Read Hrangkhol TÎRTÔNHAI SINTHO 12 Bible Online

TÎRTÔNHAI SINTHO 12 - Hrangkhol bible

TÎRTÔNHAI SINTHO 12

¹Khan, kha zoro lai khan rêng Heroda’n koiindang mihai laia mi senkhat deng an theitir irphuta.

²Jakoba, Johana urêngpa chu, khandaiin a tuk thata.

³Ama kha Judahai an lôm ok ti an hriatin, Petera khom chel a tum nôk thiaia, (Kha kha Bai chol koploi kût zoro a ni.)

⁴Petera chu a chela, intângna ina a khuma, sipai pâl minli, minli lia irsanin an entirhaia. Ferkân kût zoia mipui matona hruai suak a itum a ni.

⁵Petera chu intângna ina a om sûnga khan koiindang mihai sathnem irngai takin Pathian kuang an chongchai pea.

⁶Heroda’n hruai suak tum hrang zân khan Petera kha sipai inhni kâra, a bâna thîr hrui inhni bunin a ina, a vêngtuhai khom mikot bula an oma, intângna in chu an nghâk chiana.

⁷Irngai ta, Rengpa itîr vântîrtôn inkhat a hong ngîra, intângna in sûnga khan vâr a zuang inlang. Vântîrtôn khan Petera dâra an bên inhartira, “Thoi lat roh,” a tia. Thîrhrui khom kha a bân ata a tâk pe tâka.

⁸Vântîrtôn khan, “Irsiamin lân, ni kekok bun roh,” a tia. Khaang khan a tia. Vântîrtôn khan, “Ni songkol innghâkin lân, ni zui roh,” a ti nôka.

⁹Petera khan a zui suak ta. Vântîrtôn sintho chu a tak a nih ti inhre ma, a’rmanga a ihmu ma ni a sôna.

¹⁰Khan, a enkoltu masa tak le inhnina an khêlin chu khopui a lûtna thîr mikot an va tunga, kha mikot kha a bingin ar hong tâka, an fe suaka. Khan, lamlian inkhat an khêlin chu irningloiin vântîrtôn khan Petera kha a mâksan tâka.

¹¹“Khan, Petera kha a hong har le chu, “Rengpa’n vântîrtôn a zuang tîra. Heroda kut ata le Judahai sabeina murdia irthokin a nin zôk ti a dik kin hriat ta,” a tia.

¹²A milung an chong zoiin chu Johana Marka nu Mari ina khan a va fea, kha khan mi tamtak an om irchuna, an lei chongchaia.

¹³Petera khan mikot kha an tôka, dôngmate inkhat, Rodi kha, mikot inhong hrangin a va fea.

¹⁴Petera hnuk irhâi a nih ti an hriatin chu a lôm ta hraia, mikot kha inhong loiin an tân nôka, mikot kôla Petera a ngîr ti thu a va hrilhaia.

¹⁵Anni khan, “Ni invêt ma ni ta,” an lei tia. Ama’n chu, “A dik ta tak kêng? a ti ngita. Anni khan, “Vântîrtôn ni a ti,” an tia.

¹⁶Khannisianlân, Petera khan mikot kha an tôk nôk hena. Mikot an hong inhongin chu ama kha an hmu tâka, a sân ar khêl an ti.

¹⁷Khanchu, dâihrek hrangin kutin a zâphaia; Pathianin intângna in ata a hruai suak lamhai kha a hrilhai tâka. Khan, “Hi thu hi Jakoba le iamtu danghai van hrilhai roi,” a tia. Kha hnung chu, a suaka ram danga a fe tâka.

¹⁸Khua a hong vârin chu enkoltu sipaihai kha “Petera kha khôn mo a iom tâk?” tiin a saterengin an buai ta.

¹⁹Heroda khan a zonga, hmu maka, a enkoltuhai kha a ngohaia, thathai hrangin thu a pêkhai ta. Khan, Heroda kha Judai rama irthokin Kaisari khuaa a zu fea, kha khan a om ta.

²⁰Heroda chu Tura le Sidon mihai chunga a sân a ning an mura. Anni khan Blasta, rêng zâlhmun nghâkpu kha rualin an siam baka, inrualin rêng kuang an honga, an ramin rêng rama irthoka fâk nêk an ihmu ngai a ni sikin irngei hrangin an ngêna.

²¹Chongpui hrang nia khan Heroda chu rêng songkol innghâkin rêng toihmuna a toia, an kuang thu an sîra.

²²Mi murdi’n, “Mihriam hnuk irhâi ni mah, Pathian hnuk irhâi kêng,” an tia, an khêka.

²³Ama khan Pathian kuang roiinpuina a pêk no sikin Rengpa vântîrtônin voikhat rengin a chela, rûlrukûtin a fâka, a thi ta.

²⁴Pathian thu chu an darh maia, iamtuhai an pung maia.

²⁵Barnaba le Saula’n an sintho an zoiin chu Johana, Marka an itipu kha hruaiin Jerusalem ata an kîr nôk ta.