Read Hrangkhol TÎRTÔNHAI SINTHO 1 Bible Online

TÎRTÔNHAI SINTHO 1 - Hrangkhol bible

TÎRTÔNHAI SINTHO 1

¹Theofil, ki lekha masaa khan Jisua sintho irphut thu ata irvâna ilâka a om dêna a sintho le a thu irchutir murdi ki’rziak tâka;

²a tîrtôn inthanghai kha Irtha Irthiang hmangin chong a bêhaia, irvân tiang ihruaiin a om nî tena thu kha;

³a thi zoiin a hring nôk tih inhriatna hrangin irhmâi loiin voi tamtak an kuang an lâra, sûn sômminli sûng kha Pathian Ram thu insîrin an lâr ngai.

⁴An laia a om laiin “Jerusalem khua suaksan no roi Pa inkung nangni ki ihril kha lei nghâk roi, a tia.

⁵Johana khan tuiin nangni a baptis ngaia, khannisianlân nangni chu sûn sôtnotea Irtha Irthianga baptis ni nin ti” tiin a hrila.

⁶Khan, tîrtônhai kha Jisua leh an irbukkhômin chu, “Rengpa, atûn hin mo Israelhai ram ni inding nôk hrang?” tiin an irdona.

⁷Jisua’n an kuang, “Pa’n a zoro le nikhua, ama ircham chama om hranga a isia chu nangni lei inhriat zât ni mah.

⁸Khannisianlân, Irtha Irthiang nin chunga a zuang tung tika sinthotheina la nei nin ti; khanchu, Jerusalema, Judai le Samari ram pumpuihaia kôlkung dênin ki thu inhretuhai nin ini hrang a ni,” a tia.

⁹Khan, kha thu kha an sîr zoiin chu an en chian laiin irvâna hruai a nia, sûmin an ihmu phâk loia a lâk irhmang tâka.

¹⁰Khaanga irvâna a kâi an thîr mai laiin mi inhni puan chek sil an kuang an zuang ngîra.

¹¹Kha mihai khan, “Galili mihaio, ithoa mo irvân tiang enin nin ingîr mai? Hi Jisua nin kuang ata irvâna lâkpai hi irvâna a ikâi nin hmu ang takin zuang nôk a ti” an tia.

¹²Khanchu, tîrtônhai kha oliv tânga irthokin Jerusalema an kîr nôk tâka, kha tâng kha Jerusalem ata kilometar khat vêl a ni.

¹³Khua an lûtin chu an tungna chontan chunginta an kâia; khahai kha Petera, Johana, Jakoba, Andria, Filipa, Thoma, Bartholomaia, Mathaia, Alfaia nâipa Jakoba, Zelota pâla om Simona le Jakoba nâipa Juda hai an ni.

¹⁴An rêng khan nupanghai le Jisua nu Mari le Jisua urênghai le lungrual takin an chongchai ngai.

¹⁵Sûn tômte hnunga chu, iamtuhai irbukkhômna an neia, an rêngin irzakhat sômhni vêl an ni, khahai laia khan Petera chu a ngîra, an kuang,

¹⁶“Urênghaio, Irtha Irthiangin Jisua cheltuhai hruaitu Juda thu Davida bâia a lei insîr, Pathian Lekha thu kha, a hong itung hrang pial a ni.

¹⁷Ama kha ei laia a kop sa ngaia, ei sinthônaa hin khom dongtum nei hranga inthang sa a ni,” a tia.

¹⁸Ama khan a thilsual thôna manin hmun inkhat a lâka, a tâk thata, a phîng chetin a rîl murdi a suak zita.

¹⁹Kha thu kha Jerusalema om murdi’n an inhriata, kha hmun kha anni chongin “Akeldama” an tia, kha kha “Thisen hmun” tihna a ni.

²⁰Inpâkna hla bua hiang hin irziak a ni. ‘A in le loi kha ram sianlân, A sûnga tûte om no ri se,’ ti le ‘A hruaitu nina kha mi dangin chang ri se,’ ti hi.

²¹Khanchu, ei Rengpa Jisua leh ei om laia ei laia kop sa ngai,

²²“Baptistu Johana zoro ata irvâna a ni kâisan ni dêna kop ngai, mi inkhat, a thoinôkna nin hriatpuitu hrangin ei inthang suak hrang a ni” a tia.

²³Khanchu, mi inhni, Josefa, Barsaba an iti, (Justa khom an iti sa ngai) le Mathia an inkunga.

²⁴Kha hnung chu an chongchaia, “Rengpa, nang mihriam murdi lungrîl inhretu, hihai hi a tu khôk hi mo ni inthang nin hriattir roh.

²⁵Juda’n ama hmuna a fe theina hranga hi tîrtôn sin a imâk rak hmun thûl hrangin,” an tia.

²⁶An inhnia chunga khan tâ an sâna, an tasân chu Mathia chunga a chuma, Mathia kha tîrtôn sômhleihnihai laia khan tep sa a ni ta.