Read Hrangkhol JOHANA 19 Bible Online

JOHANA 19 - Hrangkhol bible

JOHANA 19

¹Khan, Pilata’n Jisua a hruaia, a vîka.

²Sipaihaiin ilhling lukhum an siama, an inkhumtira, khanchu, songkol irfual senduk an innghâktir sa,

³“Chubai, Judahai rêng!” an tia; an inbêna.

⁴Pilata chu pên tiang a va suak nôka, an kuang, “En u ta, a chunga ite a sualna hmu ma ung tih nin inhriatna hrangin nin kuang ki hong ihruai suak hi,” a tia.

⁵Khanchu, ilhling lukhum khumpumin songkol irfual senduk innghâkin Jisua kha a hong suaka. Pilata’n an kuang, “En u ta, hi mihriam hi,” a tia.

⁶Ochai inlalhai le a nghâkhaiin an hmu’n chu, “Krosa hembe roh, Krosa hembe roh,” tiin an khêka. Pilata’n an kuang, “Nangni’n hruai unglân, Krosa hembe roi, keiin chu ite a chunga a sualna hmu ma ung,” a tia.

⁷Judahaiin an sâma, “Dân kin neia, kha dân ang khan a ithi hrang a ni, Pathian Nâipa ar ti sikin,” an tia.

⁸Pilata’n kha thu kha an hriatin chu a chi nôk uala.

⁹Praitoriana a lût nôka, Jisua kuang, “Kho tianga mi mo ni ini?” a tia. Khannisianlân, Jisua’n sâm ma.

¹⁰Pilata’n a kuang, “Ni ni isâm loi hrang mo? Nang insua thei ki ni, Krosa nang hembe thei ki ni, ti hi ni inhriat loi ma ni?” a tia.

¹¹Jisua’n a sâma, “Chung tiang ata pêk ni ni no’n chu, ki chunga irchamneina rêng nei no chi ni, khasikin, ni kuanga ni pêktu khan sual a pêl intam ual a ni,” a tia.

¹²Khasikin Pilata’n ama insua hrang lam a zong tâka, khannisianlân, Judahai an khêka, “Hi pa hi nin sua’n chu Kaisara rual ni no chi ni,” an tia.

¹³Pilata’n kha thu kha an hriatin chu Jisua kha a hruai suaka, “Lungirchuan” Hebrai chonga chu Gabbatha an iti roirêlna toihmuna khan a toia.

¹⁴Ferkân Kût irtûng ni a nia, sûn lai tak a ni. Judahai kuang khan, “En u ta, nin rêng hi,” a tia.

¹⁵Khahai kha an khêka, “Inboipai roh, inboipai roh, Krosa hembe roh,” an tia. Pilata’n, “Nin rêng hi Krosa ki ihembe hrang mo?” a tia. Ochai inlalhaiin an sâma, “Kaisara ni no chu rêng dang nei ma ung,” an tia.

¹⁶Khanchu Pilata’n Jisua kha Krosa hembe hrangin a pêkhai tâka. Khanchu, Jisua kha an hruai tâka,

¹⁷Khan a kros kha irputin “Luru hmun” Hebrai chonga Golgotha an iti hmun dênin a fe tâka.

¹⁸Khatak khan krosa an hembea, mi dang inhni, a sîr le a sîra an hembe saa, a laia Jisua.

¹⁹Pilata’n inhriatirna a’rziaka, “Nazaret Jisua, Judahai rêng,” tiin kros rêla a târa.

²⁰Inhriatirna kha Juda tamtakin an tepa, Jisua an hembêna hmun kha khopui kôl a ni sikin Hebrai, Rom, Grik chongin irziak a ni.

²¹Juda Ochai inlalhai khan Pilata kuang, “Judahai rêng tiin irziak no roh, Judahai rêng ki ni a ti, tiin irziak roh,” an tia.

²²Pilata’n a sâma, “Ki irziak chu ki’rziak zoi ta,” a tia.

²³Sipaihaiin Jisua krosa an hembe zoiin chu a silkaihai an lâk pea, sipai minliin an irsema, an sika phêk kha khatin an dong. A songkol irfual an lâk saa, kha kha insui loi songkol a nia, a ring ata a pumpuia phan a ni.

²⁴Anni khan, “Hi hi chu ir-ekthêr no roi, tu ta hrang tak mani inhriatna hrangin tasân ei ti,” an tia. “Ki silkaihai an irsema, Ki songkol hrangin tâ an sâna,” ti irziak kha a hong tung indik hranga a ni. Sipaihai khan kha kha an tho tâk a ni.

²⁵Jisua Kros kôla khan, a nu le a nu zuarpuinu Mari, Klopa dôngma le Magdala mi Mari hai an ngîra.

²⁶Jisua’n a nu le a kôla ngîr irchutir lung a ithungtu kha a hmu’n chu a nu kuang, “Ka nu, en ta, ni nâipa kha,” a tia.

²⁷Irchutir kuanga khom khan “En ta, ni nu kha,” a tia. Kha zoro ata chu a irchutir kha ama ina om hrangin kha nu kha a hruai tâka.

²⁸Kha zoi hnung chu Jisua’n itinrêng a tung irkip ta ti an hriata; Pathian lekha thu a tung theina hrangin, “Ki tui an hrâl e,” a tia.

²⁹Khataka khan bêl, uain thûra sip, a oma; khanchu sponj, uain thûra an inchie kha, husop khianghrolin an târa, a hmûra an hong intungtira.

³⁰Jisua’n uain thûr kha a lei in zoiin chu, “A’rzoi ta,” a tia; khanchu a lu a kûna, a hrang a chat ta.

³¹Judahai irtûng ni a nia, ruakhai kha Sabat nia Krosa a om mai nona hrangin, kha Sabat kha nikho roiinpui a nia, Judahai khan mi hembehai ke inkhiakhaia, an ruakhai insum hrangin Pilata kuang an ngêna.

³²Khanchu, sipaihai an honga, Jisua pâla hembehai, a matonpu le a dang kehai an khiak pehaia.

³³Jisua kha an va pana, a thi tah ti an inhriata, khannisian a ke chu khiak pe mahai.

³⁴Sipai laia inkhat khan a kânga ufeiin a suna, thisen le tui a zuang luang suak tâka.

³⁵Mit ngeia hmutu insîr a ni, nangni khomin nin iamna hrangin. A thu inhriatir hi a dika, thu dik an sîr ti inhretu inkhat a om.

³⁶Pathian lekha thu’n “A ru inkhat lua inkhiak ni no ni,” ti a hong indikna hrangin ama kha a hong iom a ni.

³⁷Pathian lekha thu dangin, “An isunna kha la en an ti,” a ti saa.

³⁸Kha zoi hnung chu Arimathai khuaa om Josefa, Jisua irchutir, Judahai a chi sika irthuptu khan, Pilata kuang Jisua ruak la hrangin a ngêna. Pilata’n a lei phal pea. Khanchu, a ruak kha a va lâka.

³⁹Nikodema, zâna a kuanga hongtu kha mura le aloe irpolsai, her sômthum dôr chôiin a honga.

⁴⁰An inhni khan Jisua ruak kha an lâka, Judahai irphûm dân angin thil mirimhoihai leh khan puan irnêm silin an tuama.

⁴¹Ama an hembêna hmuna khan irhuan a oma; irhuana khan thân thar, tûte lan zâlna ngai loi a oma.

⁴²Judahai irtûng ni a ni sikin le thân kha an kôl renga om a nia, Jisua kha an phûm ta.