Read Hrangkhol TÎRTÔNHAI SINTHO 2 Bible Online

TÎRTÔNHAI SINTHO 2 - Hrangkhol bible

TÎRTÔNHAI SINTHO 2

¹Pentikos nî a hong tungin chu an rêngin hmun khata an omkhôm zita.

²Khanchu, voikhat rengin irvân ata phâivopui anga irhâi a zuang tung thuta, an toina in kha irhâi khan a zuang sip zita.

³Milei anga om meidôn irsem indarin an hmua, an chunga a chuang chita.

⁴An rêngin Irtha Irthiangin an sip zita, Irtha’n a inchongtirhai angin chong dangin an chong tâka.

⁵Irvân hnuaia nam chi tinrêng laia om, Pathian ngaisak Judahai kha Jerusalema an châma.

⁶Kha irhâi kha an inhriattin chu mi tamtak an hong irchuna, an thu’nsîr kha mi tinin mâni chong ang chitin an inhriat sikin an milung sûnga an lei buaia.

⁷Irkhêl an ti tak taka, “En u ta, hi thu’nsîr murdihai hi Galili mi mo ni mahai?

⁸Itina mo ei rêngin mâni chong ang chitin ei inhriat seng thei ma ni?

⁹Senkhat Parthai mi, Medai mi, Elimatai mihai ei nia; senkhat Mesopotamia rama om, Judai rama om, Kapadokia ram, Ponto le Asia ram,

¹⁰Frugia le Pamfulia ram, Aigupta le Libia rama Kurini khua kôlvêla omhai ei nia; senkhat Rom khua ata hong,

¹¹Judahai le Juda saphun hai ei nia; senkhat Kret chômbung mi le Arab rama mi ei nia; khannisianlân, Pathian sintho roiinpuihai an insîr hi, mâni chong ang chita ei inhriat hi” an tia.

¹²An rêngin a’rngaina lam chang inhre loiin ar khêl an tia, “Hi hi imo a ini ta ngai!” an tia.

¹³Senkhatin chu, an innuisanhaia, “Uain thar an inrui kêng!” an tia.

¹⁴Sômhleikhathai laia Petera kha a ngîra, mipui laia khan inring takin thu an sîra, “Nangni Judai rama mihai le Jerusalema om murdihaio, ki thu’nsîr hi irngai roi.

¹⁵Hihai hi nin iiam angin inrui mahai, zîng dâr kuak vai kêng a la ini.

¹⁶Hi thil hi deipu Joela’n a lei insîr kha a ni:

¹⁷Pathianin, ‘Sûn hnungkhôna chu hi hi la tho ki ti: Mi murdi chunga Irtha la buak ki ta, Nin nâipahai le nin nâinuhaiin ki thu lan sîr an ta, Nin ruathartehaiin inlârna la hmu an ta, Nin tarhaiin irmangin phan an ti.

¹⁸Kha nikhuahaia khan chu ki sinthotuhai, Nupang pasal chunga Irtha buak ki ta, ki thu insîr an ti.

¹⁹Chung tiang irvâna sin irkhêlhai, Hnuai tiang irnênga thilirkhêlhai inhmutir ki ti. Thisen, mei, meikhuhai om a ti;

²⁰Misa inthim a ta, tha thisen chang a ti; Rengpa nikhua roiinpui le poimo tak zuang tung mân.

²¹Khanchu Rengpa irhming irlam murdi’n chu Saninhringin om an ti,” a ti,’ iti kha.

²²Nangni Israel mihaio, irngaitua u ta; nin inhriat chit angin Pathianin Nazaret Jisua hmangin thil roiinpui tak takhai, thilirkhêl hai sinirkhêl hai nin laia ngêt tiin. A mi inkung a nizia a sân an lang infeltir a ni kha te.

²³Ama kha Pathian lei itum lei irêl angin nin kuang pêk a nia. Nangni’n nam dang mihai hmangin krosa nin hembea, nin ithat kha.

²⁴Khannisianlân, Ama kha chu thina ichel sua thei a ni no sikin Pathianin thina ata inzôkin, a kaithoi ta,

²⁵Davida khomin a chungchâng hianga a lei insîr kha: ‘Ki makunga Rengpa ki hmu mai ngaia, ki kuang a oma, Ite’n nin hnîng thei mah.

²⁶Khasikin ki lungrîl a lôma, ki chong khom lômna’n a sipa, ki taksa khomin a sabei ngit a ni.

²⁷Ki’rtha mithi khuaa mâksan no chi nia, Ni mi irthiang ruak hmon phal no chi ni,

²⁸Hringna lam ni nir hmua, Ni hmêl hmu’n lômin sip ta ki ti,’ a tia.

²⁹Urênghaio, irchibul Davida thu kha hâi takin nangni ki hril, ama kha a thi tâka, an phûma, a thân khom atûn ten ei kôla a la om mai.

³⁰Ama kha deipu a nia, ar chihai laia tu mo khat a rêngtoihmun lua hrangin Pathianin a kuang chong an kung ngit ti an hriata.

³¹Khan Davida khan Pathianin sûnmatona imo a itho hrang ti kha a hmua, khasikin Mesia thoinôk hrang thu kha a insîr a nia, ‘Mithi khuaa mâksan ni maka; a ruak khom hmon no nia,’ ti thu a insir a ni.

³²A ni, kha Jisua kha Pathianin a kaithoi nôk tâka, kha thu kha ei rêngin an hriatuhai ei ni.

³³Pathian chang tiang chôiindôm a ni tâka, Pa kuang ata Irtha Irthiang inkung kha a donga, nin ihmu le nin inhriat hi a thilpêk a zuang ibuak chu a ni hi.

³⁴Davida irvâna fe mak e, ama ngeiin ‘Rengpa khan ki Rengpa kuang ki chang tiang lei toi mai roh.

³⁵Ni râlhai ni ke irnghatnaa, hong sia ki ti,’ a itihna kêng.

³⁶“Khanchu, Jisua nin ihêmbe kha, Pathianin Rengpaa le Kristaa a siam ngei ti Israel mi tinin inhre ngêt ri sehai” a tia.

³⁷Khanchu, kha thu kha an inhriatin chu an lungrîl a sân a tôna, Petera le tîrtôn danghai kuang khan, “Urênghaio, imo kin itho hrang tâk?” an tia.

³⁸Petera’n, “Irlet unglân nin sualhai ngaidam a nina hrangin Jisua Krista irhmingin baptisma chang chit roi; khanchu, hi thilpêk, Irtha Irthiang hi, dong nin ti.

³⁹A inkung hi nangni le nin nâihai le ram hla taka mi murdihai hrang le Rengpa ei Pathianin a kuanga a ikoihai hrangin a ni,” a tia.

⁴⁰Thu dang tamtakin a hrilfiaa, “Atûn lai mi sualhai ata hi irdîn roi” tiin a ngênhaia.

⁴¹A thu zômhai murdi’n baptisma an changa; kha nî khan mi sângthum vêlin an thop sahai tâka.

⁴²tîrtônhai thu irchutirin irpôlkhôm le bai khoia chongchaiin sathnem irngai takin an oma.

⁴³tîrtônhai khan sinirkhêl le thilirkhêl tamtak an tho sikin mi tinin an chihai tâka.

⁴⁴A iamhai murdi chu irpôlkhôm maiin an neinun tinrêng irkopin,

⁴⁵an irchonhai an neinunhai murdi an zuara, an intak lam ang chitin an rênga kuang an sem ngaia.

⁴⁶A nitin milung hmunkhatin tempila an inkhôm ngaia, an in tiang khom raifân tak le milung chuk takin khalâi an ot suam ngai.

⁴⁷Pathian an inpâka, mi murdi lôm lamin an oma. Khan, Rengpa’n a saninhringhai ka chu a nitin an kuang an thoptirhai maia.