Read Hrangkhol TÎRTÔNHAI SINTHO 17 Bible Online

TÎRTÔNHAI SINTHO 17 - Hrangkhol bible

TÎRTÔNHAI SINTHO 17

¹Khan, Amfipoli le Apolonia an khêla. Thesalonika an tung tâka, khatak khan Judahai Sinagok a oma.

²Paula chu a itho ngai lam angin an khôm saa; Sabat voithum Pathian Lekha thu ata sataka sûtpuiin,

³Krista kha thina tuang hrang a nizia le mithi lai ata thoi nôk hrang ngêt a nizia hrilfiain an khîk irhmu ngaia. “Hi Jisua, a thurchi nangni kin ihril hi, Krista kha a ni,” a tia.

⁴Khanchu an laia mi senkhatin an iama, Paula le Sila kha an zôm tâka; Pathian ngaisak Grik mi tamtak le mi lian nuhaiin an zui saa.

⁵Judahaiin an hnarsa tak taka, kholâia mi sual om ma maihai kha an bûmhaia, a khopumin an inbuaia, tîrtônhai kha vântâng makunga hruai suak tumin Jasona in an hong rûna.

⁶Khannisian, an hmu no tika chu, Jasona le iamtu senkhathai kha kho sûng hruaituhai kuang an hruaihaia, an khêka, “Hi mihai hin hmun tina buaina an siam ngai! Atûn hin ei khuaa an ihong a ni,

⁷Jasona hin a ina a lei intung ngaia. Hihai hin, a’rhming Jisua, rêng dang a om tiin Kaisara dân an doi ngai,” an tia.

⁸Kha chong kha an inhriatin chu mipuihai le kho sûng hruaituhai an buai tâka.

⁹Kho sûng hruaituhaiin Jasona le a chanpuihai kha an irchôka, an insuahai tâka.

¹⁰Khanchu iamtuhaiin kha ni zân ngeiin Paula le Sila kha Beroia khuaa an infetirhai zôia, khan an tungin chu Judai Sinagoka an lûta.

¹¹Khataka mihai kha chu Thesalonika mihai nêkin chu an lungrîl ar hong uala. Thu kha tui takin an irngaia, Paula thu’nsîr kha a dik le dikloi inhriatna hrangin a nitin Pathian Lekhabu an tep ngai.

¹²Khahai laia mi tam takin an iam taa, Grik nupang mahripom tak le pa tamtak khom an iam tâka.

¹³Khannisian, Thesalonika taka Judahai khan, Paula’n Beroia khuaa khom Pathian thu an sîr tih an inhriatin chu kha khan khom an va fea, mipuihai an inthora; an buai nôk tâka.

¹⁴Khanchu, iamtuhaiin tuipui dêna irkuanga fe hrangin Paula kha an tîra, Sila le Timothea chu an la oma.

¹⁵Paula zu thakhai khan Atheni dênin an zu thaka, Sila le Timothea kha irhnot taka a kuang fe hrangin Paula chong bê chôiin an kîr nôk tâka.

¹⁶Khan, Paula’n, Atheni-ah anni kha a lei nghâk laiin kha khua kha millim sip a nih ti a hmu’n a lungrîl a na pe oka.

¹⁷Khanchu, Sinagoka Judahai le Jentailhai, Pathian biakhai kha a sêl ngai; bazâr hmuna khom khataka omhai ngân chu a nitin a sêl ngaia.

¹⁸Khan, Epikuria mi senkhat le Stoik mi vâr senkhathai leh khom an irdoia. Senkhatin, “Hi hmûr thiampa hin imo insîr a itum?” an tia. Senkhat nôkin chu, “Ram dang Pathian thu a insîr hrang a ni hi te,” an tia. Hianga an itih nasan chu Paula’n Jisua thu le thoi nôk thu an sîr sika a ni.

¹⁹Khanchu, Paula kha an koia, roirêlna Areopagia khan an hruaia; a kuang “Hi irchutirna thar ni insîr ngai hi an hriat kin nuam.

²⁰Ni insîr kin inhriathai hi lan hre ngai ma ung. Khasikin, itina mo a ini an hriat kin nuam,” an tia.

²¹(Atheni kho sûng mi murdi le kho dang mi a zuang iomhai khomin an zoro nei murdi thil thar insîrna le irngainaa hmang an nuama.)

²²Khan, Paula kha roirêlna Areopagia maton taka a ngîra, “Nangni Atheni mihai, lam tinrênga sakho mi tak nin nih ti kin hriat.

²³Nin kho sûnga ki lêng malamin chubai nin mûk ngaihai ki ena, maichâm inkhat, “Inhriat loi Pathian ta hrang,” tia irziak ki hmua. Nin inhriat no chubai nin mûk mai ngai kha atûna nangni ki insîr pe hi a ni.

²⁴Pathian, rammual le a sûnga thil tinrêng siamtu chu, irnêng le irvân Rengpa a ni sikin kuta sin inhaia om ngai mah.

²⁵Mihriamin ei sem hrang thil ite khom irsam mah. Ama ngei kha tinrêng laia hringna hai, phûksâna hai le thil tinrêng pêktu a ni.

²⁶Rammual pumpuia om hrangin, mi inkhat ata zât tin a siama. An ta hrangin hun bihai a khit pehaia, an omna hranghai a khang pehaia.

²⁷Hi a ithô nasan chu ama an ena, an zonga an hmu lik theina hranga a ni. Khannisian, Pathian khan tûte ni hla ual mah.

²⁸Mi senkhatin an iti angin, ‘Ama sikin ei hring, ei ichâng, ei iom a ni.’ Nin hla phuahai khomin an iti sa angin, ‘Eini khom a nâihai ei ni.’ ti hi.

²⁹Khanchu, Pathian irchihai ei ni’n chu, Pathian chu rângachak mani, sumin mani, lung mani, mihriam thiamthei le inkunga songhai ang mani hi niin ei ibe hrang ni mah.

³⁰Pathianin ama ei inhriat no laia khan chu inhre loi om a tho ngaia; khannisianlân, atûn chu ram tina mi murdi irlet hrangin chong a ipêk tâk a ni.

³¹Nikhua a khita, kha nia khan a mi phuntu kha rammuala mi murdihai roi dik takin inrêltir a ti. Kha thu kha chu Pathianin ama kha thina irthoka kaithoiin mi murdi kuang an hriattir ta,” a tia.

³²Khan, thina irthoka thoi nôk thu an inhriat le chu senkhatin an innuisana; senkhat nôkin chu, “Hi thu hi ni kuang ata a la’rngai nôk kin nuam,” an tia.

³³Khanchu, Paula chu an lai ata a suak tâka.

³⁴Senkhat chu a kuang an thop ngita an iam tâka. Khahai laia senkhat chu, Areopagia roirêltu pâla mi Dionusia le nupang inkhat ar hming Damari le mi danghai leh an ni.