Read Hrangkhol JOHANA 18 Bible Online

JOHANA 18 - Hrangkhol bible

JOHANA 18

¹Jisua’n kha thu kha an sîr zoiin, a irchutirhai leh an suaka, Kidron dung an irkâna, khataka khan irhuan a oma, a sûnga khan a irchutirhai leh an lûta.

²An cheltirtu Juda khom, kha hmun kha an hriata, kha khan Jisua leh a irchutirhai an irhmukhôm ngai sikin.

³Khan, Juda khan sipai pâlkhat le Ochai inlalhai le Farisaihai itîr Tempil enkoltuhai, kha khan a hong hruaihaia; meiser hai, chokser hai, hriamhrei hai an hong chôia.

⁴Jisua’n a chunga thil hong tung hrang murdi kha an hriat zita, a va suaka an kuang, “Tu mo nin izong?” a tia.

⁵“Nazaret Jisua,” tiin an lei sâma, Jisua’n, “Kei hi ki ni,” a tia. An cheltirtu Juda khom kha an laia a ngîra.

⁶Khanchu, “Keima hi ki ni,” an kuang a ti zoi le, hnung tiang an irtôla, irnênga an inrîla.

⁷“Tu mo nin izong?” tiin anni kha ar donhai nôka, “Nazaret Jisua,” an tia.

⁸Jisua’n, “Keima hi ki nih ti nangni ki hril ta khate, keima nin ni izong a ni’n chu, a danghai hi infetirhai roi,” a tia.

⁹A thu’nsîr, “O Pa, Nangin kei ni ni ipêkhai kha, inkhat lua irhmangtir ma ung,” a iti kha a hong tung theina hrangin.

¹⁰Simon Petera chu a khandai vong a phôia, Ochai inlaltak suak mikuar chang tianga a sât thâk pea. Kha suak irhming kha Malka a ni.

¹¹Jisua’n Petera kuang khan, “Khandai kha a koka thun roh, Pa’n a ni ipêk tuangna khilât hi ki i-in loi hrang ma ni?” a tia.

¹²Khan, sipai pâl le an hruaitu le Judahai Tempil enkoltu, irchun khômhai khan Jisua kha an chela, an khita,

¹³Anna kuang an hruai masaa, Kaiafa tarpupa a ni sikin. Kaiafa chu, kha kuma khan Ochai inlaltak a ni.

¹⁴Kaiafa khan, “Mipui thi irthûla mi inkhat thi a sa ual,” tia Judahai tipuitu chu a ni.

¹⁵Simon Petera le irchutir dang inkhatin Jisua kha an zuia, kha irchutir kha Ochai inlaltak hmêlhriat a ni, Ochai inlaltak tual laia khan Jisua a lûtpui saa.

¹⁶Petera chu mikot pên tiang a ngîra; irchutir dang Ochai inlaltak hmêlhriat kha a va suaka, mikot enkoltu dôngmate kha a chongpuia, Petera kha a hruai inlûta.

¹⁷Mikot enkoltu dôngmate khan Petera kuang, “Nang khom, hi pa irchutirhai laia mi ni ini loi ma ni?” a tia. Ama khan, “Ni ma ung,” a tia.

¹⁸Siahlohai le enkoltu sipaihai khan an ngîra, a dâi hrai sikin meiholin mei an thoa, an uata; Petera khom ngîr pumin an laia mei lum kha a va uat saa.

¹⁹Ochai inlaltak khan Jisua kha a irchutirhai thurchi le a thu irchutir chungchâng ar dona.

²⁰Jisua’n a sâma, “Thangphuangin mi tin kuang thu kin sîr ngai; Juda murdi fe irchunna Sinagok haia, Tempil haia, ki’rchutir mai ngaia, inrûkin ite insîr ngai ma ung.

²¹Ithoa mo ni ni irdon? Ki thu’nsîr irngaituhai kuang imo ki insîr ngai irdonhai ro ba, imo ki insîr an inhriat,” a tia.

²²Kha kha an sîr zoiin chu enkoltu sipai ngîrhai laia inkhat khan Jisua hmâia an bêna, “Ithoa mo Ochai inlaltak kha, khaanga ni isâm?” a tia.

²³Jisua’n a sâma, “Ki ti insualna a om duaiin chu, imo ki ti insual, hi mihai hi inhril roh. Khannisian, ki tho indikna a omin chu, nin hril ro, khannisian ki tho’n dik a omin te ithoa mo ni ni inbên?” a tia.

²⁴Khanchu, Anna khan khit pumin Ochai inlaltak Kaiafa kuang a tîr tâka.

²⁵Simon Petera khan ngîrin mei lum a la uata, “Nang khom hi irchutirhai laia mi ni mak che mo?” an tia. Khan Petera’n a phila, “Ni ma ung,” a tia.

²⁶Ochai inlaltak siahlohai laia inkhat, Petera’n a mikuar a isât thâk pe urêng khan, “Irhuana khan a kuang nang ki ihmu mo ni ma?” a tia.

²⁷Petera khan a phil nôka; khanchu âr a khuang zôi zel tâka.

²⁸Zîng taka Jisua chu Kaiafa in ata Ramoptu in Praitoriana an hong hruaia. Juda irchamneituhai chu, dân ang taka irthianga Ferkân Kût fâk an nuam sikin Ramoptu in Praitoriana lût mahai.

²⁹Khanchu, Pilata chu an kuang a va suaka, “Hi mi hi imo a tho’nsuala nin ibe,” a tia.

³⁰Anni khan, “Hi mi hin thilsual tho no sian chu ni kuang hong hruai no ni ung,” an tia.

³¹Pilata’n, “Nangni’n hruai unglân, nin dân angin a chungthu rêl pe roi,” a tia. Khan, Judahaiin a kuang, “Keini’n chu mi that theina dân nei ma ung,” an tia.

³²A thi hrang thu Jisua’n a lei insîr a hong tung theina hrangin khahai kha a hong iom a ni.

³³Khanchu, Pilata chu Praitoriana a lût nôka, Jisua kha a koia, a kuang, “Judahai rêng mo ni nih?” a tia.

³⁴Jisua’n a sâma, “Kha kha nangma milung suaka ni iti mo, mi dangin ki chungchâng nang an ihril mo?” a tia.

³⁵Pilata’n a sâma, “Kei hi Juda mi mo ki ini? Ni chipuihai le Ochai inlalhaiin ki kuang nang an hong ihruai a ni hi; imo ni iti?” a tia.

³⁶Jisua’n a sâma, “Ki rêng Ram hi chu rammuala om ni ma, ki Ram chu hi rammuala om ni sianlân, Judahai kuta incheltira ki om nona hrangin ki hnung zuihaiin doihai an ta, ki rêng Ram chu hitaka hin ni mah,” a tia.

³⁷Pilata’n, “Khante, rêng mo ni ini?” a tia. Jisua’n a sâma, “Nangma’n rêng ni ni ti khate; kei chu thutak inhriattir hi ki isuakna san le rammuala ki izuangna san chu a ni; tukhom thutaka omhai chu ki’rhâi an irngai ngai,” a tia.

³⁸Pilata’n a kuang “Thutak chu imo a ini?” a tia. Kha kha an sîr zoiin chu Judahai kuang a va suak nôka, an kuang, “A chunga thiamno inchang hrangin ite a bi hmu ma unga.

³⁹Khannisian, nin dân angin Ferkân Kût zoro’n intângna ina om mi inkhat kin sua ngaia. Judahai rêng hi nangni insua pe inlân nin nuam mo?” a tia.

⁴⁰Khannisianlân, inring takin an khêka, “Hi pa hi chu ni no ri se, Barabba kha ni ri se,” an tia. (Barabba kha hrâtlâksong ngai mi a ni.)