Read Hrangkhol TÎRTÔNHAI SINTHO 16 Bible Online

TÎRTÔNHAI SINTHO 16 - Hrangkhol bible

TÎRTÔNHAI SINTHO 16

¹Paula’n Derbe le Lustra khom a hro saa, kha khan Kristian inkhat a’rhming Timothea a oma. A nu chu Kristian Juda a nia, a pa chu Grik a ni.

²Lustra le Ikonioma urênghai khan Timothea kha a sân an inpâk.

³Paula’n ama kha hruai hrangin a nuama, kha kôlvêla Judahai khan Timothea pa kha Grik a nih ti an inhriat zita, a ser a tan pea.

⁴Kho tin an irfang malamin, Jerusalema tîrtônhai le upahai thurêl kha an pêk thiai maia, zôm hrangin a hrilhai thiaia.

⁵Khasikin, koiindanghai kha iamna an hrât uala a nitin an pung tîr tîr tâka.

⁶Irtha Irthiangin Asia rama thu’nsîr a khap sikin Frugia le Galatia ram an irfanga.

⁷Musia ramri an tungin chu Bithunia rama fe an tuma, khannisian, Jisua Irtha khan phal maka.

⁸Khasikin, Musia ram khêlin Troas-ah an fe tâka.

⁹Khan, kha ni zâna khan Paula’n inlârna’n Makedonia rama mi inkhatin, “Makedonia rama hong kâiin lân, ni hong san roh!” tia ngênin a hmua.

¹⁰Paula’n inlârna hi a hmu zoi le chu, Makedonia rama fe hrangin kin irsiam zel tâka, kha rama mihai laia Thurchi Sa insîr hrangin Pathianin a ni koi sikin.

¹¹Khanchu, Troas-ah irthokin irkuangin kin suaka, Samotraki khuaa kin theng thaia, a tûka Neapolis khuaa kin fea.

¹²Khataka irthokin Filipi khuaa kin fea, kha khua kha Makedonia rama khua inkhat a nia, kha biala khan chu kho kâmom tak a ni. Rom mihai riakbuk a ni. Kha khuaa khan sûn tamtak kin châma.

¹³Sabat niin khopui pên tianga ivadung panga, Judahai chongchaina ngai hmun ni hranga kin iiama khan kin fea; kha khan kin toia, nupang irbûmhai laia thu kin insîr.

¹⁴Khahai laia mi ar hming Ludi Thuatira kho mi puan senduk zuar ngai, Pathian chi mi nupang inkhatin kin chong an hriata, khanchu, Paula thu’nsîr kha zôm hrangin Rengpa’n a lungrîl an vâr pea.

¹⁵Ama le a in mihaiin baptisma an chang zoiin chu, “Rengpa iam tak takin nin ni bêin chu ki ina hong tung roi,” tiin a ni fial ngita, a nin tûk tâka.

¹⁶Khan, nikho khat chu chongchaina hmuna kin fe laiin suak dôngmate inkhat ramilhli ichel tasân thei hin a ni chongpuia, khanu khan tasân a theina sika khan a puhai sum tamtak a lei pêk ngaia.

¹⁷Khanu khan Paula le keini a ni zuia, “Hi mi, saninhringna lampui nangni hrilhai hi, Anchungtak Pathian suakhai an ni hi,” tiin a khêk ngaia.

¹⁸Khaang khan, sûn tamtak a tho tena chu Paula milung hoi ta maka, a’rheia, ramilhli kuang khan, “Jisua Krista irhmingin a sûnga irthoka suak hrangin thu nang ki pêk,” a tia. Mitkhap kârin a suak zôi tâka.

¹⁹Khan, a puhai khan an sum hmûna ngai om ta mah ti an inhriat le chu Paula le Sila kha an chela, roirêltuhai kuang bazâr hmuna an kai inlûthaia.

²⁰Roirêltuhai kuang an intungin chu, “Hi mihai hi Juda an nia, kin kho sûnga buaina an siam ngai.

²¹Keini Rom mihai izôm le irthiang loi dân dang an ihril a ni,” an tia.

²²Mipuihai kha Paula le Sila zêm hrangin an irsiam tâka. Kha hnung chu, roirêltuhai khan Paula le Sila puan an thêr pehaia, khianghrol leh zêm hrangin thu an pêka.

²³An zêm bithai hnungin intângna ina an khuma, a nghâktu kuang khan sataka khum khak hrangin thu an pêka.

²⁴Khaang khan, intângna in sûngrîl taka a khuma, an kea thing kol an inbuntira.

²⁵Zân laitaka chu Paula le Sila chu Pathian kuang an chongchaia, hla an saka, intângna ina mi danghaiin an irngaia.

²⁶Khanchu, irningloiin hnîngnupui a hong inhnînga, intângna in lungphûmhai ten khom ar nok zit tâka.

²⁷Khanchu, intângna in nghâktu kha a hara, mi’ntânghai kha an irot suak zit mani ta a tia, a khandai a phôia, irthatpai a tuma.

²⁸Khannisianlân, Paula khan inring takin a khêka, “Ite irlo no roh, kin rêngin hin kin la om zit hi te,” a tia.

²⁹Kha zoi le chu meiser a zonga, a’rchôm lûta, ichi le inthing pumin Paula le Sila makunga khan a van boka.

³⁰Ama kha pên tiang a hruai suaka, “Puhaio, saninhring ki ni theina hrangin imo ki itho hrang?” a tia.

³¹Anni khan, “Rengpa Jisua iamin lân, khanchu saninhring nih ni ti, nangma le ni in sûng mihai le,” an tia.

³²Ama le a ina om murdihai kuang khan Rengpa thu an hril tâka.

³³Kha zân, kha dârkâr lelea khan Paula hai kha a hruaia, an izêmna pophai kha a’rsûk pehaia, an in sûng mi rêngin baptisma an chang zôia.

³⁴Paula le Sila kha a ina a hruaihaia, fa hrang a pêkhaia. Pathian an iam tâk sikin an in sûng pumin a sân an râi a fân tâka.

³⁵A tûk zîng chu roirêltuhaiin, “Kha mihai kha insua ta roh,” ti thupêk inchôitirin enkoltu hril hrangin pulis an tîra.

³⁶Intângna in enkoltu khan an thu kha Paula a hrila, “Roirêltuhai khan nangni insua hrangin mi a hong tîra, atûn hong suak unglân, irtharngam takin fe roi,” a tia.

³⁷Khannisianlân, Paula khan an kuang, “Rom mi kin nia, thiam no chang ni ma unga, vântâng hmuna an ni zêma, intângna ina an ni khuma. Atûn hin inrûkin nin sua an itum mo? Ni viat no ni, anni ngêt honghai sianlân, ni va hruai suak ri sehai,” a tia.

³⁸Pulishai khan kha thu kha roirêltuhai an va hrila. Rom mi an nih ti an inhriatin chu an chi tâka.

³⁹An va fea, thupha an chôia, an hruai suaka, an khua ata suak hrangin an ngên tâka.

⁴⁰Paula le Sila kha intângna in ata an suaka, Ludi ina an fea. Kha khan iamtuhai kha an hmua, irtharngamna an sakhai zoiin chu an mâkhai tâka.