Read Hrangkhol JOHANA 3 Bible Online

JOHANA 3 - Hrangkhol bible

JOHANA 3

¹Mi inkhat ar hming Nikodema a oma, Judahai hruaitu, Farisai pâla mi a ni.

²Zân khat chu Jisua kuang a honga, a kuang, “Rabbi, Pathian itîr irchutirtu ni nih ti kin hriat, Pathian an chunga a om no’n chu tukhomin ni irsinsiana sinirkhêl tho ang hi tho thei no nihai,” a tia.

³Jisua’n a sâma, “Thudik tak nang ki hril, mi tukhom a suakinthar no’n chu Pathian Ram hmu thei no ni,” a tia.

⁴Nikodema khan, “Mi a tar hnungin itin mo a isuakinthar nôk thei hrang? A nu sûnga lûtin lak suak nôk thei ta no nia?” a tia.

⁵Jisua’n, “Thudik nang hril ki ti, mi tukhom tuia le irthaa an suak no’n chu Pathian Rama lût thei no ni.

⁶Taksaa irzir ka chu taksa mi a nia, irthaa irzir ka chu irthaa mi a ni.

⁷Ni isuak nôk hrang kêng ki iti hi ar khêl ti no roh.

⁸Phâivua khoa khom a nuam nuamna a tho ngai; ar hâi nin hriat, khannisianlân, kho tianga hong mani tih le kho tiang mo a ife nôk hrang ti chu inhre mak che. Tukhom Irthaa suak ka chu khaang kha a ni,” a tia.

⁹Nikodema’n, “Kha kha itin mo a ini thei hrang?” a tia.

¹⁰Jisua’n a kuang, “Israelhai irchutirtu ni nia, kha kha ni inhriat loi mo?

¹¹Thudik nang hril ki ti, kin inhriat kha kin insîra, kin ihmu kha kin inhriattir ngai, tûte’n kin thu inhriattir pom nuam mak chêi.

¹²Rammual thil ki insîr lua iam mak chêia, irvân thil len vâng te nangni hril inlân itin mo nin iiam thei hrang?

¹³Tukhom irvâna kâi ngai maka, Mihriam Nâipa, irvân ata zuang chumtu vai ti no chu,” a tia.

¹⁴Mosia’n ramchâra mirûl a inkhâi ang khan Mihriam Nâipa hi inkhâiin a iom hrang a ni.

¹⁵Tukhom a iam murdi chu ama sika kumtuang hringna an nei theina hrangin.

¹⁶Pathianin rammual lung a thung tak taka, khanchu, a Nâipa khât neisun a pêka, ama iam tâk ka chu irhmang loia kumtuang hringna an neina hrangin.

¹⁷Pathian khan rammual thiamloi inchang hrangin a Nâipa rammuala tîr maka, ama sika rammual saninhringa an om theina hrangin a itîr kêng a ni.

¹⁸Tukhom Pathian Nâipa iam ka chu atûn ata thiamloiin om mahaia, tukhom Nâipa iamloi chu atûn ata thiamloiin an iom tâk a ni. Pathian Nâipa khât kha an iam no sikin.

¹⁹Thiamno an chang dân kha hiang hin a ni; vâr kha rammuala a zuanga, khannisianlân, mihaiin vâr nêkin chu inthim kha an nuam ual, thil sual an tho sikin.

²⁰Thil sual tho murdi’n vâr an khôkmâk ngaia, vâra hong mahai, an sinthohai an lang nona hrangin.

²¹Sin dik thohai murdi’n vâra an hong ngai, an sinthohai kha Pathian thu zôma tho an nih ti an langna hrangin.

²²Kha zoi hnunga chu Jisua le a irchutirhai kha Judai rama an fea. Kha khan Jisua an kuang a om maia, a baptis-hai ngaia.

²³Johana khomin Salem kôla Ainon hmuna a baptis thiaia. Kha hmuna khan tui a tam sikin, mipuihai a kuang an fea, a lei baptis-hai ngaia.

²⁴Kha zoro lai khan Johana kha intângna ina la khum mahai.

²⁵Johana irchutir senkhathai le Juda inkhat irsûkinfâi thua an lei irsêl tâka.

²⁶Khanchu, Johana kuang an fea, “Irchutirtu, Jordan râl nisua tianga ni kuanga om, thurchi ni insîr ngai kha ni lan hriat mo? Khapa khan mi a baptisa, mipuiin an pan sup sup ngai,” an tia.

²⁷Johana’n a sâma, “Pathianin a pêk no’n chu tukhomin ite dong thei mahai.

²⁸‘Kei chu Krista ni ma unga, a mân tianga fe hranga tîr ki ni’ ki iti kha nangni ngei ki thu inhretuhai nin ni.

²⁹Moi pasal chu moineitu kha a ni, moi neitu rual, a thu hong uksak maitu khan moineitu irhai an hriatin a lôm ngai, khaang khan kei khom ki lôm ar kip tâk a ni.

³⁰Ama chu roiinpui tîr tîr hrang a nia. Kei chu chîn tîr tîr hrang ki ni,” a tia.

³¹Chung tiang ata zuang chumtu kha chu mi tin tin nêka an chung tak a ni; irnênga suak chu irnênga mi a nia, irnêng thil an sîr ngai; irvân ata zuang chu mi murdi nêka inchung tak a ni.

³²Thil a ihmu le a inhriathai kha an sîra, khannisianlân, tukhomin a thu inhriattir kha pom mahai.

³³Tukhom a thu inhriattir pom chu mi dik a nih ti pom indet a ni.

³⁴Pathian itîr khan Pathian thu an sîr ngai, Pathianin ama Irtha irkip a pêk sikin.

³⁵Pa’n Nâipa lung a thunga, a kuta itinrêng a sia ta.

³⁶Tukhom Nâipa iam chu kumtuang hringna an nei ta; Nâipa thu zôm loi chu hringna nei no nihaia, an chunga Pathian ningmur kha a om mai a tia.