Read Hrangkhol TÎRTÔNHAI SINTHO 14 Bible Online

TÎRTÔNHAI SINTHO 14 - Hrangkhol bible

TÎRTÔNHAI SINTHO 14

¹Khaang dên khan Ikoniom-a khom Judahai Sinagoka tîrtônhai kha an inkhôma, an thu’nsîr sikin Juda le Grik tam takin an iama,

²Iam nuamloi Judahai khan Jentailhai an inthorhaia, urênghai kha an khôkmâktirhaia.

³Khannisian, tîrtônhai kha sôt zan an châma, Rengpa thu kha hâi takin an hril ngaia. A lungkhamna thu an hril ngai kha namindetna hrangin Rengpa’n anni hmangin thilirkhêl le sinirkhêl tamtak a thoa.

⁴Kho sûnga mipuihai kha an irsena, senkhatin Judahai an thopa, senkhatin tîrtônhai an thopa.

⁵Jentailhai le Judahai chu an roirêltuhai le, dengintheitirhai bita lunga dêng an tum ti,

⁶tîrtônhaiin an inhriatin, Lukaoni rama Lustra khua, Derbe khuaa le a vêl ramhaia an rot tâka.

⁷Khahai khoma khan Thurchi Sa an hril thiaia.

⁸Khan, Lustra-ah khan mi inkhat, ke’nbâi, toi chiana om, a’rzir ata a ke’nbâi, ke’n kal la chôi ngai viat ngai loi mi a oma.

⁹Kha pa khan Paula thu’nsîr kha a’rngaia, Paula’n a en chiana, damna hrangin iamna a nei ti an hriatin,

¹⁰inring takin, “Ni ke’n ngîr suak roh,” a tia. Kha pa kha ar chôma, ke’n a fe thei ta.

¹¹Mipuihaiin Paula sintho kha an hmu’n, Lukaoni chongin inring takin, “pathianhai kha mihriam angin ei laia an hong isuak ta a ni hi,” an tia.

¹²Barnaba kha ‘Zeusa’ an tia, Paula thu’nsîrtu tak a ni sikin, ‘Hermaa’ an tia.

¹³An pathian Zeusa tempil kha mikot suaa a oma, kha khan Ochaiin sehrâtchal le pâr inthil hruihai dâi mikota khan an hong chôia; mipuihai leh khan tîrtônhai kuang irbôlna inhlan an tum tâka.

¹⁴tîrtôn Barnaba le Paula’n kha kha an inhriatin chu, an puan an inpot thêra, mipui laia khan an irchôm lûta, an khêka,

¹⁵“Hi hi i hrang mo nin itho? keini khom nangni ang mihriam mai mai kin ni. Hi chanlamboi thilhai hi mâkin, Pathian hring, irvân, irnêng, tuikhanglian le a sûnga om murdi siamtu tianga nin hong kop theina hranga Thurchi Sa nangni hong hril kêng kin ini.

¹⁶Pathianin tiana chu mi tin mâni lampui chit hro a phal ngai a ni.

¹⁷Khannisianlân, ama inhriattirna omin thil sa nangni tho pe’n an lang ngêt ngai. Irvân ata rua le chîmuhai a zoro taka nangni a pêk ngaia; fa hrang le nin lungrîla lômna nangni a pêk ngai,” an tia.

¹⁸Kha thu kha insîrin mipuihai chu an kuang irbôlna inhlan loi hrangin an khap thei zâma.

¹⁹Khannisianlân, Antiokei le Ikoniom ata Juda senkhat an honga, mipuihai kha an hong inhminhaia, Paula chu lungin an dênga, a thi tâk sônin kho sûng ata an kai suaka.

²⁰Khannisian, irchutirhai kha an hong ngîrin a thoia, kho sûnga a lût nôk tâka, khan, a tûka chu Barnaba le Derbe-a an fe tâka.

²¹Kha khuaa khan Thurchi Sa an hrila, irchutir mi tamtak an siam hnungin Lustra-ah an kîra. Ikonioma, Antiokei-haia an fe maia.

²²“Intakna tamtak tuangin Pathian Rama ei ilût hrang a ni,” tiin iamtuhai lungrîl an indettira, iamna kha chel khak hrangin an inthorhaia.

²³Koiindang tina upahai an thangpui thiaia bu ngheiin an chongchaia, an iiam Rengpa kuang an inkoltir maia.

²⁴Pisidia ram chu an irfang suaka, Pamfulia an hong tung nôka.

²⁵Perga khuaa thu an hrila, Atalia khuaa an fea,

²⁶khataka irthokin chu irkuangin Antiokei an tung nôk tâka. Kha hmun kha hi zoroa an sintho an phut hrang laia Pathian lungkhamna kuta ibânga an omna hmun kha a ni.

²⁷An tungin chu koiindang mihai chu an koi bukhaia, Pathianin anni hmanga thil a itho murdi le Jentailhai ta hrang khom Jisua iamna lam ar hong thuhai an hrila.

²⁸Iamtuhai kuang khan zoro sôt tak an châm tâka.