Read Hrangkhol JOHANA 2 Bible Online

JOHANA 2 - Hrangkhol bible

JOHANA 2

¹Sûn thum nî’n chu Galili ram Kana khuaa irneina a oma, kha khan Jisua nu a om saa.

²Jisua le irchutirhai khom irneinaa khan an fiala.

³Uain ruk ta mahaia, Jisua nu khan a kuang, “Uain an irsam tâk kêng,” a tia.

⁴Jisua’n a sâma, “Nupang ithoa mo ni hong irrol? ki zoro a la itung loi kêng,” a tia.

⁵A nu khan sinthotuhai kuang, “Nin kuang nangni a ihril lam ang takin tho zôi zel roi,” a tia.

⁶Judahai irsûkinfâi dân angin, lung tuibêl kiruk oma, litar irzakhat keng theina chit a ni, kha lung tuibêlhai kha an doa.

⁷Jisua’n an kuang, “Tui bêlhai hin tui sung roi,” a tia. A rêngin an sung insiphaia.

⁸Khanchu an kuang, “Thâl unglân, hruaithea hruaitu kuang fepui roi,” a tia. Khanchu an fepui tâka.

⁹Khaang khan tui kha an hong chôia, uain a hong chang tâka, hruaithea hruaitu khan tui uain chang kha a’rtema, uain kha kho taka mani inhre maka; (khannisianlân tui thâltuhai khan chu an inhriata,) moineitu kha a koia,

¹⁰a kuang, “Mi tinin uain sa an sem masaa, tamtak an in zoiin a saloi ual an sem ngaia, nang chu atûn ten uain sa ni la inei hi te,” a tia.

¹¹Jisua’n hi sinirkhêl a itho phutna hi Galili rama Kana khuaa a thoa, a roiinpuizia an langtira, a irchutirhai khan ama an iam tâka.

¹²Kha zoi hnunga chu, Jisua kha a nu le a urênghai le a irchutirhai le Kapernaum khuaa an zu fea, kha khan nikhua tômte vai an châm.

¹³Judahai Ferkân Kût zoro a hong tung vâng vâng tâka, Jisua kha Jerusalema a hong fea.

¹⁴Tempila khan sehrât, belra, phervalihai an izuar kha a hmuhaia, sum thûltuhai an maichâm kôla toi a hmu saa.

¹⁵Zêmna hruihrual ang hi a siama, an bêlrahai, sehrâthai, sa dang murdi leh khan an hnot suakhai zita; sum thûltuhai maichâmhai kha a naminrîla, an poisahai kha an thekpai pehaia.

¹⁶Khanchu phervali zuartuhai kuang khan, “Hi hi la suak roi, Ka Pa in hi bazar hmunin siam no roi,” a tia.

¹⁷A irchutirhai khan, “Ni in hranga ki sathnem irngaina khan mi fa zoi a ti,” tih Pathian lekha thu kha an inhriat suak nôk tâka.

¹⁸Judahai khan an hong irkôka, “Hi thilthotheina ni nei ti entîrna hrangin i irsinsiana sinirkhêl mo ni ni inentir hrang?” an tia.

¹⁹Jisua’n, “Hi Tempil hi set unglân, sûn thum sûngin indingtir nôk ki ti,” a tia.

²⁰Judahai khan, “Sûn thum sûngin ni indingtir nôk hrang mo? Hi Tempil sinna hranga hin kum sômminli kiruk a inang kêng,” an tia.

²¹Khannisianlân, Jisua’n tempil a iti hi ama takpum a ni.

²²Khasikin thina irthokin a thoinôkin chu, a irchutirhaiin hi thu hi a lei insîr zoi tâk ti an inhriat suaka, Pathian Lekha Thu le Jisua thu insîr tâkhai kha an iam tâka.

²³Ferkân Kût Jerusalema a om laia Jisua’n irsinsiana sinirkhêl a ithohai kha an hmua, mi tamtakin ama kha an iam tâka.

²⁴Khannisianlân, Jisua’n anni kha iamhai maka, mi murdi an hriat infelhai tak tak sikin.

²⁵Mi thurchi tûte’n inhril ngai mahai, an milung sûnga om murdi kha a inhriat zit a ni.