Read Hrangkhol JOHANA 5 Bible Online

JOHANA 5 - Hrangkhol bible

JOHANA 5

¹Kha zoi hnung chu Judahai kût inkhat a oma, Jisua khom Jerusalema a hong fe saa.

²Jerusalema khan Belra mikot kôla dîl inkhat, Hebrai chonga Bethzatha an iti kha a oma; khataka khan bokrop ringa a oma,

³Kha khan damloi tamtak, mitchohai, ke’nbâihai, zenginthihai an oma.

⁴Rengpa itîr vântîrtônin tui a zun chânga. Tui a châng zoi le dîla irchôm masa tak kha i ang natna khom ni sian, an dam ngai sikin tui châng nghâkin an iom a ni.

⁵Mi inkhat, kum sômthum kiriat damloi khom a oma.

⁶Jisua’n khataka a zâl kha a hmua, zoro sôt tak damloiin a om tah ti an hriata, a kuang, “Dam mo ni nuam?” a tia.

⁷Damno khan, “Ka pu, tui a châng zoi leh dîla ni siatu hrang tukhom nei ma unga, lût ki tum sûngin mi dangin an ni khêl ngai a ni,” a tia.

⁸Jisua’n, “Thoiin lân, ni puantha lan lân ke’n fe ta roh,” a tia.

⁹Kha pa kha irningloiin a hong dam zôi zela; a puantha kha a lâka, ke’n a fe tâka. kha nikhua kha Sabat nî a ni.

¹⁰Judahaiin a damtu kuanga khan, “Sabat nî a ini kêng; ei Dânin ni puantha ni ichôi irthiang mah,” an ti pea.

¹¹Ama khan a sâma, “A nin damtirpu khan, ‘Ni puantha lan lân, ke’n fe ta roh,’ a ni ti khate,” a tia.

¹²Anni’n, “Ni puantha lan lân, ke’n fe roh, titu kha tu ma ni?” an tia.

¹³A hong damtu khan tu mo a ini lak inhre maka, kha khan mipui tamtak an oma, Jisua laka chu a fe pat tâka.

¹⁴Kha zoi hnunga chu Jisua’n Tempila a hmua, a kuang, “Hi, ni hong idam tâk hi; sual nôk ta no roh, khano’nchu, ni chunga thil saloi ual hong tungna ti,” a tia.

¹⁵Kha pa khan ama indamtirtu kha Jisua a nih ti Judahai kha a va hril tâka.

¹⁶Khasika khan Judahaiin Jisua kha deng an intheitir irphut tâka, Sabat ni’n mi an damtir ti sikin.

¹⁷Jisua’n an kuang, “Atûn ten Ka Pa’n sin a tho maia, kei khomin ama angin ki isin a ni,” a tia.

¹⁸Khasika khan Judahaiin ama kha that an tum nôk uala, Sabat nî a insiat vai ni loiin, Pathian kha “Ka Pa a ni,” a tia Pathian angin ar bê sikin.

¹⁹Jisua’n a sâmhaia, “Thudik tak nangni ki ihril hi, Nâipa’n ama thu’n ite tho thei mah; Pa sintho a ihmu ti no chu; Pa sintho ang kha Nâipa khomin a itho ngai a ni.

²⁰Pa’n Nâipa lung a thunga, a sintho tinrêng an entira. Hi nêka thil roiinpui ual hi lan entir a ti, ar khêl nin tihna hrangin.

²¹Pa’n mithihai a kaithoia, a inhring ang dênin Nâipa khomin a inuam murdi chu an hringtir ngai.

²²Pa’n tu chungthu khom rêl pe ngai mah, Nâipa kuang roirêlna kha a inhlan zit a ni,

²³mi murdi’n Pa an imahrip angin Nâipa khom mahrip an ti. Tukhom Nâipa mahrip loi chu ama tîrtu Pa khom an imahrip loi a ni.

²⁴“Thudik nangni ki hril, tukhom ki thu inhriata, a ni tîrtu iam chu kumtuang hringna a nei ta, thiamno changin om ta no nia, thina ata hringnaa a ilût tâk a ni.

²⁵Thudik nangni ki hril, a zoro tung a ti, atûn khom a tung thiai ta; kha tika chu mithihaiin Pathian Nâipa hnukirhai inhriat an ta, an hriathai kha hring an ti.

²⁶Pa chu hringna hnâr a ini angin Nâipa khom kha hringna hnâr nina a ipêk a ni.

²⁷Mihriam Nâipa a ni sikin roirêl theina a ipêk sa a ni.

²⁸“Kha kha ar khêl ti no roi, thâna mithi murdi’n a hnukirhai an inhriat zoro la tung a ti,

²⁹Khan, thân ata hong suak an ta, sin sa thotuhai chu hringna neiin hong thoi nôk an ta, sual thotuhai chu thiamloi chang hrangin thoi nôk an ti.

³⁰“Ki bingin ite tho thei ma ung; Pathianin a ni ihril ang takin roi ki rêla, ki roirêl khom a dik, keima nuamlam tho tum loiin a ni tîrtu nuamlam vai tho ki tum ual sikin.

³¹Mâni thurchi inhriattir ni inlân, ki thu inhriattir kha dikloi a ni.

³²Khannisianlân, mi dang ki thu inhriattirtu a om, ki thu a inhriattir kha a dik ti khom kin hriat.

³³Johana kuang mi nin tîra, ama’n thutak a lei inhriattir a ni.

³⁴Thu ki inhriattir hi mihriama irthoka ni maka; khannisianlân, saninhringa nin om theina hrangin hi thu hi ki ihril a ni.

³⁵Johana chu meiser chok tak le vâr tak ang a nia, a vâra raifân taka hong om chot khom nin nuama.

³⁶Khannisianlân, Johana thu inhriatpuina nêka inhriatpuitu poimo ual ki nei, Pa’n sintho hranga a ni ipêkhai, atûna ki ithohai hin Pa’n keima a ni tîr ngei a nih ti an hriattir.

³⁷Pa ni tîrtu ngei khom khan ki thu an hriat ta a ni. Nangni’n itiklai khom a hnukirhai inhre ngai mak chêi, a hmêl khom hmu ngai mak chêi.

³⁸A thu khom nin milunga vong chian mak chêia, a itîrtu hi nin iam no sikin.

³⁹Pathian Lekha Thu ngûk takin nin irchu ngai, a sûnga kumtuang hringna a om ti nin iam sikin. Kha Pathian Thubuhai khan ki thu inhriattirtu chu an ni.

⁴⁰Khannisianlân, hringna nei hrangin ki kuang hong nuam mak chêia.

⁴¹“Mihriam inpâk zong ma ung.

⁴²Nangni kin hriat, nin milunga Pathian lungthungna zel nei mak chêi.

⁴³Ka Pa irchamin ki zuanga, khannisianlân ni lei lôm mak chêi; mâni irchamin tu mo khat zuang sianlân lei lôm nin ti.

⁴⁴Pathian rengata inpâkna dong tum loiin irpâkirhlôm nin nuama, itin mo nin iiam thei hrang?

⁴⁵Ka Pa kuang nangni hnôl ki ti sôn no roi. Nangni a hnôltu hrang chu Mosia a ni, nin iiam kha.

⁴⁶Mosia kha nin lei iam ni sian chu kei khom ni iam nin ta, ki thurchi kêng a irziak.

⁴⁷A thu irziak kha nin iam zel no’n chu ki thu’nsîr hi itin mo nin iiam thei hrang?” a tia.