Read Hrangkhol TÎRTÔNHAI SINTHO 23 Bible Online

TÎRTÔNHAI SINTHO 23 - Hrangkhol bible

TÎRTÔNHAI SINTHO 23

¹Paula’n roirêltuhai kha a hong enin felhaia, “Urênghaio, a vuan sûn ten hin Pathian makunga ki om lama ki sia le sa inhriatnaa mani, thei nona ite nei ma ung,” a tia.

²Ochai inlaltak Anania khan Paula kôla ngîrhai kuang, “A bâi kha inbên pe roi,” a tia.

³Paula khan, “Nang, bang innôt invârpa, Pathianin nang inbênna ti, Dân anga mi ngaitua hrangin ni toia, dân no anga mi inbên hrang ni iti mo?” a tia.

⁴A kôla ngîrhai khan, “Ochai inlaltak ni ingo mo?” an tia.

⁵Paula’n, “Ochai inlaltak a nih ti ki inhriat loi a ni, ‘Nin nam roirêltu chunga thu saloi insîr no roh,’ ti irziak a ni,” a tia.

⁶Paula’n senkhat Sadukaihai, senkhat Farisaihai an nih ti an hriata, Sanhedrin-ah khan a khêka, “Urênghaio, kei khom Farisai ki ni, Farisai nâipa khom ki ni. Mithi thoi nôkna a om tûngna thua a roirêlna makunga ki ingîr a ni,” a tia.

⁷Kha kha an sîr zoiin chu Farisaihai le Sadukaihai kha an irsêla, Sanhedrin kha an irsen tâka.

⁸Sadukaihai khan, “Thoinôkna zel om mah, vântîrtôn hai, irtha hai khom om mah,” an tia. Farisaihai chu kha kha an iama.

⁹Khanchu buaina lian tak a suak tâka, Farisai tianga Dân irchutirtuhai senkhat an ngîra, an san khaka, “Hi pa chunga hin ite thil dik loi hmu ma ung, Irtha’n mani vântîrtônin mani an ichongpui ni a ti,” an tia.

¹⁰An irsêl ta hrai sikin, sipai hruaitu inlaltak khan Paula kha an inpot chit itinin tiin, zu fea, an lai ata Paula la suaka, Kulpuia hruai hrangin sipaihai thu a pêkhaia.

¹¹Kha zân khan Rengpa kha Paula kôla a ngîra, “Hâi takin om roh; Jerusalema ki thu ni ihril ang takin Rom khuaa khom ni ihril hrang a ni,” a tia.

¹²A tûk zînga chu Judahai chu Paula inruangin an irbuka, an that mâka chu ite fâka in loi hrangin khomâk an irsâma.

¹³Khaanga inruangtuhai kha sômminli nêka tam an ni.

¹⁴Ochai inlalhai le upahai kuang an fea, “Paula kin that mâka chu ite fa loi hrangin khomâk kin irsâm zit a ni.

¹⁵Khasikin, atûn nangni le roirêltuhaiin a thu fel nôk uala ngaitua tum angin Paula kha nin kuang hruai insum hrangin sipai hruaitu inlaltak kuang hong hril roi; a zuang chum zoi mâna that hrangin kin irsiam diam tâk a ni,” an tia.

¹⁶Khannisianlân, Paula farnu nâipa’n that tuma an lei inruang hrang thu kha a lei inhriata, a hong fea, kulpui sûnga a lûta, Paula a hril tâka.

¹⁷Paula khan sipai irza hruaitu laia inkhat a koia, “Hi ruatharte hin sipai hruaitu inlaltak kuang hruai roh; a kuang, thu imo khat insîr hrang a nei,” a tia.

¹⁸Khanchu, sipai hruaitu inlaltak kuanga khan a va hruaia, “Mi intâng, Paula khan a ni koia, hi ruatharte hi ni kuanga hong hruai hrangin a ni ngêna, ni kuang imo khat insîr hrang a inei ni a ti,” a tia.

¹⁹Sipai hruaitu inlaltak khan a kuta a chela, a hruaia, inrûkin, “Imo ni hril hrang ni inei?” a tia.

²⁰Ama khan, “Paula thu fel nôk uala ngaitua hrang angin nangtûk Sanhedrin makunga hruai insum hrangin Judahaiin nang ngên hrangin an inrual.

²¹Khannisianlân, an thu le’rngai no roh. An laia mi sômminli nêka tamin an inruang chian, khahai khan an that mâka chu, ite fâk nêk zong loi hrangin khomâk an irsâm. Atûn hin ni thu nghâkin irsiamsaiin an iom chian a ni,” a tia.

²²Sipai hruaitu inlaltak khan ruatharte pa kha an fetir tâka, “Hi thu hi ni nin hril ti, tûte kuang insîr no roh,” tiin a khapa. Khanchu ruathartepa kha an suaktir tâka.

²³Sipai hruaitu inlaltakin, sipai irza hruaitu inhni a koihaia, “Kaisaria a vuan zân dâr kuaka fe hrangin sipai irzahni le sakor chunga chuang mi sômsari le ufei chôi mi irzahni irfûk roi.

²⁴Khan, Paula chuangna hrang sakorte irfûk sa unglân, sataka Ramoptu Felika kuang nin intungtir hrang a ni,” a tia.

²⁵Hiang hin lekha a’rziaka,

²⁶“Klaudia Lusia’n Ramoptu inzaom tak Felika chubai a mûk e.

²⁷Hi pa hi Judahaiin an chela, an that hrang laiin sipaihai hruaiin ki zu fea, Rom mi a nih ti kin hriatin ki sansuaka.

²⁸Khan, thatpai an inuam nasan inhriat ki nuama, an Sanhedrin makunga ki zu fepuia.

²⁹An Dân i ia mani hnôl a nih ti ki hmua. Khannisianlân, an hnôlna thua khan thina hrang dôr mani intângna hrang dôr mani ite a itho inhre thei ma ung.

³⁰Judahaiin that tumin an inruang ti mi’n an ni hril le ni kuang ki hong itîr zôi zel a ni, a hnôltuhai khom a chunga thupoi an inei murdi ni kuang hril hrangin kin hriattir,” tiin.

³¹Khanchu sipaihaiin thupêk angin a zân zânin Paula kha an hruaia, Antipatri khua an tunga.

³²A tûka chu sakor chunga mihai kha Paula hruai mai hrangin an fea, sipai danghai khan an kîrsana, kulpui tiang an kîr nôk tâka.

³³Anni khan Kaisari kha an tunga, Ramoptu kuang lekha an pêka, Paula khom an makunga an inngîrtira.

³⁴Ramoptu khan lekha kha a tep zoiin kho tianga mi mo a ini tiin ar dona, Kilikia rama mi a ni an hriat tâka.

³⁵“Nangma hnôltuhai an zuang tung tika ni chungchâng ngaitua ki ti,” a tia. Khan, Heroda Praitoriana siaa, enkol hrangin thu a pêka.