Read Hrangkhol TÎRTÔNHAI SINTHO 27 Bible Online

TÎRTÔNHAI SINTHO 27 - Hrangkhol bible

TÎRTÔNHAI SINTHO 27

¹Khan, irkuangin Itali rama fe hrangin an ni ti zoi le, Paula le mi intâng dang senkhathai chu Augasta sipai pâl an iti pa sipai irza hruaitu Julia kuta an inhlan ta.

²Adramuteno khuaa irkuang, tuikhanglian kôla Asia ram khuahai hro hrang khan kin chuanga, kin fe tâka. Makedonia rama Thesalonika kho mi Aristarka khom a om sa.

³A tûka chu Sidon kin tunga, kha khan Julia khan Paula chunga a sa oka, irkaiinhar theina hrangin a rualhai kuang an lêngtira.

⁴Khatak ata irkuangin kin fe nôka, phâivua’n a no tiang a ni nam sikin Kupra chômbung khorthi phâivua ir-upna tiang kin fea.

⁵Kilikia ram le Pamfulia ram dep tuipui kin khêl zoiin Lukia rama Mura khua kin tunga.

⁶Kha khan sipai irza hruaitu khan Alexandria khuaa irkuang, Itali rama fe hrang a hmua, kha irkuanga khan an nin chuangtira.

⁷Nikho sôtzan kin fe zâm zâma, intak takin Knidos khua irdîn kin tung hrâma, a no tiang a ni nam sikin Kret chômbung irbîkna tiang kin fe irkuala. Kret chômbung hmor irzum Salmoni an iti kha kin hroa.

⁸Intak takin ivapang zuiin hmun inkhat irkuang Irngamna ‘Hoi’ an iti kha kin tunga, kha kha Lasai kho pêna om a ni.

⁹Nikho sôt ian kin châm hnungin Bu nghei zoro a khêl tâka, irkuanga fe mai a sân ichi a om tâk sikin anni kha Paula’n thu ar donhaia,

¹⁰an kuang, “Puhaio, atûn hin ei fe mai hrangin chu siatna a sate’n ei itong hrang ti kin hriat; irkuang le a timmatua pêl vai ni loiin eini irkuanga chuanghai khom hong tung a tih ti kin hriat,” a tia.

¹¹Khannisianlân, sipai irza hruaitu chu Paula ircham nêkin irkuang chalaitu le irkuang neitu ircham kha a zôm uala.

¹²Phalbia omna hrangin chu irkuang irngamna kha an chum rak no sikin, mi tam ual fe suaka, Foiniki khua a tung hrâma, khataka khan phalbi tuang kha an nuama. Foiniki khua hi Kret chômbunga irkuang irngamna inkhat a ni, sim nitâk tiang le hmâr nitâk tianga irheia om a ni.

¹³Sim khorthi a hong tho viat viata, an inuam ang tak an ihmu mani an irtia, thîrkuaikim kha an kaisuaka, Kret chômbung ivapang kha thei dôra nâiin kin zuia.

¹⁴Khannisianlân, sôtnotea, muang ata a sân phâivua a zuang tho thuta kha phâivua kha Eurakuilo an ti.

¹⁵Irkuang kha a hong sêm rak raka, phâivua tianga chalai inhne chi ni ta maka, a nuam nuama, ni tân hrangin kin om tâka, a ni tân, a ni tân tâka.

¹⁶Chômbung chînte Klaudi an iti kôla phâivua ir-upna tiang irtôla, intak tak pumin irpûm irkuangin kin zôk thei hrâma.

¹⁷Irkuang an kaisuaka, irkuang kha hruiin an khit khak tâka. Libia ivakama, tuichira ni tân phâk a ti, ti an chi sikin irkuang puanzâr kha an irhniamtira; khanchu, a ni tân a ni tân nôk tâka.

¹⁸Phâivua le tuiirsôn khan a ni ngîm mai sikin a tûka chu irkuang timmatua pêl kha an pai irphut tâka.

¹⁹Sûn thum ni’n chu anni kut ngêtin irkuang timmatua khom an pai suak nôk tâka.

²⁰Nikho sôt tak misa khom, ârsi khom inlang maka, phâivua lakin a saterengin a nin muai maia, hring hrang rêng rêngin irsabei ta ma ung.

²¹Bu nêk loia nikho tamtak an om hnungin Paula kha an laia a ngîra, “Puhaio, ki thu kha zômin Kret chômbung ata khan suak no inlân chu hiang intakna le irhmangnahai hi ei itong loi hrang a ni.

²²Khannisianlân, atûn hin irtharngam taka om hrangin nangni ki ngên a ni. Nin laia tûte thi no chin ni, irkuang chu a isiat hrang a ni.

²³A ta ki nia, a sin ki tho ngai, Pathianin vântîrtôn inkhat zânin khan a zuang tîra, ki kuang a zuang ngîra,

²⁴‘Paula, chi no roh, Kaisara makunga ni ingîr hrang a ni. Irngai ta, irkuanga ni inzinpui murdi kha nangma sikin Pathianin a inzôk hrang a ni,’ a ni zuang tia.

²⁵Khasikin, puhaio, irtharngam takin om roi. Pathian ki iama, a ni ihril ang kha tung ngêt a ti.

²⁶Chômbung khôn mo khata a ni itân suak hrang a ni,” a tia.

²⁷A zân sômhleiminli zâna chu phâivua’n Mediteranean tuipuia khan a ni tân zêla, zânlai tak vêla chu irkuang mihaiin i mual mani tung hrang angin an inhriata.

²⁸Khanchu, tui inthûk lam an irkhia, hlam sômhnia inthûk a lei nia; zoro sôtnote hnunga an irkhi nôka, hlam sômhlei ringaa inthûk a ni ta.

²⁹Lung khorok kâra a ni chôi itinin ti an chi sikin irkuang irmei tiang thîrkuaikim minli an inthâka, khovâr a sân an nghâkhmoa.

³⁰Irkuang chalaituhai khan irkuang lu tiang thîrkuaikim thâk hrang angin irpûm kha tuikhangliana an inthâka, irkuang kha rotsan an itum a ni.

³¹Kha zoi le, Paula’n sipai irza hruaitu le sipaihai kuang khan, “Hihai hi irkuanga an om mai no’n chu zôk thei no chin ni,” a tia.

³²Khanchu, sipaihai khan irpûm hruihai kha an ât sata, an intânpaitir tâka.

³³Khovâr tônin Paula’n irkuanga om murdihai kha bu nêk hrangin a ngênhaia, “A vuan hin ite fa loia nin omna sûn sômhleiminli a hong ni ta.

³⁴Khasikin bu nêk hrangin nangni ki ngên a ni, nin hringna hrang a ni; nin laia tûte samzâi inkhat te khom irhmang no ni,” a tia.

³⁵Kha thu kha an sîr zoiin bai a lâka, an rênga makunga khan Pathian kuang lômthu an sîr zoiin a khoia, a fâk irphut tâka.

³⁶Khanchu, an rêngin irtharngam takin an fâk tâka.

³⁷Irkuanga om kha kin rêngin irzahni sômsari kiruk kin nia.

³⁸An fâk zoi zit hnungin chu irkuang inzângtir hrangin an bu pêlhai kha tuipuia an pai suak nôk tâka.

³⁹Khua a hong vârin chu, kho tianga ivakam mo an itung inhre mahai, khannisianlân, kho tianga li inkilkôia mani chiaiphoi an hmua, kha chunga khan a theiin chu irkuang kha muang inkâitir an tuma.

⁴⁰Thîrkuaikim hruihai kha an ât sata, tuipuia an mâksan tâka; kha chunga khan an kai inhêlna khitnahai kha an sûta, maton tianga puanzâr kha phâivua insêmtir lam hrangin an irsângtira, chiaiphoi kha an pan tâka.

⁴¹Khannisianlân, tui hrât inhni irtongna hmuna kin lût lika, irkuang kha hnuai an insuktir tâka. Khanchu irkuang lu tiang an ôk khaka, inchâng thei loiin a om chiana, a pên tiang chu tuiirsôn sikin a koi irphut tâka.

⁴²Sipaihai chu intânghai kha that zit an tuma, tui irhliaia kâi, om an ta, intân zoi an ti, ti an chia.

⁴³Khannisianlân, sipai irza hruaitu khan Paula saninzôk a nuama, an thil tum kha a khapa; tui irhliai thei murdi’n tuipuia irchômthâka muanga lei kâi masa hrang le,

⁴⁴mi dang chu thingphêk chunga mani, kâi hrangin thu a pêk tâka. Khaang khan kin rêngin muanga satakin kin kâi zit tâka.