Read Hrangkhol JOHANA 13 Bible Online

JOHANA 13 - Hrangkhol bible

JOHANA 13

¹Ferkân Kût hrang a hong ni tâka, Jisua’n hi rammual suaksana Pa kuang a fe zoro a tung ta ti an hriata; Ama mi, rammuala om a lungthunghai chu a mong dênin lung a thunga.

²Khan, zânbu an nêk laiin, Diabola khan Simon nâipa Juda Iskariota kha Jisua incheltir hrangin ngaituana a lei inneitir tâka.

³Jisua’n, Pa’n itinrêng a kuta a sia tih le Pathian ata zuang suak a nih ti le, Pathian kuang fe nôk hrang a ni an hriata.

⁴Khasikin, zânbu khalâi ot lai kha a thoia, a songkol irfual a kheka, irhuina puan a lâka, a boma.

⁵Khan tâbora tui a sunga, irchutirhai ke a’rsûk tâka, irhuina puan khan a hui thiaia.

⁶Simon Petera kha a hong phâkin chu, Petera’n, “Rengpa nangma’n ki ke ni irsûk hrang mo?” a tia.

⁷Jisua’n a sâma, “Ki sintho hi atûn hin inhre mak che, khannisianlân, nakana lan hria ni ti,” a tia.

⁸Petera’n a kuang, “Ki ke irsu viat no chi ni,” a tia. Jisua’n a sâma, “Ni ke ki’rsûk no’n chu ki irchutir ni thei no chi ni,” a tia.

⁹Simon Petera khan a kuang, “Rengpa, khano’nchu, ki ke vai irsu loiin, ki kut le ki lu khom,” a tia.

¹⁰Jisua’n a kuang, “Tui irsil tâk chu a ke vai no chu irsûk nang mah, a pumin a fâi kêng. Nangni chu nin fâi, nin rêngin chu ni mah,” a tia.

¹¹Ama incheltirtu hrang kha an hriata, khasikin, “Nin rêngin chu fâi mak chêi,” a iti a ni.

¹²An ke a’rsûk zoiin chu, a songkol sia kha an nghâka, a toi nôk tâka, an kuang, “Nin chunga ki sintho hi a omzia nin inhriat mo?

¹³Nangni’n, Irchutirtu le Rengpa nin ni ti ngai, nin ti indik, ki ni ngeia.

¹⁴Kei Rengpa le irchutirtu luan nin ke ki’rsûkin te, nangni khomin nin ke nin irsûk irhlôm hrang a ni.

¹⁵Nin chunga ki itho anga nangni khomin nin thôna hrangin, nangni ki irhmutir a ni.

¹⁶Thudik tak nangni kin hril, suak chu a pu nêkin roiinpui ma, tirtôn khom a tîrtu nêkin roiinpui ual mah.

¹⁷Kha kha nin inhriata, nin zômin chu lôm nin ti.

¹⁸Nin rênga thu insîr ma ung; ki inthanghai chu keima’n kin hriat, khannisian: ‘Ki bai fâktu’n a kuttum a nir hmua,’ ti Pathian lekha thu kha a zuang tung theina hrangin.

¹⁹“Kha kha a zuang tung mân atûn hin nangni ki lei inhril a ni; a zuang tung tika, Ama kha ki ni ngei nin iam theina hrangin.

²⁰Thudik nangni ki hril, ki mi tîr lei lôm chu keima ni lôm a ni, keima ni lômtu chu a ni tîrtu lôm a ni,” a tia.

²¹Jisua’n kha thu kha an sîr zoiin a sân a milung dûk a tonga. “Thudik tak nang ki hril, nin laia mi inkhatin nin cheltir a ti,” a tia.

²²Tu tak mo a iti inhre loiin irchutirhai kha an ir-enchuk tâka.

²³A irchutirhai laia inkhat, Jisua’n lung a ithung kha, Jisua kôla a toia.

²⁴A tu tak mo a iti irdon hrangin kut veivâkin Simon Petera’n ama kha a chongpuia.

²⁵Khan kha mi khan Jisua a va nâiin, “Rengpa a tu tak hi mo?” a tia.

²⁶Jisua’n a sâma, “Bai hlek kin chia ki ipêktu tak chu a ni,” a tia. Khan bai hlek kha an chia, a lâk suaka, Iskariota Simona nâipa Juda kha a pêka.

²⁷Juda’n bai hlek kha a lâk zoiin chu, a sûnga Setana a lût tâka. Jisua’n a kuang “Ni itho hrang kha tho lat ta roh,” a tia.

²⁸Khataka toihai laia tukhomin kha kha i sika a kuanga a insîr mo inhre mahai.

²⁹Irchutir senkhathaiin chu Juda sum hmarsa a dôn sikin, Jisua’n, kût hranga thil ei innanghai var cho roh; a iti mani, a ninole, inrianghai i i pehai roh, a iti pe mani an sôna.

³⁰Juda khan bai hlek kha a lâka, a suak zôi zel tâka; kha zoro kha, zân a ni.

³¹Khan, Juda kha a suak zoiin chu Jisua’n, “Atûn chu Mihriam Nâipa chôiindômin a om ta, Amaa Pathian khom chôiindômin a om ta.

³²Amaa Pathian chôiindôma a om khan, Pathianin ama khom a makunga chôiindôm a ta, chôiindôm zôi zel a ti.

³³Nâihaio, sôtnote nin kuang ki la oma, nangni’n ni zong nin ta, ki fena hranga hong thei no chin ni, Judahai kuang ni ihril ang khan atûn nangni kuang khom ki hril a ni.

³⁴“Thupêk thar nangni ki pêk; lungirthung irhlôm roi; keiin lung nangni ki ithung ang hin nangni khom lungirthung roi.

³⁵Lung nin irthung irhlômin chu mi murdihaiin ki irchutirhai nin ni ti, khataka khan inhria an ti,” a tia.

³⁶Simon Petera’n a kuang, “Rengpa, khôn mo ni ife hrang?” a tia. Jisua’n a sâma, “Atûn chu ki fena hranga ni zui thei no chin ni, nakana ni la zui nin ti,” a tia.

³⁷Petera’n, “Rengpa, itho sikin mo atûn hin nang ki izui thei loi hrang? Nangma hrangin chu thi khom ki’rhuam kêng,” a tia.

³⁸Jisua’n a sâma, “Ki hrangin thi nir huam mo? Thudik tak nang ki hril, nangin voithum ni ni phil mâka chu âr khuang no ni,” a tia.