Read Hrangkhol JOHANA 16 Bible Online

JOHANA 16 - Hrangkhol bible

JOHANA 16

¹“Nin iamna nin mâk nona hrangin hi hi nangni ki insîr pe a ni.

²Sinagok haia nangni kêlsua an ta; nangni that tumtuhaiin Pathian sin an itho anga an bê zoro la hong tung a ti.

³Khaang thil kha mipuiin nin chunga la tho an ti, Pa le kei an nin hriat no sikin.

⁴A zoro a zuang tung tika nangni ki lei hril tâk tih nin inhriat maina hrangin, hi thu hi nin kuang ki insîr a ni. “Hi thu hi a phut ata nangni ki la ihril loi a ni, nin kuang ki la om sikin.

⁵Atûn chu a ni tîrtu kuang fe hrang ki nia, khan khomin nin laia tukhomin ki fena hrang nirdon mak chêi.

⁶Hi thu hi nin kuang kin sîr sikin nin milung kha chardongna’n a sip tâka.

⁷“Khannisianlân, thudik tak nangni ki hril, ki ife hi nin ta hrangin a sa ual, ki fe no’n chu Irtharngamtu kha nin kuang zuang no nia, ki fe’n chu nin kuang zuang tîr ki ti.

⁸Ama kha a zuang tungin chu, sualna tiang mani, dikna thua mani, roirêlna thua mani, an lei irngai insual tih rammual inhriatir a ti.

⁹Sualna lama thiamno chang an ti, keima an ni iam no sikin;

¹⁰Thudika khom thiamno an ichang a ni, Pa kuang ki fe hrang sik le nin ni hmu ta no hrang sikin;

¹¹roirêlna lama khom thiamno an ichang a ni, hi rammual roirêltu khom thiamno changin a om tâk sikin.

¹²“Nin kuang thu insîr hrang tamtak ki la nei, khannisian, atûn chu nangni hrangin inhriat lantak hrai a ti.

¹³Irtha dik tak a zuang tung tika chu thutak murdia nangni hruai inlût a ti. Ama phuachôpin thu insîr no ni; thu a idong kha insîr a ta, thil la hong tung hrang khom nangni hril a ti.

¹⁴Ama’n kei ni chôiindôm a ta, ki chong tihai kha lâkin nangni a hril hrang sikin.

¹⁵Pa’n thil a inei murdi ki ta a ni; khasika khan kêng, ‘Irtha’n ki taa om lâkin, nangni hril a ti,’ ki iti a ni.

¹⁶“Sôtnotea nangni’n ni hmu ta no chin nia, sôtnotea ni hmu nôk nin ti,” a tia.

¹⁷A irchutirhai senkhatin, “Ei kuanga thu’nsîr kha imo a itihna? Sôtnotea ni hmu ta no chin nia, sôtnotea dên ni hmu nôk nin ti, a iti hi, ‘Pa kuang ki fe hrang sikin’ a iti hi? an irtia.

¹⁸Khanchu, ‘Sôtnote’ a iti hi imo a itihna? Imo a insîr tum inhre mak me,” an tia.

¹⁹Jisua’n thu an irdon nuam tih an hriata, an kuang, “Sôtnotea ni hmu ta no chin ni, sôtnotea dên ni hmu nôk nin ti, ki iti kha nin irdon irhlôm mo?

²⁰Thudik tak nangni ki hril, nangni’n nin mit irthi tâkin chap nin ta, khannisianlân, nin chardong kha lômna la chang a ti.

²¹Nupangin nâihâ a tuang laiin chu a sân a char a dong ngaia, a zoro a tung tâk sikin; khannisianlân, nâi a neiin chu a chardong kha inhre ta mah, rammuala mihriam zuang suak kha a lôm sikin.

²²Khaang khan nangni khom atûn hin nin char a donga, khannisianlân, nangni hmu nôk ki ti, nin lungrîl lôm a ti, nin lômna kha tûte’n nangni lâkpai pe no nihai.

²³Kha nikhuaa khan nangni’n ite nir don ta no chin ni. Thudik tak nangni ki hril, Pa kuang i khom nin zongin chu ki’rhmingin nangni pe a ti.

²⁴Atûn ten ki’rhmingin ite la zong mak chêi; zong roi, khanchu hmu nin ti, nin lôm ar kip theina hrangin” a tia.

²⁵“Kha kha chongirkhekin nin kuang kin sîr ngai a nia; nin kuang chongirkhekin insîr ta loiin fel taka Pa thu nangni ki hril zoro la hong tung a ti.

²⁶Kha nikhua khan chu nangni’n ki’rhmingin zong nin ta; keima’n nin ta hrangin Pa kuang zong ki ti, ki itihna ni mah.

²⁷Pa ngei khan lung nangni a thunga, nangni’n kei lung nin ni thunga, Pa rengata zuang ki nih ti nin iam sikin.

²⁸Pa kuang ata ki zuang suaka, rammuala zuang ki ni, rammual suaksan nôk ki ti, Pa kuang ki ife nôk hrang a ni,” a tia.

²⁹A irchutirhai khan, “Atûn chu fel takin thu nin sîr tâka, chongirkhekin insîr ta mak che.

³⁰Nangma’n itinrêng nin hriat, tûte’n nang an irdon khom nang ta mah, atûn chu kin inhriat ta. Hi sika hin Pathian kuang ata zuang ni nih ti kin iam tâk,” an tia.

³¹Jisua’n a sâma, “Atûn chu nin iam ta mo?

³²Irngai roi, mâni in chita irthekindarin ki bingin nin ni mâk zoro la tung a ti, a tung thiai ta; khannisian, ki bingin om ma ung, Pa kha ki kuang a om.

³³Keimaa irtharngamna nin hmûna hrangin nin kuang hi thu hi ki insîr a ni; rammuala hin intak nin tuang ngai; khannisian hâi takin om roi! Keiin rammual kin hnê ta,” a tia.