Read Hrangkhol TÎRTÔNHAI SINTHO 22 Bible Online

TÎRTÔNHAI SINTHO 22 - Hrangkhol bible

TÎRTÔNHAI SINTHO 22

¹“Urênghai le pahaio, ki thiamna thu nin kuang ki insîr hi irngai roi,” a tia.

²Hebrai chongin thu an sîr tih an inhriattin chu an dâi nôk uala.

³Khan, Paula’n, “Juda mi, Kilikia rama Tarsa khuaa suak ki ni; khannisianlân, hi khuaa Gamaliela irchutirna hnuaia seilian ki ni. Ei irchibulhai dân kha ngar taka irchu ki nia, a vuan sûna nangni ang taka hin Pathian tianga irpe mi ki ni.

⁴Hi Lampuia mihai hi thathai hrang dôrin deng kin theitir ngaia, nupang pasal ki chela, intângna ina kin khumtir ngai.

⁵Ochai inlaltak le upa toihai khomin an nin hriatpui. An kuang ata Damaska urênghai pêk hrang lekha ki lâka, khataka omhai kha hrem hrangin khit puma Jerusalema hruai hrangin ki fe tâka.

⁶“Khan, ki fea, Damaska ki tung hrangin sûn lai taka, irningloiin irvâna irthokin vâr a saterengin a ni zuang êl phuta.

⁷Khanchu, hnuaia kin rîl raka, ‘Saula, Saula! ithoa mo deng ni ni intheitir?’ iti chong kin hriata.

⁸Keiin, ‘Rengpa, tu mo ni ini?’ ki tia. Ama khan ‘Jisua, deng ni intheitirtu,’ a tia.

⁹Khan vâr kha chu an hmua, ki ichongpuitu chong kha chu inhre mahai.

¹⁰Khan keima’n, ‘Rengpa, imo ki isin hrang?’ ki tia. Rengpa’n ki kuang, ‘Thoiin lân, Damaska-a lût roh, kha khan Pathianin thil tinrêng ni isin hranga a lei inkung murdi ihrilin om ni ti,’ a tia.

¹¹Khan, a vâr hrai sika khan ki mit khom a zîng khaka, ki chanpuihai khan kêng Damaska-a khom an ni ihruai lût.

¹²“Mi inkhat, Anania, dân ang taka Pathian bê mi, kha khuaa Juda murdihaiin an inpâk kha,

¹³ki kuang a honga, ki kôla a ngîra, ki kuang, ‘Urêng Saula, ni mit hong vâr ri se,’ a ni tia. Khanchu ki hong hmu nôk thei tâka, ama ki hong ena.

¹⁴Ama khan, ‘Ei irchibulhai Pathianin a nuamlam inhriata Mi feltak kha hmua, a hnuk irhâi ngêt inhre hrangin nang an thang ta.

¹⁵Ni thil hmu le inhriat thua khan mi murdi kuang thu’nhretu ni ini hrang a ni.

¹⁶Ir-ial loiin thoiin lân, ar hming sâmin baptisma changin lân, ni sualhai irsunfâi ta roh,’ a ni tia.

¹⁷“Khan Jerusalema ki kîr nôka tempila ki chongchai laiin inlârna’n,

¹⁸Rengpa ki hmua, ki kuang, ‘Irhnotin lân, Jerusalem mapai chian ro; ki thu ni insîr hrang hi an pom no hrang sikin,’ a ni tia.

¹⁹“Keiin, ‘Rengpa, Sinagok tena lûtin nang a iamtuhai ki zêma, intângna ina kin khumtir ngai kha, anni ngeiin an inhriat.

²⁰Ni thu’nhretu Stefana thisen an insua lai khan, keima khom an laia ki ngîr saa, a sa ki itipuihai kêng, a thattuhai puan diar ki lei enkol,’ ki tia.

²¹Ama khan ‘Fe roh, hla taka Jentailhai kuang nang ki itîr hrang a ni,’ a ni ti tâka,” a tia.

²²Kha ten kha an sîra, an irngai tena chu hnuk irhâi inring takin an khêka, “Inboipai roi! thatpai roi! hring inruk ni ma!” an tia.

²³An khêka, an puanhai an hlîka, vâiphin irvân tiang an vôra.

²⁴Sipai hruaitu inlaltak khan Paula chu kulpuia a hruai inlûttira, a chunga khaang dôra an ikhêksan kha a hmu suak theina hrangin hrui hruala zêmin indôp hrangin thu a pêka.

²⁵Zêm hranga savun hrui leh an khit zoiin, Paula’n a kôla ngîr sipai irza hruaitu kuang, “Rom mi, thiam no inchangtir khom la ni loia zêm mo a’rthiang,” a tia.

²⁶Sipai irza hruaitu khan inlaltak kuang a fea, “Itin mo ni itho hrang? Hi pa hi Rom mi a lei ini chian kêng,” a tia.

²⁷Sipai hruaitu inlaltak kha a honga, a kuang, “Rom mi mo ni ini? Ni hril ro” a tia. Paula’n “O, ki ni,” tiin a sâma.

²⁸Ama khan, “Keiin chu Rom mi nina nei hrangin sum tamtak ki ithâm kêng,” a tia, Paula’n chu, “Kei chu Rom mia suak pial ki ni,” a tia.

²⁹Khanchu soisak puma indôp hranghai khan Paula kha an chînsan zoi tâka, sipai hruaitu inlaltak khom khan Rom mi a lei ikhit chian tih a hong inhriatin a sân a chitinrîm tâka.

³⁰A tûka chu Judahaiin Paula chunga thu imo an nei inhriat infel tumin sipai hruaitu inlaltak khan Paula kha a sûta, khanchu Paula kha a hruaia. Ochai inlalhai le Sanhedrin mihai irbuk hrangin thu a pêkhaia. Paula kha an makunga an ngîrtira.