Read Hrangkhol TÎRTÔNHAI SINTHO 11 Bible Online

TÎRTÔNHAI SINTHO 11 - Hrangkhol bible

TÎRTÔNHAI SINTHO 11

¹Judai ram tina tîrtônhai le urêng omhai khan Jentailhai khomin Pathian thu an iam sa ti an inhriat tâka.

²Petera’n Jerusalem a tungin chu, sertanhaiin an lei sêla, a kuang,

³“Sertan loihai a hroa, an kuang bu a nêk ngai,” an tia.

⁴Khannisianlân, Petera’n chu a bula irthokin a rêngin thil hong tunghai kha an sîr pe tâka.

⁵Jopa khuaa ki chongchai laiin, inlârna ki hmua. puan lian tak angin, a kil minlia khitin irvân ata zuang irtûlin ki hmua, ki kôl a ni hong nâia.

⁶Kha khan ki en chiana, sa ke minli chi tinrênghai, a lôn ngai chi tinhai le va chi tinrênghai ki hmua.

⁷Hnuk irhâiin ki kuang, “Peter, thatin lân fa roh,” a ni tia.

⁸Khannisianlân, keima’n Rengpa, “Ni mak e!, a’rthiangloi le a fâiloi ite ki bâia lût ngai mah,” ki tia.

⁹Irvân ata hnuk irhâi khan, ‘Pathianin a’rthiangtir tâk chu nangin porinche ti no roh,’ a ni zuang ti nôka.

¹⁰Khaang dên khan voithum a zuang oma, a rêngin irvâna khâipai a ni nôk tâka.

¹¹Kha zoro lai khan mi inthum Kaisari ata ki kuang mi an hong itîrhai kha ki tungna in mikota an lei ngîr chian tâka.

¹²Irtha khan lungirhlâna nei viat loiin anni kha zui hrangin a nin hrila. Hi urêng kiruk khom hin an ni zui saa, Kornelia ina khan kin va lûta.

¹³Khanchu, ama khan ki kuang, a ina vântîrtôn a hmu thu chu a kuang, ‘Jopa khuaa mi tîrin lân, Simon Petera inkoitir roh,

¹⁴ama khan thu nang hril a ta, a thu’nsîr sika khan nang le ni in sûng mi murdi saninhringin om nin ti’ a ti thuhai a ni lei hrila.

¹⁵Thu chu ki hong insîr phuta, Irtha Irthiang chu, a phuta kin chunga a zuang itung ang dênin, an chunga a zuang tung ta.

¹⁶Rengpa’n, ‘Johana’n tuiin a baptis ngaia, nangni chu Irtha Irthianga baptis ni nin ti’ a itihai kha kin hriat suak nôk ta.

¹⁷Khaang khan, Rengpa Jisua Krista ei iam phut laia thilpêk a ni ipêk a ni ti, a ifel a ni. Khasikin, ‘Keima hi tu mo ki ni, Pathian ikhap tum hi!’ a tia.

¹⁸Hi chong hi an inhriat le chu sêl ta mahaia, “Khaang khan a ni’n chu, Pathianin Jentailhai khom irleta, hring hranga zoro’nchum a ipêk a ni kha te,” tiin Pathian an inpâk ta.

¹⁹Khan, Stefana an that zoia dengintheina sika inthek indarhai, kha Foiniki rama, Kupra chômbung, Antiokei kho dênin an fe indara Judahai kuang vai no chu tu kuang khom thu hril mahai.

²⁰An laia senkhat chu Kupra chômbunga om le Kurini kho mihai an ni. Kha mihai khan Antiokei an tungin chu Grik mihai kuang khom thu an insîr. Rengpa Jisua Thurchi Sa an hril sa tâk.

²¹Rengpa’n anni kha a changpuihaia, mi tam takin an iama, Rengpa tiang an irhei ta.

²²An thurchi kha Jerusalem khuaa Koiindanghaiin an lei inhriata. Anni khan Barnaba chu Antiokei-a an tîr ta.

²³A zu tungin chu Pathian lungkhamna sintho chu a hmua, a sân a lôma; Iamom taka Rengpa chel khak ta hrangin an rêngin an thorhaia.

²⁴Barnaba chu mi satak, Irtha Irthiang le iamnaa sip a ni. Khanchu mi tamtak Rengpa kuang hruai an ni tâka.

²⁵Khan, Barnaba chu Saula zong hrangin Tarsa tiang a fe nôk ta.

²⁶A hong hmu’n chu Antiokei-a a hong hruaia, kum khat ang dôr Koiindang mihai laia an kop saa, mi tamtak an irchutir ngai. Antiokei khuaa hin a ni irchutirhai chu ‘Kristian’ an itihna masa tak a ni.

²⁷Khâlâi khan Jerusalem ata deipu senkhat Antiokei-a an fea.

²⁸An laia inkhat Agaba chu a ngîra, rammual pumpuia châm irkhêl tak tung a ti, ti Irtha inhriattirin an puanga, kha châm kha Klaudia inlal laiin a tung ta.

²⁹Khanchu, irchutirhai khan an thei lam chitin, Judai rama iamtuhai laia changpuina thon an tuma.

³⁰Kha kha an tho ngeia, upahai laia pe hrangin Barnaba le Saula kuta an thon ta.