Read Hrangkhol JOHANA 15 Bible Online

JOHANA 15 - Hrangkhol bible

JOHANA 15

¹“Kei hi Grep râng diktak ki ni, ka Pa ar huan enkoltu a ni.

²Ki irzompui ôn raloi murdi chu a pai ngaia, a ra murdi chu a’rthial infâi ngaia, a ra tam ualna hrangin.

³Nin kuanga ki thu’nsîr murdi sika khan nin irthiang ving ta.

⁴Keimaa om mai unglân, kei khom nangnia om mai ki ti. Ôn kha grep rânga a om mai no’n chu a ira thei loi ang dênin, nangni khom keimaa nin om mai no’n chu ra thei no chin ni.

⁵“Kei hi grep râng ki ni, nangni a ônhai nin ni. Tukhom keimaa a om maia, kei khom amaa ki om maina chu tamtakin a ra ngai; keima boiin ite tho thei mak chêi.

⁶Tukhom keimaa om loi chu ôn anga pai suakin an om ngai, ôn ipai kha a châra, an irkhôma, meia an paia, a kâng irhmang ngai.

⁷Keimaa nin om maia, ki thu nangnia a om maiin chu nin inuam murdi zong unglân, hmu thiai nin ti.

⁸Tamtak nin ra hin, ka Pa chu chôiindômin a om ngaia, khanchu ki irchutirhai ni nin ti.

⁹Pa’n lung a ni thung sikin kei khomin lung nangni ki ithung a ni; ki lungthungin om roi.

¹⁰Ki thupêkhai nin zômin chu, ki lungthungin om mai nin ti, keiin ka Pa thupêkhai ki zôma, a lungthunga ki iom ang hin.

¹¹“Ki lômna hi nangnia a om mai theina hrang le nin lômna ar kip theina hrangin hi thu hi nin kuang ki insîr a ni.

¹²Hi hi ki thupêk chu a ni; lung nangni ki ithung ang takin nangni khom lung irthung irhlôm roi.

¹³Mi’n a rual hranga a hringna a ipêk bana lungthungna inthûk ual tûte’n nei mahai.

¹⁴Thu nangni ki ipêk hi nin zômin chu ki rualhai nih nin ti.

¹⁵Suak nangni ti ta no ninga; suakin chu a pu sintho inhre maka; rualhai nangni ti ta ki ti; ka Pa kuang ata thil ki inhriat murdi nangni kin hriatir tâk sikin.

¹⁶Nangni’n nin thang mak chêi, keima’n nangni kin thang, va ra hrang le nin raa om mai hrangin nangni kin kung a ni; ki’rhminga Pa kuanga nin izong murdi nangni a pêk theina hrangin.

¹⁷Khasikin hi thu hi nangni ki ipêk a ni, lung irthung irhlôm roi.

¹⁸“Rammualin nangni a hmumâkin chu, keima a ni lei hmumâk ta ti inhre mai roi.

¹⁹Rammuala mi ni unglân chu, rammualin ama ta angin lung nangni a ithung hrang a ni. Khannisianlân, rammual ata nangni ki inthang suak nin nia, rammual mi nin ni ta no sikin rammualin nangni a ihnôl a ni.

²⁰Suak a pu nêkin roiinpui mah ti thu nin kuang ki insîr kha inhre mai roi. Anni’n deng an ni inthei ang khan nangni khom deng nangni lan theitir an ti; ki thu an zômin chu nin thu khom zôm an ti.

²¹Khannisianlân, hi thil murdi hi ki’rhming sika nin chunga tho an ti, a ni tîrtu an inhriat no sikin.

²²Keima zuangin an kuang thu insîr no inlân chu sual nei no nihaia, atûn chu an sual hnônna hrang nei ta mahai.

²³Tukhom ni hnôl chu ka Pa khom an ihnôl a ni.

²⁴Mi dang tûte la tho ngai loi thilhai an laia tho no inlân chu sual nei no nihai; atûn chu ki sinthohai an hmua, kei le Pa chu an ni ihnôl tâk a ni.

²⁵I khom nisianlân, an Dân lekhabua, ‘Anni’n a bi om loiin an ni hnôl’ ti irziak kha a hong tungna hranga an itho a ni.

²⁶“Irtharngamtu, Pa kuang ata nin kuang ki zuang itîr hrang kha, Pa rengata suak Irtha diktak kha a zuang tung tika ama’n ki thurchi nangni inhriattir a ti.

²⁷Nangni khom ki thu inhrepuhai nin ni, a phut ata ki kuang nin om sikin.