Read Hrangkhol TÎRTÔNHAI SINTHO 21 Bible Online

TÎRTÔNHAI SINTHO 21 - Hrangkhol bible

TÎRTÔNHAI SINTHO 21

¹Anni kha chong kin bê zoiin chu irkuangin kin suak tâka. Intûn thalin kin fea, Kos kin tunga, a tûka Rodi kin tung nôka, khataka irthokin Patara khuaa kin fe.

²Kha khan irkuang inkhat Foiniki pan hrang kin hmua, kin chuanga kin fe nôk ta.

³Kupra an langna hmun kin phâka, Kupra kha vei tiang mâkin Suria tiang kin pan. Tura chu neinun an insum sikin muanga kin chum.

⁴Kha khan iamtuhai senkhat kin hmua, an kuang sûn sari kin châm. Anni khan Irtha Irthiang inhrilin Paula kha Jerusalema fe loi hrangin an khapa.

⁵Kha zoia chu kin suaka, kin fe’n chu irchutirhai khan an rêngin, an dôngma, an nâihai le kotsua dênin an nin thaa, tuipui kôla khan khûksadelin kin chongchaia.

⁶Chubai kin irmûka, irkuanga kin chuanga, in sûng tiang an kîr nôk tâka.

⁷Tura ata kha irkuangin Tolemai khua kin tunga, urênghai chubai kin mûka, an kuang sûn khat kin châma.

⁸A tûka kin suak nôka, Kaisari khua kin tunga, Thurchi Sa hriltu Filipa ina kin lûta; ama kha upa sarihai laia om kha a ni. A ina kin tung tâka.

⁹Nâi dôngmate irthiang minli a neia, Pathian thu an hril ngai.

¹⁰Nikhua sôt ian kin châma, kin châm sûngin Judai ram ata deipu inkhat Agaba a zuang chuma.

¹¹Kin kuang a zuanga, Paula kongkhit kha a lâka, a ke le a kut ar khita, “Jerusalem Judahaiin hiang hi kongkhit neitu hi khit an ti, Jentailhai kuta pe an ti, Irtha Irthiangin a ti,” a tia.

¹²Kha thu kha kin inhriatin keini le kha khuaa mihai khan Paula kha Jerusalema fe loi hrangin kin ngên khaka.

¹³Paula khan, “Imo nin itina, nin chap nin chapa, bei nin ni indongtira nin dôptir nin itum mo? Rengpa Jisua irhming sika khan Jerusalema khan khit vai mo ki’rhuama, thi khom ki irhuam kêng,” a tia.

¹⁴Inthêm thei a ni no tena chu, ‘Rengpa ircham cham ni ri se,’ kin tia, kin chîn tâka.

¹⁵Kha hnung chu kin irsiama, Jerusalema kin hong fe ta.

¹⁶Kaisaria khuaa irchutir senkhathaiin an ni zuia, kin tungna hrang Nasona ina an ni hruaia; ama kha Kupra chômbunga irchutir masahai laia om a ni.

¹⁷Jerusalem kin tungin chu urênghai raifân takin an ni lei lôm a ni.

¹⁸A tûka chu Paula pâlin Jakoba kuang kin chaia, koiindang upa murdi khom an lei oma.

¹⁹Paula’n khahai kha chubai a mûk zoiin a sin thôna hmanga Pathianin Jentailhai laia thil a itho kai chu chipchiar takin a hrila.

²⁰Urênghai khan kha thu kha an inhriatin Pathian an inpâka, Paula kuang khan, “Urêngpa, Judahai laia iamtu an tam tâkzia ni hmua, ei dân irngaiinnat zit an nia.

²¹Nangin Jentailhai laia Juda om murdi kha Mosia dân masana, an nâihai sertan loi hrang le Judahai dân zômloi hrangin nir chutir ngai ti mi insîr an inhriat.

²²Itin mo a ini hrang tâk? Ni zuang tung ti an inhriat ngêt hrang a nia.

²³Khanchu, ni kuang kin thu insîr ang hin tho ro ba chonginkung nei lai pasal minli ei laia an om.

²⁴Kha mihai kha hruaiin lân, irthâr sa’n lân, an sam ep man tum pehai roh. Khanchu, mi murdi’n ni thurchi an inhriat hi milak a ni, nangma ngei khom dân ang takin ni la iom mai kêng a nih ti inhria an ti.

²⁵Jentailhai laia iamtuhai chungchâng thu chu, millim biakna thil fa loi hrang hai mani, sa thisen fa loi hrang hai mani, sa ise that hme fa loi hrang hai mani le irdit mâksan hranga ei thu rêlhai ei thon tâk kha te,” an tia.

²⁶Khanchu, a tûka Paula’n khan mihai kha a hruaia, anni leh khan ar thâr sa tâka. Khan, tempila a lûta, an irthâr zoi hrang ni le an irhmang irkipa irbôlna an hlan pehai zoro hrang ni ochai an hriattira.

²⁷Sûn sari a hong phâk vângin Asia rama Judahaiin Paula chu tempila an hmua. Mipui an inphûthaia, Paula kha an chel tâka.

²⁸“Israel mihaio, ni changpui roi. Hi mi hi ei irchibulhai, ei dân hai le irkal lama ram tina mi murdi irchu ngaitu kha a ni, atûn khom khan tempila hin Grik mihai a lûtpuihaia, hi hmun irthiang hi a iporinchetir a ni,” an tia.

²⁹Efesi kho mi Trofima kha khopui ama leh an hmu masa tâk sikin, Paula’n ama kha tempila a hruai lût mani an iti a ni.

³⁰An kho pumin an buai zoi ta, mipui an hong intân sup supa. Paula kha an chela, tempil ata an hnûk suaka, mikothai an khâr zôia.

³¹Ama kha that an tum laiin Jerusalem kho pumpui a buai ti sipai hruaitu inlal takin a len hriata.

³²Kha pa kha sipaihai le sipai irza hruaituhai hruaiin an laia an tâna. Mipui khan sipai hruaitu inlaltak le sipaihai kha an hmu le chu Paula an izêm kha an mong tâka.

³³Sipai hruaitu inlaltak khan a hong nâia, Paula kha a chela, thîrhrui inhni’n an khittira, tu mo a ini, imo a itho ar dona.

³⁴Mipui laia senkhat thu irrualin an khêka, senkhat thu dangin an khêka, buaina sikin a kho mo dik inhre thei maka; Kulpui sûnga an hruaitirhai tâka.

³⁵Anni khan kalbi dênin an hruaia, mipuihai an pût hrai sikin sipaihaiin Paula kha an irdona.

³⁶Mipuihai khan, “That roi” tia khêkin an zui sup supa.

³⁷Khan, Paula’n Kulpuia an hruai lût hrang lai khan Paula’n sipai hruaitu inlaltak kuang, “Ni kuang thu bâi khat insîr thei ning mo?” a tia. Ama khan, “Grik chong ni ithei ma ni?

³⁸Khanchu, Aigupta mi inkhat kha mâna buaina insuaka mi that uar, sâng minlihai ramchâra hruai suaktu kha ni ini loi mo?” a tia.

³⁹Paula’n, “Juda, Kilikia rama Tarsa khuaa suak ki ni, kho poimo mi kêng ki ini. Ngaihoi takin mipui laia nin chongtir roh,” a tia.

⁴⁰Phal a hong ni le Paula kha kalbia khan a ngîra, mipui kha dâihrek hrangin kutin a zâphaia, an dâihrek tâka, Hebrai chongin thu an sîr tâka.