Read Hrangkhol TÎRTÔNHAI SINTHO 24 Bible Online

TÎRTÔNHAI SINTHO 24 - Hrangkhol bible

TÎRTÔNHAI SINTHO 24

¹Sûn ringa zoia chu ochai inlaltak Anania le upa senkhathai kha ukhîl inkhat, Tertula hruaiin an hong tunga, Paula an sêlna thu kha Ramoptu makunga an sêl tâka.

²Paula an koi suak zoi chu Tertula khan an sêlna thu a hong insîr tâka; “Felika mahripom tak, nangma zâra kin laia irngeina le irtharngamna sôt tak a lei om tâka, ni vârna sikin hi rama mihai ta hrangin thil saloi tak tak,

³lam tinrênga hmun tina siaminsat a hong ini tâk hi, a sa kin tia, kin lôm tak tak a ni.

⁴Ni zoro nang kin châi nona hrangin bongte’n hong ti ki ti, lungkham taka ni irngaitua pe hrangin nang ki ngên.

⁵Hi pa hi mizêl tak, ram tina Juda murdi laia buaina insuaktu, Nazaret pâl hruaitu tak a nih ti kin inhriat.

⁶Tempil khom porinchetir a tuma, kin ichel ta a ni.

⁷Khannisian, sipai hruaitu inlaltak Lusia a honga, a ni’rchupuia a hnôltuhai chu ni makunga fe hrangin a ni ipêk a ni.

⁸Nangma ngeiin irdonin lân, kin ihnôlna murdi hi inhre thei ni ti,” a tia.

⁹Judahai khomin a hnôlna kha an lei thopa, khaang kha a ni an lei tia.

¹⁰Ramoptu khan thu insîr hranga a hong en le Paula khan, “Kum tamtak, hi chihai roirêltu ni lei ni tâk tih kin hriat sikin raifân taka ni makunga ki thiamna thu ki insîr hrang a ni,” a tia.

¹¹Jerusalema Pathian bê hranga ki hong ife kha sûn sômhleihni ban la ni no ni ti, nangma rengin inhre suak thei ni ti.

¹²Tempila mani, Sinagoka mani, khopui kho hmuna khom mi ki sêla, buaina siam hranga mi ki inthor tûte’n inhre mahai.

¹³Atûna an ni sêlna khom hi a bul a bâl ni kuang insîr hrang nei ual no nihai.

¹⁴Thil inkhat nang hril ki ti, ‘Pâl dang’ an iti lam dân zuiin ei irchibulhai Pathian ki biak ngaia, Dân le deipuhai lekhabua irziak murdi ki iam sa.

¹⁵Pathian ki iama, mi fel le felloihai thoi nôkna a om tih ki iam sa; kha kha anni ngeiin an iam sa.

¹⁶Khasikin, itiklai khoma Pathian le mihriam makunga insîrinsiat hlo ma ung, sia le sa inhriatna irthiang nei ki tum ngit ngai a ni.

¹⁷“Kum tamtak hnunga hin ki chipuihai kuanga thupêk chôiin, irbôlna inhlan hrangin Jerusalem-a ki hong fea.

¹⁸Khaanga ki tho lai khan tempila an ni hmua, khannisian mipui pungkhômna om maka, buaina om ual mah.

¹⁹Khannisian, Asia rama om Juda senkhat an oma, khahai khan ki chunga thupoi an neiin chu hi hin hongin, ni makunga an ni hnôla an intung hrang a ni.

²⁰A ninole, hitaka honghai hin Sanhedrin makunga ki ngîr lai khan imo ki itho’nsual an iti hrang a ni.

²¹Hi thu bâi khat sika hin a ni no tâkin chu, an laia ngîrin, ‘Mithi thoi nôkna thua a vuan sûn hin nin makunga inpông khumin ki iom a ni hi te,” tiin a sâma.

²²Felika khan Lam thu kha an hriat infel ok sikin, An kuang, “Sipai hruaitu inlaltak Lusia a zuang tung tika nin thu la rêl rong,” tiin a lei sia chiana.

²³Paula kha zalên viata inomtirin, a rualhaiin a sin an itho pe khom khap loia enkol hrangin sipai irza hruaitu kha thu a pêka.

²⁴Khan, sûn idôr ten mani hnunga Felika chu a hong nôka, a dôngma Drusili, Juda mi, hruaiin a honga, Paula kha an koitirhaia, Krista Jisua iamna thu a insîr kha a’rngaia.

²⁵Thiam inchangna thu hai, insumtheina thu hai, roirêlna la om hrang thu hai Paula’n an sîr lai khan Felika’n a sân ichi a om a tia, “Fe nôk tan lân, zoro’nchum ki nei nôk tika nang la hong inkoitir nôk rong,” a tia.

²⁶Sum a ipêk kha a sabei saa, khasikin Paula kha koia, a ichongpui mai ngai a ni.

²⁷Kum hni ar vêl hnungin chu Felika chu Porkia Festa’n a thûla. Felika khan Judahai inlômtir a nuama, Paula kha lung ina a mâksan tâka.