Read Hrangkhol TÎRTÔNHAI SINTHO 18 Bible Online

TÎRTÔNHAI SINTHO 18 - Hrangkhol bible

TÎRTÔNHAI SINTHO 18

¹Kha zoi chu Paula’n Atheni a suaksana, Korinth khuaa a fe tâka.

²Juda mi inkhat Akuila a hmua, ama kha Ponto rama suak a ni. Rom rêng Klaudia khan Juda murdi Rom khua ata an hnotsuak sikin a dôngma Priskili leh Itali ram ata hong tung phing an ni. An kuang a chaia,

³a sintho ang sin an ni sikin a tungna haia, a sinpui sa ngaia; puan in sin ngai an ni.

⁴Sabat ni rikipin Sinagoka thu an sîra; Judahai le Grikhai kha in-iamtirhai tumin a beihai ngaia.

⁵Sila le Timothea Makedonia ram ata an hong tunga khan Paula chu thuhril sina ar pêk tâka; Jisua kha Krista a nih ti Judahai kuang a hrilfiah ngai.

⁶Khannisianlân, Judahaiin an doia, an insîrinsiatin chu Paula’n a puan an thika, “Nin thi khomin nangni mophurna a ni ta, kei chu ki’rthiang ta. Atûn chu Jentailhai tiang irhei ta ki ti,” a tia.

⁷Khatak ata a fe suaka, mi inkhat Tita Justa ina a lûta, ama kha Pathian ngaisak mi tak a nia; a in khom Sinagok kôla om a ni.

⁸Sinagok hruaitu Krispa le a in sûng mihai murdi’n Rengpa an iama, Korinth khuaa mi tamtakhai khomin an inhriata, an iama, baptisma an chang tâka.

⁹Zân khat chu Paula’n inlârna a hmua, Rengpa khan a kuang, “Chi no roh, dâihrek loiin thu insîr mai roh.

¹⁰Keima ni kuang ki om sikin nang innatir hrangin tûte ni chunga kut tha no nihai, hi khuaa hin mi tamtak ki nei,” a tia.

¹¹Paula chu an kuang Pathian thu irchutirin kum khat le tha ruk a om tâka.

¹²Khan, Gallioa, Akaia rama Ramoptu a chang laiin Judahai an inruala, Paula an chela, roirêlna hmuna an hruaia.

¹³“Hi mi hin dân ni loia Pathian biak hrangin mi inthêm inhnê a tum ngai,” an tia.

¹⁴Paula chong hrang a ti le, Gallioa khan Judahai laia, “Judahai, hi hi thil dik loi mani a ninole tho’nsual mani lua ni sian chu, irlêk loiin nangni ngaitua pe ki ti.

¹⁵Khannisianlân, thuhai irhminghai le nin dân chungchânga nin buaina thu chian a niin chu, nangni’n ngaitua roi. Kei chu khaang thu kha chu irngaitua nuam ma ung,” a lei tia.

¹⁶Roirêlna in ata kha an suaktir tâka.

¹⁷Khannisian mi dang murdi chu Sinagok in hruaitu Sosthena chu an chel tâka, roirêlnaa khan an zêma. Kha khom kha Gallioa khan, kha an thil tho kha itea irngai mah,

¹⁸Paula chu nikho sôt tak a la châma, kha zoi hnunga chu urênghai kha satakin an thâhaia, Suria ram tiang panin irkuangin a fe suak tâka, a kuang Priskili le Akuila khom an fe sa. Paula’n chonginkung a lei nei sikin, Kenkriai khuaa a sam a lei ep baka.

¹⁹Khanchu, Efesi an tunga kha khan Priskili le Akuila kha a mâkhaia; ama kha Sinagoka a lûta, Judahai kha thu a la’rtukpuihaia.

²⁰Khanchu, anni khan sôt taka om hrangin an ngêna, khannisian, nuam pehai maka.

²¹Khan, an kuang, fe khomin lân, “Pathian lungdo a ni’n chu nin kuang la hong nôk ki ti,” tiin chonghoiin an thâhaia, Efesi-a irthokin irkuangin a fe tâka.

²²Kaisari a tungin chu Jerusalema a fea, Koiindang chubai a mûka; kha hnung chu Antiokei-a a fe tâka.

²³Kha khan sûn tamtak a om hnungin a fe nôka, iamtuhai indet thiaiin Galatia ram le Frugia ram a’rfang suak zit tâka.

²⁴Kha laia khan Juda inkhat a’rhming Apolova, Alexandria suak, Efesi-a a zuanga. Ama chu thu’nsîr thei tak a nia, Pathian Thuhai khom an hriat oka.

²⁵Ama kha Rengpa Lampui thu irchu tâk a nia, lungrîla sathnem irngai tak irveiin Jisua thu an sîr ngaia, dik takin a’rchutir ngaia. Khannisianlân, Johana baptisma thu vai kêng a la inhriat.

²⁶Sinagoka hâi takin thu’nsîr a phuta khan chu, Priskili le Akuila khan a thu’nsîr an inhriatin chu an ina an hruaia, a kuang Pathian Lampui thu dik ualin a hrilfiah pehaia.

²⁷Khan, ama kha Akaia rama fe a tum sikin Efesi-a iamtuhaiin an inthora, ama an lei lômna hrangin Akaia rama iamtuhai laia lekha an irziak pea. A tungin chu Pathian lungkhamna sika iamtu hong changhai ta hrangin changpuitu satak a chang ta.

²⁸Vântâng inhriata Judahai kha a sêl indonga, Pathian Lekha thu hmangin Jisua chu Mesia a nih ti an lang ngaia.