Read Hrangkhol TÎRTÔNHAI SINTHO 13 Bible Online

TÎRTÔNHAI SINTHO 13 - Hrangkhol bible

TÎRTÔNHAI SINTHO 13

¹Khan, Antiokei Koiindang mihai laia khan deipuhai le tîrtônhai an oma. Khahai kha Barnaba, Simeona (Nigera, an ti) Kurini mi Lukia, rêng Heroda’n urênga a inei Manaina, Saula hai an nia.

²Bu an ngheia Rengpa an biak suam laiin Irtha Irthiangin, “Barnaba le Saula hi anni ki inkungna san tho hrangin ni’rsentir roi,” a tia.

³Khanchu, bu an ngheia, an chongchaia, an chunga kut an irnghata, an tîr suak ta.

⁴Khanchu, Irtha Irthiang itîr suakin Selukai khuaa an chuma, khatak ata khan Kupra chômbunga irkuangin an fea.

⁵Salamis khua an tungin chu Judahai Sinagokhaia Pathian thu an hrila. Johan Marka khom anni changpuitu hrangin an hruai sa.

⁶Chômbung kha Pafos khua dênin an irfang suaka. Dôithei, deipu dol, Juda mi inkhat, Bar-Jisua an hmua.

⁷Kha mi kha Ramoptu vâr tak Sergia Paula kuanga om a ni. Kha Ramoptu khan Barnaba le Saula kha chai hrangin a fiala, Pathian thu inhriat a nuama.

⁸Eluma, dôithei (Kha kha Grik chonga a’rhming a ni.) khan Ramoptu kha iamna thu kha in-iam notir a tuma, anni kha a sêlhaia.

⁹Saula, Paula an iti kha, Irtha Irthiangin a sipa, ama kha a en chiana,

¹⁰“Diabola nâipa, satna tinrêng râlpa. Milak tinrêngin ni sipa, zoro tina Pathian thutak hi thu no inchang ni itum ngai a ni.

¹¹Irngai roh, atûn Rengpa kut hi ni ituang hrang a ni; ni mit cho a ta, sun khovâr hmu ta no chi ni,” a tia. Khanchu, sûm le inthimin ama kha a zui zôi zel tâka, a hruai hrang mi zongin a’rvâk a’rvâk thiai tâka.

¹²Khan, Ramoptu khan thil hong om kha a hmua, Rengpa irchutirna thu kha a’rkhêl a ti oka, a iam tâka.

¹³Paula le a rualhai chu Pafos ata irkuangin an suaka, Pamfulia rama Perga khua an tunga, Johan Marka khan anni kha a’rheisanhaia, Jerusalema a kîr nôk tâka.

¹⁴Perga ata kha Pisidia rama Antiokei khuaa an fe zêla. Sabat niin Sinagoka inkhômin an toi sa.

¹⁵Dân bu le deipu Lekhabu tep zoi chu Sinagok hruaituhai khan mi an tîra, “Urênghaio, nin ni inthorna hrang thu imo nin neiin chu insîr roi,” an va tia.

¹⁶Khanchu, Paula chu a ngîra, kutin a zâpa, an sîr tâka. “Nangni Israel mihaio, irngai roi.

¹⁷Hi Israel mihai Pathian hin ei irchibulhai kha a lei inthanga, an mikhualna Aigupta rama an om sûng khan nam roiinpui taka a siama; khatak ata kha a sinthotheina roiinpui tak hmangin a hruai suakhaia.

¹⁸Kum sômminli ramchâra khan an sinthohai kha an en thei maia.

¹⁹Kum irza minli sômringa sûnga khan Kanaan rama nam sari ar hmangtira, an ram khom a mihai a pêk ta.

²⁰“Kha hnunga khan roirêltuhai a pêk zela, deipu Samuela dênin,

²¹Khan, kha hnunga khan rêng an nghia, khaang khan, Pathianin Saula, Kisa nâipa, Benjamina irchia mi kha kum sômminli sûnga an rêng hrangin a pêkhai ta.

²²Ama kha a hnôl hnunga khan an rêng hrangin Davida a siam ta. Kha chungchâng kha Pathianin hiang hin an sîr. “Davida, Jesaia nâipa, ki lungchuk mi ki hmu ta, ama khan sin hranga ki inuam murdi sin a ti,” a tia.

²³Pathianin a lei inkung tâk ang khan, kha irchihai laia irthoka khan Israel mihai Saninhringtu Jisua a zuang intung a ni.

²⁴Jisua’n a sin a phut mân khan, Israel mihai an sual an irleta baptisma an changna hrangin Johana’n thu an sîr pe ngai.

²⁵Khan, Johana’n a sintum a zoi hrang tôn khan mipuihai laia, ‘Tu mo a nih ti nin ni iam? Nin inghâktu kha keima hi ni ma ung. Khannisianlân, irngai u ta! Ki hnunga zuang a ti, kei chu a kekok khek hrang luan inruk ma ung,” a tia.

²⁶Urênghai, Abrahama irchihai le nangni Pathian chi mi dang murdihaio, kha saninhringna thu kha ei rênga kuang a zuang itung ta a ni.

²⁷Jerusalema omhai le an roirêltuhaiin ama kha inhre mahaia, Sabat ni rikipin an itep ngai deipuhai thu an inhriat thiam no sikin ama kha thiam no an inchangtira, deipuhai thu kha an tung irkiptir ta a ni.

²⁸Thina hrang dôr a chunga ite a bi an hmu no khomin, that hrangin Pilata kuang an ngêna.

²⁹A thurchi Pathian Thu bu’n a irziak murdi kha a tung zoiin Kros ata an kai suma, thâna an phûm ta.

³⁰Khannisianlân, Pathianin ama kha mithi lai ata a kaithoi nôk tâka.

³¹Galili ram ata Jerusalema ama pâla hmunkhata lei lêng suam ngaihai kuang sûn tamtak sûng an lâr ngaia; kha mihai kha atûn hin Israel mihai kuang a thu inhretuhai an ni.

³²Keini hi chu Thurchi Sa kha hril hrangin kin izuang a ni. Pathianin irchibulhai kuang thu an kunga,

³³eini an irchihai kuanga Jisua kaithoia a hong intung tâk thu hi. Sam inhninaa, ‘Nang chu ki nâipa ni ni, A vuan hin ki nâia ki nei ta a ni,’ tia irziak ang khan.

³⁴Ramna hmun thâna kîr nôk ta loi hrangin Pathianin ama kha thina irthokin a kaithoi hrangzia thu, hiang hin an sîr: ‘Satvurna irthiang le fel Davida kuanga ki inkung kha nang pe ki ti,’ tiin.

³⁵Khasikin, hla danga, ‘Ni mi irthiang chu thâna ram hrangin phal no chi ni,’ a ti sa.

³⁶Davida’n ama zoro ka chu Pathian nuamlam a sina, kha hnung chu a thia, ar chibulhai leh an phûma, a takpum kha thâna a ram tâk.

³⁷Pathianin thina irthoka a ikaithoitu kha chu ram mah.

³⁸Khanchu urênghaio; khasika sual ngaidamna thu nangni kin hong ihril a ni. Mosia Dâna thiam nin chang thei nona murdia khan,

³⁹Jisua iamtu murdi thiam inchangtir an ni ta. Kha kha Mosia Dânin mi thiam a inchangtir thei loi kha a ni.

⁴⁰Khasikin, irdîn roi, deipuhai lei iti kha nin chunga tung likna ti:

⁴¹‘Hmusittuhai, en u ta! ar khêl ti unglân irhmang roi; nin dam sûnga sin ki itho hi, mi’n nangni hrilfiah pe khom sian iam viat no chin ni, iti kha,’ a tia.

⁴²Khan, Paula le Barnaba kha inkhôm in ata an suakin chu Sabat ni nôka kha thu kha hong insîr nôk hrangin mipuihai khan an fiala.

⁴³Inkhôm an chîn zoiin chu, Juda mi tamtak le Juda saphun Pathian ngaisak tam takin Paula le Barnaba kha an zuia, an inkhômnaa khan Pathian lungkhamnaa om mai hrangin an inthorhaia.

⁴⁴Sabat ni nôka chu Rengpa thu irngai hrangin a kho pumpui an hong inkhôma.

⁴⁵Khannisianlân, Judahaiin mipui an hmu’n chu a sân an hnarsahaia; Paula thu’nsîr kha an sêl irkaltira, an insîr insiata.

⁴⁶Paula le Barnaba khan hâi takin, “Pathian thu hi nangni kuang hril masa hrang rêng a ni; khannisianlân, nin hnôla, kumtuang hringna nei zel loia nin irngai hnung chu inhre roi, Jentailhai tiang irhei kin ti.

⁴⁷Khaanga tho hrangin Rengpa’n thu a ni ipêk a ni. ‘Jentailhai invâr hrangin nang kin kung, kôlkil dêna mihai Saninhringna hrangin,’ ti irziak ang khan,” an tia.

⁴⁸Khanchu, Jentailhai khan kha thu kha an inhriatin chu an lôma, Pathian thu an chôiindôm tâka, kumtuang hringna dong hranga inthang murdihai khan chu an iam tâka.

⁴⁹Rengpa thu kha ram pumpuia khan an darh ta.

⁵⁰Khannisianlân, Judahaiin kho sûnga ulianhai le Pathian ngaisak Jentail nupang mahripomhai an inthorhaia, Paula le Barnaba kha an beihaia, an ram ata an inhnot suakhai tâka.

⁵¹An idemhai inlangna hrangin tîrtônhai khan an ke zapha ata vâiphin an hui thâka, Ikoniom khuaa an fe tâka.

⁵²Irchutirhai kha Irtha Irthiangin an sipa, a sân an lôm tâka.