Read Hrangkhol TÎRTÔNHAI SINTHO 25 Bible Online

TÎRTÔNHAI SINTHO 25 - Hrangkhol bible

TÎRTÔNHAI SINTHO 25

¹Festa’n, ram kha a op hnung sûn thum zoia, Kaisaria irthokin Jerusalema a hong fea.

²Ochai inlalhai le Juda hruaituhaihai khan Festa kuang Paula chungchâng thu buai kha an lei hrila.

³“Lungkham takin Jerusalema hong inhruaitir roh,” tiin an lei ngêna, lam laia lei irdîpa that an itum a ni.

⁴Khannisian, Festa’n, “Paula kha Kaisari intângna ina a oma, kei khom fe lat hrang ki ni,

⁵Sualna a neiin chu nin hruaituhaiin ni zui sianlân, sêl roi,” a tia.

⁶An laia khan sûn riat mani sûn sôm vêl mani a châma, Kaisaria a kîr nôk tâka. A tûka chu roirêlna toihmuna a toia, Paula kha an hruaitirhaia.

⁷A zuang tungin chu Jerusalem ata Juda zuang chumhai kha a kôla an ngîra, thu ngar tak takin an hnôla; khannisian, an hnôlnahai kha a bul diktak suisuak thei mahai.

⁸Paula’n a thiamna thu an sîra, “Judahai dân porinchetir ma ung, tempil khom porinchetir ma ung, Kaisara khom hril insiat ma ung,” a tia.

⁹Festa’n Judahai laia irhming sa a nuama, Paula kuang, “Jerusalema hong fea, hi nang an ngôna thuhai hi khitaka ki makunga rêl ni nuam mo?” a tia.

¹⁰Paula’n chu, “Roirêlna toihmun Kaisara makunga, roirêl pea ki omna hrang ngeia ngîr ki ti. Judahai chunga ite tho’nsual ma ung, nang khomin ni inhriat angin.

¹¹Thil ki tho’nsuala, thina hrang dôr thil ki tho’n chu, thi hi sêl ma ung. Khannisianlân, hihai ni hnôlna hi a bul ite a om no’n chu, anni raifânna hrangin tûte’n an ni ipêk hrang ni mah. Ki chungchâng hi Kaisara kuanga intung ki ngên,” a tia.

¹²Festa’n a roirêltuhai a chongpui zoiin chu, “Kaisara kuanga intung ni inuamna angin, Kaisara kuang fe ni ti,” a tia.

¹³Sûn idôr ten mani a hek hnungin chu, rêng Agripa le Berniki chu Kaisari khuaa Festa lôm hrangin an honga.

¹⁴Sûn tamtak an châma, Festa’n Paula chungchâng thu chu rêng a hrila, “Felika khan mi intâng inkhat a mâksana,

¹⁵Jerusalema ki hong fe’n Juda ochai inlalhai le an upahaiin a thu kha an ni hrila, thiam no inchangtir hrangin an ni ngêna.

¹⁶keima’n chu an kuang, “Mi tûte, ama hnôltuhai le hmâi irsonga an irti mâka chu thiam no inchangtir zôi zel chu Rom sorkâr dân ni mah,” ki tia.

¹⁷Hi hin an zuanga, ir-ial loiin a tûka roirêlna toihmuna ki toia, kha pa kha kin koitirhaia.

¹⁸A hnôltuhai kha a kôla an ngîra, ki itûng lam angin ite thupoi insîr mahai.

¹⁹Anni sakho thu le mi inkhat thi tâk Paula’n a hring nôk thu an sîr, Jisua chunga an lei ibuai chian a ni.

²⁰Keima’n kha thu kha ki’rngaitua thei ual khomin inhre ma unga, Jerusalema hong fea, an thu kha hong rêl a nuam le nuam no ki’rdona.

²¹Khannisianlân, Paula’n kha kha sataka enkola an thu kha inlaltak kuanga intung a ngên uala. Khasikin Kaisara kuang ki tîr thei mâka chu enkol insa hrangin thu ki ipêk a ni,” a tia.

²²Agripa khan Festa kuang, “Kei khom kha pa thu’nsîr kha irngai ki inuam kêng,” a tia. Festa’n, “Nangtûk la’rngai roh,” a tia.

²³A tûka chu Agripa le Berniki kha roiinpui takin an fea, thu’nsîrna in sûnga an lûta, sipai hruaitu lianhai le khuaa mi poimo ual ualhai khom an kop saa. Festa thupêkin Paula kha an hong hruai inlûta.

²⁴Festa’n, “Reng Agripa le hitaka kin laia om murdihaio, Juda mipui murdihaiin ‘Hring inruk ni mah,’ tiin an khêka, Jerusalema le a chungchâng thu ki kuang an insîr kha hi nin ihmu pa hi a ni.

²⁵Khannisianlân, keima’n chu thina hrang ang dôr ite a itho hmu ma ung, ama’n Inlaltak kuang intung a nuam sikin tîr ki itum ta a ni.

²⁶Aniachu ite irziak hrang inhre ma ung. Khasikin nin makunga ki hong ihruai suak a ni; rêng Agripa, ni kuanga hong hruai bîk ki ni, irâi a ni zoiin i imo irziak hrang kin hriat theina hrangin.

²⁷Ama an ihnôl fel taka irziak loia mi intâng Inlaltak kuanga tîr chu a dikin inhre ma ung,” a tia.