Read Hrangkhol TÎRTÔNHAI SINTHO 19 Bible Online

TÎRTÔNHAI SINTHO 19 - Hrangkhol bible

TÎRTÔNHAI SINTHO 19

¹Apolova kha Korinth khuaa a la om laiin, Paula’n chu sak tiang ram hual vêl ar fanga, Efesi a tunga. Kha khan iamtuhai senkhat a hmua,

²ama khan, “Nin iam phuta khan Irtha Irthiang nin dong mo?” a tia. Anni khan, “Irtha Irthiang a om tih lua inhre ma ung,” tiin an sâma.

³Ama khan, khante, i baptisma mo nin ichang?” a tia. Anni khan, “Johana baptisma,” an tia.

⁴Khanchu, Paula’n an kuang, Johana khan mihai kuang, ki hnunga zuang hrangtu Jisua nin la iiam hrang a ni tiin an sualna ata irlet tâkhai kha a ibaptis ngai a ni kha,” a tia.

⁵Kha kha an inhriat le chu Rengpa Jisua irhmingin baptisma an chang tâka.

⁶Khanchu, Paula’n an chunga a kut a’rnghata, Irtha Irthiang an dong zôi zel tâka, chong inhriat loihaiin an chonga, Pathian thu an insîr tâka.

⁷An rêngin pasal sômhleihni vêl an ni.

⁸Paula chu Sinagoka lût maiin tha thum chu Pathian Ram thurchi irtukpuiin, inthêm inhnê tumin hâi takin thu an sîr maia.

⁹Khannisianlân, senkhat chu a sân an lei ngara, iam nuam mahaia, mipui makunga Rengpa Lampui thu kha an insîrinsiata. Khasikin, Paula’n anni kha mâkin, iamtuhai kha a hruaia, a nitin zîng dâr sômhleikhata irthokin khohloi dâr minli tena Turana irchûna ina khan thu an sîr irhlômpuihai ngaia.

¹⁰Khaang khan kum hni a thoa, khasikin, Asia rama om murdi, Judahai le Grikhai khomin Rengpa thu an inhriat tâka.

¹¹Khan, Pathianin Paula kuta thilirkhêl danglam tak an thoa.

¹²Paula’n a lei ihmang ngai hmâihuina le a puan silhai kha dam loihai kuang an chôia, an natnahai a boi pehai ngaia, an sûnga ramilhli ten khom an suak ngai.

¹³Khanchu, Judahai, ramilhli inhnot suak tuma irvâk ngaihai khomin Rengpa Jisua irhming an hmanga. Ramilhlihai kuang, “Paula’n a insîr ngai Jisua irhmingin a sûng ata suak hrangin thu nang ki pêk,” an tia.

¹⁴Juda Ochai Inlaltak Skeva khan nâipasal sari khaanga tho ngai a neia.

¹⁵Khannisianlân, ramilhli khan an kuang, “Jisua kin hriat, Paula khom kin hriat; nangni rêk hi chu tuhai mo nin ini?” a tia.

¹⁶Khanchu, a sûnga ramilhli neitu khan a hong inboa, an hnê zit tâka, kha in ata kha pop iliam le an puan chet chitin an intân zit tâka.

¹⁷Efesi-a om Judahai le Grikhai murdi’n kha thu kha an inhriatin an chi tak taka. Khanchu, Rengpa Jisua irhming an thang ual tâka.

¹⁸Iamtu tamtak an honga, vântâng inhriata an tho’nsualhai an inpuanga.

¹⁹Dôi hmang ngai tamtak khomin an lekhabuhai an hong irchuna, mi tin mit hmua an hal tâka, khan a man an insâpa, sîngringa (50,000) a niin an inhriat.

²⁰Khaang taka khan Rengpa thu an dara, an hnê thiai tâka.

²¹Kha zoiin chu, Paula’n Makedonia ram le Akaia ram irfang zoi baka, Jerusalema fe a tuma. “Kha khan ki fe zoiin chu Rom khua khom hro sa ngêt ki ti,” a tia.

²²Khasikin, a changpui ngai mi inhni, Timothea le Erasta kha Makedonia rama a lei tîrhai baka, ama kha Asia rama a la oma.

²³Kha lai vêla khan Rengpa Lampui thu sikin buaina lian tak Efesi-a a oma.

²⁴Mi inkhat ar hming Demetria, sumin Artemis tempil in irlim siam ngai a oma, kha a sin khan a siam thiamhai laia inlâpna lian tak a pêk ngaia.

²⁵Khasikin, ama khan anni kha a koibûmhaia, an sintho anga thohai le; khanchu, an kuang, urênghai, hi sin hi ei irchongna a nih ti nin inhriat.

²⁶Khannisianlân, hi Paula sintho hi nangni khomin nin hmu, nin inhriat, Efesi khuaa vai khom ni loiin Asia ram pumpuia ti hrang dôrin hi mi hin, ‘kuta siam pathianhai hi pathian ni viat mahai,’ tiin mi tamtak an thêm inhnê zoi tâka.

²⁷Khasikin, ei sintho hi mi’n ngainêp an ti, ti vai ni loiin, Asia rama mi murdi le rammuala mi’n an ibiak ngai pathiannu Artemis roiinpui khom boi a ti, ti hi ichi a iom a ni,” a tia.

²⁸Kha chong kha mipuihaiin an inhriat le chu an ning an mur tâka, “Efesi khuaa Artemis hi a roiinpui ok,” tiin an khêka.

²⁹Khanchu, a kho pumpui an buai tâka; Gaia le Aristarka, Makedonia rama om, Paula hnungzuihai kha an chela, a pâlin enhoi siamna ina an intânpuihaia.

³⁰Paula’n mipui makunga va ngîr a tuma, khannisianlân, iamtuhaiin phal mahai.

³¹Khan, Asia ram ulian senkhat Paula rualhai an oma, khahai khom khan Paula kha enhoi siamna ina van lang loi hrangin chong an inhriattira.

³²Khan, ar bûmhai an rêngin an buai tâka; mi tam takin an irbûmna bi khom inhre mahai. Khasikin, senkhat thu inkhat an khêkpuia, senkhat thu dang an khêkpuia.

³³Judahaiin chu Alexandara chu mân tiang an nampai sikin, mipui laia senkhat chu ama sika an tia. Alexandara chu dâihrek hrangin kutin an hong zâpa, mipui kuang chu a thiam thu insîr a tuma.

³⁴Khannisianlân, ama kha Juda a nih ti an hriat le chu, dârkâr hni ang dôr, “Efesi-a khuaa Artemis hi roiinpui tak a ni,” ti inzenin an khêk mur mura.

³⁵Khopui lekha irziaktu khan mipuihai an dâihrektir zoiin chu, “Efesi mihaio, Artemis roiinpui tak biak in le a’rlim irthiang irvân ata zuang tâk kha, enkoltu chu Efesi kho mihai hi nin nih ti tu mo om?

³⁶Hi thil hi sêl zoi loi a ni hnungin, nin idâihrek hrang a ni, ngaituah irzom loiin ite nin itho hrang ni mah.

³⁷Hi nin hong hruaihai hi tempil inmok ngai ni mahaia, ei pathian insîrinsiattu lak ni mahai.

³⁸Demetria le a sinthohai khomin tu chunga khom thu’ntak an neiin chu roirêltuhai ei neia, roirêlna in khom a’rhong mai, so son van tung ri se.

³⁹Khan, thu’ntak dang pial nin neiin chu inkhôm ngai dêna ngaitua ni a ti.

⁴⁰A vuana inkhôm sika hin buaina insuahai tiin ni sia an ti, ti hi ichiom a ni. Hi buaina hi a bi boi a ni sikin, tûte lakin a bi insîr thei no nia,” a tia.

⁴¹Kha kha a ti zoiin chu mipuihai kha an chîntir tâka.