Read Hrangkhol TÎRTÔNHAI SINTHO 10 Bible Online

TÎRTÔNHAI SINTHO 10 - Hrangkhol bible

TÎRTÔNHAI SINTHO 10

¹Khan, Kaisari khuaa mi inkhat, Kornelia, Itali sipai pâl an itia sipai irza hruaitu a oma.

²Ama kha Pathian ngaisak mi a nia, a in sûng mihai an rêngin Pathian chi mi an ni. Pathian kuang a chongchai mai ngaia.

³Sûn khat chu chohnung dâr thuma, fel takin inlârna a hmua, Pathian itîr vântîrtôn inkhat a kuang a hong lûta, “Korneli” a hong tia.

⁴Kornelia khan ama kha a en chiana, a chia, “Rengpa, i mani?” a tia. Vântîrtôn khan, “Ni chongchaina le ni thil pêkhai kha Pathianin an hriat chian a ni.

⁵Atûn hin Jopa khuaa mi tîrin lân, mi inkhat, Simona, Petera an iti kha inkoitir roh.

⁶Ama chu, tuipui kôla, savun siamtu Simona ina a tung,” a tia.

⁷A chongpuitu vântîrtôn kha a fe zoi le, Kornelia khan a siahlohai laia mi inhni le sipai inkhat, Pathian irngaisak tak, a tîrtôn ngai bîk laia mi kha a koia.

⁸Thil omzia murdi kha a hrila, Jopa khuaa khan a tîr tâka.

⁹Khan, a tûk sûn laia, kha mihai khua an tung tôn chu Petera kha chongchai hrangin in chung zôla a luia.

¹⁰A sân a phîng a châma, bu nêk a nuama, khannisian nêk hrang an siam lai takin inlârna a hmua.

¹¹Irvân irhongin i mani puan lianpa ang kha, a kil minlia thunga irvâna irthokin zuang tâkin a hmua.

¹²Kha sûnga khan sa ke minli chi tinrênghai a lôn ngai chi tinrênghai le va chi tinrênghai an hmutira.

¹³A kuang hnuk irhâiin, “Peter, thoi roh, thatin lân fa roh,” a tia.

¹⁴Petera’n, “Ni mah, Rengpa, irthiang loi le porinche ite fa ngai ma ung,” a tia.

¹⁵Hnuk irhâi voihnina’n, “Pathianin a’rthiang a iti chu nangma’n irthiang mah ti no roh,” a ti nôka.

¹⁶Khaang khan, voithum a zuang tia. Kok kha irvân tiang lâkpai a ni nôk tâka.

¹⁷Petera’n a thil hmu kha a’rngaina lam inhre loiin a om lai khan, Kornelia mi tîrhai kha Simona in kha irdon suakin a mikot kôla an lei ngîra;

¹⁸“Hi hin Petera a tung mo?” tiin an irdona.

¹⁹Petera’n a inlârna hmu kha a ngaitua laiin, Irtha khan a kuang, “Mi inthumin nang an zong.

²⁰Thoiin lân, chum roh, ite lunghla loiin zuihai roh; khahai kha ki hong itîrhai an ni,” a tia.

²¹Khanchu, Petera kha a suaka, mihai kuang khan, “Nin izong kha ki ni, imo nin ihong nasan?” a tia.

²²Anni khan, “Pathian chi mi, Juda nam murdi’n an inpâk, sipai irza hruaitu fel tak Kornelia chu vântîrtôn irthiangin a chongpuia, ni thu’nsîr a’rngai theina hrangin, a ina nangma kha fial hrangin a hrila, keini hi a ni hong itîr a ni,” an tia.

²³Kha mihai kha a koi lûthaia, an riaktirhai tâka. A tûka chu Petera chu a thoia, kha mihai kha a zuia, Jopa khuaa iamtu, tuhai mani khom an fe saa.

²⁴A tûk nôka chu Kaisari khuaa an tung tâka, Kornelia khan a urênghai le rual lungthunghai a koi bûmhaia, Petera hai chu an lei nghâk chiana.

²⁵Khan, Petera a lût hrang tôn takin Kornelia’n a lei dona, a ke bula khûksadelin chubai a mûka.

²⁶Petera khan ama kha a kaithoia, “Thoi roh, kei khom mihriam dên kêng ki ini,” a tia.

²⁷A kuang thu’nsîr pumin a lûta, mi tamtak irbûmhai kha a va hmua.

²⁸An kuang, “Judahai ta hrangin nam dang, pan hrang le irpôlpui hrangin Juda sakhua’n phal mah ti nangni rengin nin inhriat. Khannisianlân, tûte a’rthiangloi le fâiloi hranga ki bê nona hrangin Pathianin a ni irhmutir a ni.

²⁹Khasikin, a ni hong koi le chu sêl loiin ki ihong a ni. Imo ni ni hong ifialna san?” a tia.

³⁰Kornelia khan, a vuan hin a sûn minlina a ni ta, atûn ang zoro hi chohnung dâr thuma ki chongchai laiin; irngai ta, mi inkhat puan chek sil ki kuang a hong ngîra,

³¹“Korneli! ni chongchaina le ni thilpêkhai Pathianin an hriat mai kêng.

³²Khanchu, Jopa khuaa mi tîrin lân, Simon Petera hong koi roh, ama kha tuikhanglian panga savun siam ngaitu Simona ina a tung,” a tia.

³³Khasikin, ni kuanga mi ki hong itîr zôi zel a ni; ni ihong hi a sa ok. Rengpa’n thu insîr hranga nang a ipêk inhre hrangin atûn hin Pathian mithmu’n kin rêngin kin iom a ni hi,” a tia.

³⁴Petera’n thu an sîra: “Pathianin mi tinrêng ir-ang natin a ni en tih kin hriat infel ta.

³⁵Nam tin laia tukhom ama inhriata, sin fel tak tho murdi chu a pom inruk mi a ni ngai.

³⁶Ama khan irtharngamna Thurchi Sa Jisua Krista, mi tinhai Rengpa bâia insîrin Israelhai an pêltir ti nin inhriat, Jisua chu mi murdi Reng a ni.

³⁷Johana’n baptisma thu a hril zoia Galili rama irphuta Judai ram pumpuia thil hong tung thu kha nin lei inhriat ta.

³⁸Nazaret Jisua chu Pathianin Irtha Irthiang le sinthotheina’n a vurzia kha nin inhriat. Pathian khan a ompui maia, sin sa thoa inzin vêlin Diabola soisak murdihai an damtir thiaia.

³⁹Judai ram le Jerusalema a sintho murdi inhretuhai kin ni, ama kha Krosa hembe’n an ithat a ni.

⁴⁰Khannisian, Pathianin sûn thum nia kaithoia hmu theiin an lârtira.

⁴¹Mi tin hmua chu inlâr mah, Pathianin inhretu hranga a lei inkung keinihai vai hin kin hmu; a thoi nôk hnung khan kin fâkin kin in suam ngai a ni.

⁴²Kha kha tânginsampui hrang le Ama kha mi hring le mithi chunga Roirêltua Pathian inkung kha a nih ti mihai inhriattir hrangin thu a ni ipêk a ni.

⁴³Tukhom, Ama iam tâk chu ar hming sikin a sualhai ngaidamin om a ti, tiin deipu murdihai khomin a Thurchi an insîr ngai,” a tia.

⁴⁴Petera’n kha thu kha an sîr laiin ar ngaitu murdihai chunga khan Irtha Irthiang a hong tung tâka.

⁴⁵Sertanhai laia iamtu Petera hong zuituhaiin chu, Irtha Irthiang thilpêk, Jentailhai kuang a ini kha ar khêl an ti tak taka.

⁴⁶Chong inhriat loiin a thu an insîr le Pathian an inpâk kha an inhriata.

⁴⁷Petera’n, “Hi mihai hi kin idong ang khan Irtha Irthiang an donga, tui hmangin baptisma an ichang kha tu’n mo khap hrang?” a tia.

⁴⁸Khanchu, Jisua Krista irhminga baptisma chang hrang thu a pêka. Kha zoia chu la châm ual hrangin an ngêna.