Read Hrangkhol JOHANA 9 Bible Online

JOHANA 9 - Hrangkhol bible

JOHANA 9

¹Khan, Jisua chu a fe malamin mi inkhat mitcho saia suak a hmua.

²A irchutirhai khan, “Rabbi, mitcho saia a isuak hi tu’n mo thil a tho’n sual, hi mi hin mo a nu le a pa’n mo?” an tia.

³Jisua’n a sâma, “Hi pa hin tho’nsual mah, a nu le pa khomin tho’nsual ual mahai, amaa Pathian sintho an lang theina hranga a ni.

⁴Sûn a ni lai hin a ni tîrtu sin hi ei itho hrang a ni. Zân ni hrang a ni ta tûte’n sin thei ta no nihai.

⁵Rammuala ki om sûng hin rammual vâr ki ni,” a tia.

⁶Kha kha an sîr zoiin irnêng an chila, kha khan pilpok a siama, a mita a pola,

⁷“Siloam dîla va’rsu roh,” a tia. Siloam chu “Tîr” tihna a ni. Khanchu a va fea, a va’rsûka, mit vârin a hong kîr nôk tâka.

⁸A tualbômhai le matona a kutdo lei hmu ngaihai khan, “Hi pa hi kutdoa toi ngai kha mo ni ma?” an tia.

⁹Senkhatin, “A ni khate,” an tia. Mi dangin, “Ni mah, ar angpui kêng,” an tia. Kha pa khan, “Kha mi kha ki ni,” a tia.

¹⁰Anni’n, “Itin mo ni mit a ivâr tâk lam?” an tia.

¹¹Ama khan, “Mi inkhat, Jisua an iti khan pilpok a siama, ki mita a pola, ‘Siloam dîla fe’n lân, va’rsûk roh,’ a ni tia. Khanchu, ki va’rsûka, ki hong ihmu thei zel tâk a ni,” a tia.

¹²Anni khan, “Khôn mo a iom?” an tia. “Inhre ma ung,” tiin a sâmhaia.

¹³Khanchu, mitcho lei ni ngai kha Farisaihai kuang an hruaia,

¹⁴Jisua’n pilpok a siama, a mit a invârtir pe nî kha Sabat nikhua a nia.

¹⁵Farisaihai khan a hong ihmu thei tâk lam kha an irdon nôka. Ama khan, “Ki mita pilpok a pola, ki’rsûka ki ihmu thei tâk a ni,” a tia.

¹⁶Farisaihai laia mi senkhatin, “Hi pa hi Pathian ata zuang suak ni ma, Sabat a ser no sikin,” an tia. Senkhatin chu, “Mi sualin itin mo hiang sinirkhêl a itho thei hrang?” an tia. An laia irsenna a hong om tâka.

¹⁷Mitcho kuang khan, “Ama kha i ang mi’n mo ni ibe, ni mit nang an vârtir pea?” an tia. Ama khan, “Deipu a ni,” a tia.

¹⁸Khannisian, Juda ulianhai khan kha mi kha mitcho saia suak a nia, atûn chu mit vârna a hmu a nih ti iam thei mahai sikin, a nu le pahai an koia, an kuang,

¹⁹“Hi pa hi nin nâipa, mitcho saia suak nin iti kha ma ni? Itina a hong ihmu thei tâk mo?” tiin an irdonhaia.

²⁰A nu le pa khan an sâma, “Hi pa hi kin nâipa a nia, mitcho saia suak a ni.

²¹Itina a ihong hmu thei tâk mani chu inhre ma ung, a mit invârtir petu khom inhre ma ung; irdon roi, puihling a ni tâka, a chungchâng thu insîr ri se,” an tia.

²²A nu le pahai khan Judahai an chi sika khaanga an iti a ni; Judahaiin chu, “Ama kha Krista a nih,” ti a pom murdi chu Sinagok ata inhnot suak hrangin an le’rsiam diam tâka.

²³Khasikin kêng a nu le pa’n, “Puihling a ni khate, ama irdon roi,” an itihna a ni.

²⁴Khan, mitcho lei ni ngaitu kha a voi hnina an koi nôka, a kuang, “Pathian makunga thudik hril hrangin inkungna nei ro! Nang indampu kha mi sual a nih ti kin inhriat,” an tia.

²⁵Ama khan a sâmhaia, “Mi sual a ni le ni loi inhre ma ung, thil inkhat kin hriat, mitcho ki lei ni ngaia, atûn chu ki hmu thei ta,” a tia.

²⁶Anni khan, “Itin mo nang a ti? Ni mit itin mo a invârtir?” an tia.

²⁷Ama khan, “Nangni ki hril tâka, irngai nuam mak chêi; ithoa mo nin inhriat nuam nôk tâk? Nangni khom a irchutirhai nin ini nuam mo?” a tia.

²⁸Anni khan an ngo tâka, “Nang hi, kha pa irchutir kha ni nia, keini chu Mosia irchutirhai kin ini kêng.

²⁹Pathianin Mosia a chongpui tih kin inhriat, hi mi hi chu kho taka mi mani inhre viat ma ung,” an tia.

³⁰Kha pa khan a sâma, “Khatak kha ar khêlna chu, kho taka mi mani inhre mak chêia, ki mit a invârtir hi!

³¹Pathianin mi sual chong irngai nuam mah ti ei inhriat; khannisianlân, Pathian ngaisaka, a nuamlam thotuhai chong chu ar ngaitua ngai.

³²Rammual irsiang ata mitcho saia suak mit invârtir ngai tukhomin inhre mahai.

³³Hi pa hi Pathian ata zuang suak a ni no’nte ite tho thei no ni,” a tia.

³⁴Anni khan an sâm nôka, “Sual pumpuia suak mo ni mak che, ni’rchutir ni itum?” an tia. Khanchu an inhnot suak tâka.

³⁵An inhnot suak tih Jisua’n a lei inhriatin, a va zong suaka, a kuang, “Mihriam Nâipa hi ni iam mo?” tiin ar dona.

³⁶Kha pa khan a sâma, “Ka pu, tu mo a ini ni hril roh, ki iam theina hrangin,” a tia.

³⁷Jisua’n, “Ni hmu chian tâka, nang a chongpui maipu hi a ni hi te,” a tia.

³⁸“Rengpa, ki iam” tiin khûksadelin chubai a mûk tâka.

³⁹Jisua’n, “Roirêl hrangin hi rammuala zuang ki ni, mitchohaiin an hong hmu theia, mit vârhaiin mitcho an hong ni theina hrangin,” a tia.

⁴⁰A kôla Farisai omhai khan kha kha an inhriatin a kuang, “Keini khom mitcho mo kin ini?” an tia.

⁴¹Jisua’n an kuang, “Mitcho nin ni’n chu, sual nei no chin ni; khannisian, ‘Kin hmu thei hi te’ nin ti sikin, nin sual kha a iom chian a ni,” a tia.