Read Hrangkhol JOHANA 7 Bible Online

JOHANA 7 - Hrangkhol bible

JOHANA 7

¹Kha zoi chu Jisua’n Galili ram ar fanga, Judahaiin that an tum sikin Judai ram irfang nuam maka.

³Jisua urênghaiin chu a kuang, “Hi hmun hi suaksanin lân, Judai rama fe ro, ni irchutirhaiin ni sintho hi an hmu theina hrangin.

⁴Tukhomin irhming inthang nuam sikin inrûkin sintho ngai mahai. Hi sin hi ni tho lele’n chu rammual hmua hin inlang ro,” an tia.

⁵A urênghai khom khan iam mahaia.

⁶Jisua’n an kuang, “Ki zoro la tung ma, nangni zoro chu itiklai khomin a tung mai.

⁷Rammualin nangni khôkmâk thei maka, kei chu a ni khôkmâk, an sin thohai sa mah ti kin hriattir ngai sikin.

⁸Kûta hong fe roi. Kei chu atûn chu la hong fe no ning; ki zoro a la tung no sikin,” a tia.

⁹Khaang khan an sîra, Galili rama a la om maia.

¹⁰A urênghaiin kût hmang hranga an kâi zoi hnung chu ama khom inrûkin a hong fe saa.

¹¹Judahaiin kût hmuna khan ama kha an zonga, “Khôn mo a iom?” an tia.

¹²Mipui khan a chungchâng an insîr sup supa. Senkhatin, “Mihriam sa a ni,” an tia, senkhatin, “Ni mah, mipui a hruai insual kêng,” an tia.

¹³Judahai an chi sikin, thangphuangin chu tukhomin a chungchâng insîr mahai.

¹⁴Kût an hmang lai takin Jisua kha tempila a kâia, ar chutirhaia.

¹⁵Judahai khan, “Hi mi hi irchu loiin itin mo lekha a ithei?” an tia, a sân ar khêl an tia.

¹⁶Jisua’n anni kha a sâmhaia, “Ki thu irchutir hi keima irchutirna ni maka, a ni tîrtu irchutirna a ni.

¹⁷Tukhom Pathian nuamlam tho nuam chu, ki thu irchutir hi Pathian kuang ata mo, keima iphuachôp moh ti inhria an ti.

¹⁸Tukhom mâni iphuachôpa thu insîrtu chu mâni roiinpuina a izong a ni. Khannisian a tîrtu roiinpuina zongtu chu iam a oma, amaa dik loina rêng rêng om mah.

¹⁹Mosia’n Dân kha nangni a ipêk loi ma ni? khannisianlân, nin laia tukhomin Dân chu zôm mak chêi. Ithoa mo ni that nin itum?” a tia.

²⁰Mipui khan an sâma, “Ramilhli ichel ni ni hi te; tu mo nang that nang tum?” an tia.

²¹Jisua’n anni kha a sâma, “Thil inkhat ki thoa, nin rêngin ar khêl nin ti.

²²Mosia’n sertan thu nangni a pêk sikin (Mosia insuaktir ni mah, nin irchibulhai insuaktir kêng). Khasikin, Sabat nî khomin ser nin tan ngai.

²³Mosia Dân porinchetir loina hrangin Sabat nî khoma ser nin tan ngaiin te, ithoa mo Sabat ni’n mi kin damtir sikin, ki chunga nin ning nin inmurtir bîk?

²⁴Pên tianga inlang dân ngot enin ngaitua no unglân, a ni dân dik takin ngaitua ual roi,” a tia.

²⁵Jerusalema mi senkhathaiin chu, “Hi mi hi that an itum kha ni ma mo?

²⁶En u ta, thangphuangin thu an sîra, tukhomin sêl mahai. Kûthai hin ama hi Krista chu ni ngeiin an inhriat ta tihna mo a ini hrang?

²⁷Hi pa hi kho tianga mi mo a ini lak ei inhriata; Krista chu a zuang tika chu kho taka mi mo a ini tukhomin inhre no nihai,” an tia.

²⁸Jisua’n khaanga Tempila ar chutir lai khan hnukirhai inring takin, “Keima nin nin hriata, kho taka mi mo ki ini khom nin inhriat. Khannisianlân, mâni thua zuang ni ma ung. A ni tîrpu chu mi diktak a ni, ama chu inhre mak chêi.

²⁹keima’n chu kin hriat, a ni tîra, a kuang ata zuang ki ni sikin,” a tia.

³⁰Khanchu chel an tuma, khannisianlân, a zoro a la hong tung no sikin tûte’n tôn thei mahai.

³¹Mipui laia tamtakin an iama, “Krista a zuang tika hi pa itho nêka tam ual sinirkhêl a zuang itho hrang ma ni?” an tia.

³²Farisaihaiin chu a chungchâng mipuiin inrûka an insîr sup sup kha an inhriata, Ochai inlalhai le Farisaihai khan Jisua chel hrangin enkoltuhai an tîr tâka.

³³Khanchu, Jisua’n, “Zoro sôtnote nin kuanga la om ki ta, kha zoiin a ni tîrtu kuang fe ki ti.

³⁴Nangni’n ni zong nin ta, ni hmu no chin ni, ki omna hranga fe thei no chin ni,” a tia.

³⁵Juda thuneituhai khan, “Khôn mo a fea, ei ihmu ta loi hrang? Ei mihai Grik khopuia fea, Grikhai irchutir a itum ma ni?

³⁶Nangni’n ni zong nin ta ni hmu no chin ni, ki fena hranga khom hong thei no chin ni, a itihai hi i tihna ma ni?” tiin an irti irhlôma.

³⁷Kût hnungkhôn taka, nikhua roiinpui taka khan Jisua a ngîra, hnukirhai inring takin a khêka, “Tukhom tuiinhrâl ka chu ki kuang hong sianlân, in ri se.

³⁸Pathian lekha thu’n a insîr angin, tukhom keima ni iam chu a milung ata tui hring dunghai zuang suak a ti” a tia.

³⁹Kha kha Irtha, ama iamtuhaiin an la idong hrang kha a insîrna a ni; Jisua kha roiinpuia a la om no sikin Irtha kha pêk a la ini loi a ni.

⁴⁰Mipui laia senkhatin kha thuhai kha an inhriatin chu, “Hi pa hi deipu chu a ni ngêt,” an tia.

⁴¹Mi dangin, “Krista chu a ni,” an tia. Senkhatin chu, “Krista chu Galili ram ata a izuang hrang mo?

⁴²‘Krista chu Davida irchi, Davida omna Bethlehem khuaa zuang suak hrang a ni’ Pathian lekha thu’n a iti mo ni ma?” an tia.

⁴³Khanchu, ama sikin mipui laia irsenna a hong om ta.

⁴⁴An laia senkhatin ama chel an tuma, khannisianlân, tûte’n tôn mahai.

⁴⁵Enkoltu sipai chu Ochai inlalhai le Farisaihai kuang khan an kîr nôka, anni khan, “Ithoa mo nin hong ihruai loi?” an tia.

⁴⁶Enkolpu sipaihai khan an sâma, “Hi pa thu’nsîr ang hin tûte’n thu lan sîr ngai mahai,” an tia.

⁴⁷Farisaihai khan an sâma, “Nangni khom nangni a lei ihuang ma ni?

⁴⁸Hruaituhai le Farisaihai laia inkhat luan ama iam mahai ti nin inhriat loi mo?

⁴⁹Hi mipui, Mosia Dân inhre loihai hi Pathianin khua a isâlhai kêng,” an tia.

⁵⁰Farisaihai laia, mi inkhat Nikodema, matona Jisua leh irhmu hranga fepu kha a om saa. Ama khan an kuang,

⁵¹“Ei dânin chu mi tukhom a chongbâi suak ei inhriat mân le a sintho ei hmu suak mân chu thiamno inchangtir thei mak me,” a tia.

⁵²Anni’n an sâma, “Nang khom Galili mi ni ini loi mo? Pathian lekha thu ngûk takin tepin lân, Galili ram ata deipu suak ngai mahai tih inhria ni ti,” an tia.

⁵³Khan, mi tin mâni in senga an fe tâka.