a hong tung theina hrangin.

³⁹Hi sika hin an iiam thei loi a ni, Isaia khan:

⁴⁰“Pathianin an mit an chotir pehaia, An milung an ngartir sa, An mitin an hmu nona hrang le an milungin an inhriat thei nona hrangin. Khanchu, hong kîr nôk an ta, Anni kha ki lei indamhai itinin,” a iti ang khan.

⁴¹Isaia’n kha thu kha a roiinpuizia a hmu sikin a thurchi a insîr a ni.

⁴²Khan khomin hruaituhai laia mi tamtakin Jisua kha an iam tâka; khannisian, Farisaihai sikin insîr inlang ngam mahai, khano’nchu, Sinagok ata inhnot suak an ini hrang a ni.

⁴³Pathian roiinpuina nêkin mihriam kuanga roiinpuina an inuam ual a ni.

⁴⁴Jisua a khêk suaka, “Tukhom ni iam chu keima ni iam ni mahaia, a ni tîrtu iam an ni.

⁴⁵Tukhom a ni hmu chu a ni tîrtu hmu a ni.

⁴⁶Rammuala hin vâr angin ki izuang a ni, tukhom a ni iam murdi’n chu inthima an om nona hrangin.

⁴⁷Tukhomin ki thu inhriatin zôm no sianlân, ama kha keiin thiamno inchangtir ma ung; rammual thiamno inchangtir hranga zuang ni ma ung, rammual saninhring hranga zuang ki ni.

⁴⁸Tukhom ni hnôla ki thu pom nuam loi chu a chungthu rêl pe hrang inkhat a nei. Ki thu’nsîr ngei kha, zoro hnungkhôna chu a chungthu rêl petu la ni a ti.

⁴⁹Keima phuachôpin insîr ma unga, Pa, a ni tîrpu ngei khan, ki insîr hrang le ki iti hrang kha ircham a ni ipêk a ni.

⁵⁰A thupêk chu kumtuang hringna a nih ti kin hriat. Khasikin, Pa’n hril hranga a ni iti ang takin ki ihril a ni,” a tia.