Read Hrangkhol TÎRTÔNHAI SINTHO 26 Bible Online

TÎRTÔNHAI SINTHO 26 - Hrangkhol bible

TÎRTÔNHAI SINTHO 26

¹Agripa’n Paula kuang, “Ni thiamna thu nin sîr thei,” a tia. Kha zoi le Paula’n a kut a phara, a thiamna thu an sîr tâka.

²“Reng Agrip, a vuan hin ni makunga Judahai ni hnôlna murdia ki thiamna thu kin sîr hrang sikin, a sân vânnei ki’rti ok.

³Judahai om lam le an irsêlna ngai lamhai a sân nin hriat sikin vânnei ki’rti nôk ual a ni. Khasikin, sataka nir ngai pe hrangin nang ki ngên a ni.

⁴Ki thoibop ata ki chipuihai laia le Jerusalema ki om lam chu a phut ata Judahai murdi’n an inhriat.

⁵An insîr nuamin chu ei sakho pôl ingar tak Farisai laia om, tian ata ki inihai khom an inhriat.

⁶Ei irchibulhai kuang Pathian thu’nkung kha a tung ki sabeina thua atûn hin roirêlna makunga ki ingîr a ni.

⁷Kha thu’nkung kha hmu hrang sabeiin ei nam sômhleihnihaiin a sûn a zânin sathnem irngai takin sin an itho ngai a ni. O rêng Agrip, khaang sabeina sika khan Judahai hin an ni ihnôl a ni.

⁸“Nangni’n itho sika mo Pathianin mithihai a ikaithoi nin iiam loi?

⁹Keima ngei khomin Nazaret Jisua irhming doi lamin thil tamtak tho inlân ki lei ti ngaia.

¹⁰Khaang khan Jerusalema ki ti ngaia, ochai inlalhai kuang ata ircham lâkin mi irthianghai laia mi tamtak intângna inhaia ki bukhaia, thathai an tum khomin a sa ki tipuihai ngai.

¹¹Sinagok tina Jisua hril insiatir tumin ki hremhai chian chiana, an chunga ki ning an mur hrai sikin, ram dang dênin deng kin theitirhai ngai.

¹²Khaang tho hranga khan ochai inlalhai kuang ata thu dong le an thupêk chôiin Damaska ki pana.

¹³Khanchu, rêng Agrip, lampuia kin fe laiin sûn laia irvân ata vâr, misa nêka vâr, ki hmua, kha khan keima le ki ifepuihai kha a ni zuang êla.

¹⁴Irnênga ki’rtet raka, Hebrai chonga irhâiin, ‘Saula, Saula, ithoa mo deng ni ni intheitir? Sunna khianghrol irpal hi nangma vai kêng nang a inphop’ tiin chong kin hriata.

¹⁵“Keima’n, ‘Rengpa, tu mo ni ini?’ ki tia. Rengpa’n, ‘Jisua, deng ni intheitirtu hi ki ni,’ a tia.

¹⁶Thoiin lân, ni ke’n ngîr roh, ki sinthopua nang inkung hrangin ni kuanga ki zuang inlâr a ni. Ni ni ihmu thu le thil nang ki la inentir hrang hi mihai ni ihril hrang a ni.

¹⁷Judahai le Jentailhai kuang nang tîr ki ta, anni ata nang ki isansuak hrang a ni.

¹⁸Keima ni iam sika an sualhai ngaidam an nina hrangin mi irthianghai laia irchon dongtum an nei sa theina hrangin. An mit invâr hrangin, inthim ata vâr hong inkîrtir hrangin Setana thuhnuai ata Pathian tiang hong inkîrtirtu hrang ni ni,” a ni tia.

¹⁹“Khasikin, rêng Agrip, irvân ata inlârna ki ihmu kha chu sêl ma ung.

²⁰Khanchu, Damaska mihai kuanga insîr irphutin Jerusalema mihai kuang, Judai rama mi murdihai le Jentailhai kuang khom an sualna ata irleta Pathian tiang an irheia, an irlet tak tak a nih ti an langna hranga, sin an thôna hrangin thu ki ihril ngai a ni.

²¹Khasika khan tempila ki om laiin Judahaiin an ni chela, ni that an itum a ni.

²²Khanisianlân, Pathianin a ni changpui sikin a vuan ten mi lian le mi chîn tetehai kuang thuhril hrangin ki la ingîr thei a ni. Deipuhai le Mosia’n thil hong tung hrang an insîr ban ite insîr ma ung.

²³Krista khan dûk tuang a ta, mithi lai ata thoi nôkna mahruaitu nih a ta, Judahai le Jentailhai kuang vâr irhmutir masa tak ni a ti, an ti thu kha,” a tia.

²⁴Khaanga a thiam thu an sîr laiin Festa kha inring takin a khêka, “Paula, ni invêt tâk kêng, ni tep intam ta hraia nang a invêttir a ni ta,” a tia.

²⁵Khannisianlân, Paula khan “Festa mahripom tak, invêt ma unga; thu dik tak le thu vâr tak ki insîr ual a ni.

²⁶Hi thil hi rêng khomin an hriat, a kuang khom hâi takin ki insîr a ni. Hi thil hi inrûka tho khom ni mah, a kuang ite ip om mah ti kin hriat infel sikin.

²⁷Reng Agrip, deipuhai thu ni iam mo? Ni iam tih kin hriat” a tia.

²⁸Agripa khan Paula kuang, “Sôtnote sûnga Kristiana ni siam ni itum mo?” a tia.

²⁹Paula’n, “Sôt sian, sôt no sian, nang vai ni loiin a vuana ki thu irngaituhai murdi khom hi keima anga om hrangin Pathian kuang ki ngên a ni, thîrkol hi chu bun sa loiin,” a tia.

³⁰Khanchu, rêng hai, Ramoptu hai Berniki hai le an itoipuihai murdi kha an thoi zita.

³¹An bingin an fea, an chonga, “Hi pa hi thina hrang dôr mani, lung ina intângna hrang ang dôr mani ite tho ual ma hi te,” an tia.

³²Agripa khan Festa kuang, “Hi pa hin Kaisara kuanga tung ngên no sianlân chu suak zôi thei a ni,” a tia.