Read Hrangkhol TÎRTÔNHAI SINTHO 28 Bible Online

TÎRTÔNHAI SINTHO 28 - Hrangkhol bible

TÎRTÔNHAI SINTHO 28

¹Kin kâi zoiin chu chômbung kha Malta a nih ti kin hriat tâka.

²Kha chômbung mihai khan a sân lung an ni lei inkham tak taka. Rua a tho sik le a sân a dâi sikin mei an thoa, kin rêngin an ni lei lôma.

³Paula’n thing têlkhat a’rfuanga, meia a tuaa, a lum sikin mirûl a suaka, a kut an chuka, a kut a kher pe khaka.

⁴Khataka mihai khan a kuta mirûl kop chian kha an hmu’n chu, “Hi pa hi mi that ngêt a ni, tuikhanglian ata intân suak khom sianlân, dik taka Roirêltu’n a ihring hi a inuam ta loi a ni,” an tia.

⁵Khannisianlân, ama khan mirûl kha meia a nok thâka, ite ti mah.

⁶Anni khan a hong invûngin irningloia chinginrîlin a ithi zôi zel hrang mani an iama. Sôt ian an nghâka, ite ti mah ti an hmu’n chu an ngaidân ar thûla, “Pathian a ni hi te,” an ti nôk tâka.

⁷Kha kôla khan kha chômbung rêng Poplia irhuan a oma. Ama khan a ni lei lôma, sûn thum dên lôm takin an nin tungtira.

⁸Poplia pa kha inkhur le thisena in-êk irveiin a lei zâl chiana. Paula khan a ena, a lua kut irnghatin a chongchaia, a dam tâka.

⁹Kha zoi hnung chu, kha chômbunga khan mi dang a na murdi an honga, an dam tâka.

¹⁰Annihai khan a saterengin an ni chôiindôma, kin fe nôk hrang khomin kin innang murdi irkuanga an siaa.

¹¹Tha thum hnunga chu phalbi laia lei châm tâk irkuangin kin fe nôk tâka. Kha irkuang kha Dioskuri an tia, (Pathian inphîr khom an ti ngai) Alexandria khuaa irkuang a ni.

¹²Surakus khua kin tunga, sûn thum kin châma.

¹³Khatak ata kha irkuangin kin kîr nôka, Regium khua kin tunga. Sûn khat zoia sim khorthi a hong thoa.

¹⁴Kha khan iamtuhai kin hmua, an kuang hapta khat châm hrangin an ni ngêna, khaang khan Rom khua kin tung ta a ni.

¹⁵Rom khuaa iamtuhai khan kin thurchi an lei inhriat le chu, ‘Appia dukan’ le ‘khualbûk inthum’ dênin ni nghâk hrangin an honga. Paula’n kha mihai kha a hmu Pathian kuang lômthu an sîra, a sân ar tha a’rngam sa tâka.

¹⁶Rom kin tungin chu a nghâktu sipai kuang a binga om an phal ta.

¹⁷Sûn thum hnunga chu Paula’n khataka Juda hruaituhai kha a koi bukhaia, an hongin chu an kuang, “Urênghaio, ei mihai chunga mo ei irchibulhai Dân ata mo ite tho’nsual no khomin, Jerusalema an ni chela, Rom sorkâr kuta an nin hlana.

¹⁸Rom mihaiin chong an nir don zoiin chu ki chunga ite tho’nsuala, thi theina hrang an hmu no sikin nin sua an nuam tâka.

¹⁹Khannisianlân, ama kha Judahaiin an sêl sikin Kaisara kuang intung ngêt ki inang tâk a ni; ki mihai demna hrang nei chu ni ma ung.

²⁰Khasikin nangni hmu le nangni chongpui nuamin nangni ki ikoi buk a ni; Israelhaiin an isabei ngai, kha pa sika khan hi thîrhrui hi ki ibun a ni,” a tia.

²¹Anni khan, “Judai ram ata ni thurchi insîrna lekha ite hmu ma ung, urênghai laia tûte’n ni thurchi a siat tiang mo, a sa tiang mo insîr hrangin hong ual mahai.

²²Hi pôl hi hmun tina insîrinsiat a ni tiin kin lei inhriat, nir ngai dân khom inhriat kin nuam,” an tia.

²³Khanchu, nikhua an khita, kha ni khan a omna ina mi tam takin an hong pana, zîng ata zân dênin Pathian ram thu an sîra, a hrilfiaa. Mosia Dan bu le deipuhai lekhabu ata Jisua chungchânga annihai kha in-iamtir tumin a hrilhaia.

²⁴Senkhatin a thu’nsîr kha an iama, senkhatin iam mahai.

²⁵An chong irhmun thei ta maka, Paula’n hi thu hi an sîr zoiin chu an fe suak tâka. A thu’nsîr kha hi hi a ni. “Irtha Irthiangin deipu Isaia bâia nin irchibulhai kuang a insîr kha a sân a dik.

²⁶‘Hi chihai laia hin fe’n lân, van sîr roh, Irngai, irngai nin ta, a’rngaina lam chang inhre no chin ni. Hmu chian chian nin ta, hmu’nfel no chin ni.

²⁷Hi mihai milung hi a cho tâka, An mikuar kha an sêttira, An mit an insîng saa, khan ni no sian an mitin hmu an ta, An mikuarin inhria an ta, An milung inhre sa ta, hong irhei nôk an ta, lei indamhai likna ki ti,’ a ti kha.

²⁸Pathian saninhringna kha Jentailhai kuang pêk a nih ti inhre roi; anni’n chu irngai irngai an ta,” a tia.

²⁹Hi thu hi an sîr zoiin chu an irsêl mur mura an rot zoi tâka.

³⁰Kum hni kâi rakin ama omna hranga man a ipêk ina khan a oma, a kuang a hong murdi a lei lômhai ngai.

³¹Pathian Ram thu a hrila, Rengpa Jisua Krista thu, hâi takin mi ar chutirhaia, tûte’n khap mahai.