Read Hrangkhol JOHANA 17 Bible Online

JOHANA 17 - Hrangkhol bible

JOHANA 17

¹Kha thu kha Jisua’n an sîra, irvân tiang a tanga, “Ka Pa, a zoro a tung ta; ni Nâipa chôiiindôm roh, Nâipa khomin nang a chôiindômna hrangin;

²Mi murdi chunga irchamneina a kuang ni pêk tâk sikin, Ama khomin ni ipêk murdihai kuang kumtuang hringna a pêk theina hrangin.

³Hi hi kumtuang hringna chu a ni, nang Pathian tak vai le ni itîr Jisua Krista inhriat hi.

⁴Thil tho hrang ni ni ipêk kha ki tho zoia irnênga hin nang ki chôiindôm ta.

⁵Ka Pa! rammual om mâna ni kuanga roiinpuina ki inei kha, atûn nangma makunga ngei ni chôiindôm roh.

⁶“Rammual ata mi ni ipêkhai kuang nir hming kin langtir ta; ni ta an nia; anni kha ni ni pêka; ni thu khom an zôm ta.

⁷Atûn chu thil ni ni ipêk murdi nangmaa suak a nih ti an inhriat ta.

⁸Nangin thu ni ni ipêkhai kha an kuang ki pêka, an hong poma; ni kuang ata zuang ki ni ngêt ti an inhriat tâka; nangin keima ni ni tîr ti khom an iam ta.

⁹“Keiin an ta hranga ki ingên pe hi, rammual ta hranga ngên pe ni ma ung, nangin ni ni ipêkhai ta hrang a ni, ni ta an ni sikin.

¹⁰Ki ta murdi chu ni ta a ni, ni ta khom ki ta a ni, annia chôiindômin ki om ta.

¹¹Kei rammuala om ta no ning, anni hi chu rammuala la om an ta; kei chu ni kuang hong kîr hrang ki ni ta. Ka Pa Irthiang! nangin ni ni ipêkhai hi nir hmingin hrunghai roh, Keima le nangma pumkhat ei ini angin, anni khom pumkhat an ni theina hrangin.

¹²“An kuang ki om sûng chu nangin keima ni ni ipêkhai hi nir hmingin ki hrung ngai; anni kha ki donsuia, an laia inkhat lua irhmang loia, irhmang nâipa ti no chu, Lekha thu a hong tung irkipna hrangin.

¹³Atûn ni kuang hong kîr hrang ki ni ta, hi thil hi rammuala ki insîr a ni; ki lômna annia an nei irkipna hrangin.

¹⁴Ni thu an kuang ki pêk tâka, rammualin anni kha an hmu mâkhaia, keima rammuala mi ki ini loi ang dênin rammuala mi an ni no sikin.

¹⁵“Anni chu rammual ata la suak hrangin nang ngên ma ung, mi sual ata hrung hrangin nang ki ngên a ni.

¹⁶Rammuala mi ni mahai, keima rammuala mi ki ini loi ang hin.

¹⁷Anni chu thutakin irthiangtir roh, ni thu chu thutak a ni.

¹⁸Rammuala ni ni itîr ang hin anni khom rammuala ki itîr a ni.

¹⁹Anni sikin ki irthiang infâi a ni, anni khom thutaka an irthiang theina hrangin.

²⁰“Hihai ta hrang vai ngên pe ni ma ung, an thu insîr sika keima ni la iam hranghai ta hrang khoma ngên sa ki ni.

²¹An rêngin inpumkhat an ni theina hrangin nang ki ngên a ni. Ka Pa nang keimaa ni oma, kei nangmaa ki iom ang hin, anni khom einia an omna hrangin, nangin kei ni ni tîr ti rammualin an iam theina hrangin.

²²Nangin roiinpuina ni ni ipêk kha kei khomin ki pêkhai ta, pumkhat an ni theina hrangin pumkhat ei ni ang dênin.

²³Keima annia, nang keimaa omin, an inpumkhat tak takna hrangin; khanchu ni ni itîr a nih ti rammualin inhriat an ta, lung ni ni thung angin anni khom lung ni thung tih rammualin inhriat an ti.

²⁴Ka Pa, nangin mi, ni ni ipêkhai hi ki kuanga om hrangin ki nuam, nangin lung ni ni thung sika rammual irsiang mâna ni ipêk ki roiinpuina kha an hmûna hrangin;

²⁵Ka Pa Fel tak! Rammualin nang inhre mahaia, keiin chu nang kin hriat; hihai khom hin nangin kei ni ni tîr ti an inhriat.

²⁶An kuang ni’rhming kin hriattira, inhriattir mai ki ti; nangin kei lung ni ni thungna ngei kha annia a oma, keima annia ki om theina hrangin,” a tia.